Klei Aê Diê Blŭ: Rôm 13:8-10
Êlan kliăng: “Klei khăp amâo tuôm ngă jhat kơ pô riêng gah ôh; snăn klei khăp bi ênŭm klei bhiăn” (Rôm 13:10)
Klei êmuh ksiêm mĭn: Si klei khua ƀĭng kna Y-Pôl mtă mtăn kơ klei đuôm nư? Ya klei ñu kñăm tơdah ñu lŏ mñă kơ klei bhiăn? Si dôk hdĭp čiăng đăm ngă jhat kơ pô riêng gah ôh? Si drei bi êdah klei khăp ti krah êpul êya drei dôk hdĭp?
Drei dôk hdĭp hlăm sa boh lăn ala bi kah, čuôt klih leh anăn klei bi mguôp mčah rai. Ti krah boh klei anăn, Aê Diê iêô mthưr phung anak ƀuôn sang Ñu hdĭp thâo bi khăp hlăm êpul êya. “Đăm đuôm nư arăng ôh, knŏng bi đuôm klei khăp hdơ̆ng diih” (êlan 8a). Păt čiăng jih jang nư klei brei lŏ tla wĭt sơăi, ƀiădah nư klei khăp yơh amâo tuôm tuč ruê̆ ôh. Kyuadah Aê Diê khăp leh kơ drei êbeh dlai hlăm Yang Krist (Rôm 5:8), kyuanăn drei mâo klei iêô mthưr ăt khăp nanao kơ mnuih mkăn msĕ mơh. Klei khăp amâo djŏ jing knông ktrŏ brei klam hŏng klei mgô̆ ôh, ƀiădah jing klei thâo hdơr knga kơ klei pap Khua Yang brei. Pô mă tŭ leh klei khăp Khua Yang srăng mâo klei mtrŭt čiăng khăp kơ phung riêng gah drei.
Khua ƀĭng kna Y-Pôl ăt lŏ brei thâo: “kyuadah hlei pô khăp kơ pô riêng gah ñu bi sĭt leh klei bhiăn” (êlan 8b). Ñu mñă kơ jih klei bhiăn msĕ si, đăm tlĕ piu ôh, đăm bi mdjiê mnuih ôh, đăm tlĕ dŏ arăng ôh, đăm tluh ôh, čiăng kñăm ktang kơ klei mđing uêñ leh anăn khăp kơ pô riêng gah. Jih klei bhiăn anăn kñăm čiăng răng mgang klei bi mguôp ti krah mnuih hdơ̆ng mnuih, bi hriăm drei hdĭp thâo bi mpŭ, kpă ênuah, sĭt suôr leh anăn mơak hŏng mnơ̆ng drei mâo. Ƀiădah lĕ, klei khăp yơh jing phŭn knhal êlam lĭn dôk ti tluôn jih jang klei. Tơdah khăp sĭt, drei amâo čiăng ngă klei jhat kơ mnuih mkăn ôh; amâo mčeh luar, amâo ktư̆ juă, amâo lhiăr amâodah plah mă mnơ̆ng mnuih mkăn. Klei khăp đru thâo mpŭ kơ ênoh yuôm grăp čô mnuih, kyuadah grăp čô jing rup Aê Diê hrih mjing sơăi. Kyuanăn, hdĭp kpă ênô amâo djŏ knŏng djă pioh klei bhiăn ti êngao ôh, ƀiădah brei klei khăp atăt gai klei ngă grăp hruê.
Khua ƀĭng kna Y-Pôl lŏ kñăm thiăm: “Klei khăp amâo tuôm ngă jhat kơ pô riêng gah ôh” (êlan 10). Klei ngă jhat amâo djŏ knŏng klei ngă kơ asei mlei ôh. Klei blŭ jhat ăt jing klei bi ruă êka. Klei mčeh luar bi rai klei đing đăo hdơ̆ng pô. Klei tluh bi mjing klei ktư̆ juă. Klei amâo uêñ kơ mnuih mkăn bi ruă ênguôt mnuih dôk hjăn păn. Kyuanăn, hdĭp thâo khăp jing klei ruah amâo ngă klei jhat ôh, ƀiădah ba klei bi hlao.
Anak mnuih khăng mtô lač hdơ̆ng pô brei thâo răng mgang pô, tui duah klei tŭ dưn kơ pô leh anăn lŏ rŭ ênua tơdah arăng ngă jhat. Ƀiădah Klei Aê Diê Blŭ mtô brei drei hdĭp hŏng klei khăp săn asei mlei, ai tiê thâo pap leh anăn klei sĭt nik tui hlue klei Khua Yang Yêsu bi hmô (Philip 2:1-11). Tơdah hdĭp thâo bi khăp, drei srăng jing klei mngač mtrang ti krah lăn ala mmăt tĭt , jing phung hưn bi sĭt hdĭp kơ Ƀuôn Ala Mtao Aê Diê, leh anăn ngă bi leh ênŭm klei bhiăn Aê Diê. Akâo kơ Aê Diê brei knhuah hdĭp drei amâo bi ruă êka mnuih mkăn ôh ƀiădah ba klei bi hlao; amâo bi rai ƀiădah mkŏ mdơ̆ng; amâo knŏng bi khăp hdơ̆ng pô êjai mmông găl ôh, ƀiădah čiăng hdơr knga kơ jih klei pap Aê Diê brei leh kơ drei.
Hŏng si knhuah hdĭp drei bi êdah ai tiê gưt ngă hlue klei bhiăn Aê Diê?
Wah lač: Ơ Khua Yang, đru kâo hdĭp thâo khăp ti krah ala ƀuôn hruê anei, čiăng kơ mnuih mkăn dưi ƀuh knuih kpă ênô leh anăn bŏ hŏng klei khăp mơ̆ng Yang Krist hlăm klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 32
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
