Loos 13:8-10
Nqe cim:
“Yog nej hlub kwvtij zejzog, nej yeej tsis ua phem rau leejtwg; yog nej hlub lawv thiaj yog nej ua raws li txoj kevcai qhia.” (Loos 13:10)
Lus nug xav:
– Timthawj Paulus qhia li cas txog kev tshuav lwm tus nqi?
– Nws rov hais txog tej kevcai qhia kom qhia txog yam tseem ceeb dabtsi?
– Ua neej li cas thiaj yog tsis ua phem rau yus tej kwvtij zej zog?
– Peb ua neej qhia tshwm txojkev hlub hauv lub zej zos li cas?
Peb tabtom ua neej nyob hauv ib lub ntiajteb uas muaj kev sib faib, kev qia dub thiab tsis muaj kev sib raug zoo. Nyob hauv lub tsamthawj zoo li ntawd, Vajtswv nqua hu Nws haivneeg yuav tsum ua neej muaj kev hlub hauv zej zos, hais tias: “Nej tsis txhob tshuav leejtwg nqi, tib qho uas nej tshuav luag nqis ces yog ib leeg yuav tsum hlub ib leeg” (nqe 8a). Feem ntau txhua yam nuj nqis yeej them tau tas du lug ib hnub, tiamsis nuj nqi ntawm txojkev hlub yeej tsis muaj hnub kawg. Vim Vajtswv twb hlub peb nplua mias dhau ntawm Yexus Khetos lawm (Loos 5:8), yog li ntawd peb kuj raug nqua hu kom hlub lwm tus ntxiv mus. Txojkev hlub tsis yog ib lub nra uas raug yuam kom ris, tiamsis yog lub siab ua tsaug rau tej koob hmoov hlub uas tus Tswv pub. Tus uas tau txais tus Tswv txojkev hlub lawm yuav muaj kev txhawb zog mus hlub cov neeg uas nyob ib ncig ntawm nws.
Timthawj Paulus qhia ntxiv hais tias: “tus uas hlub lwm tus thiaj yog nws ua raws li txoj kevcai qhia” (nqe 8b). Nws hais txog tej kevcai xws li tsis txhob deev luag poj luag txiv, tsis txhob tua neeg, tsis txhob ua tub sab, tsis txhob ntshaw luag tug, kom qhia meej txog kev hmov tshua thiab kev hlub yus tej kwvtij zej zog. Tej kevcai no puavleej yog los tiv thaiv tibneeg txojkev sib raug zoo, qhia kom peb hwm lwm tus, ua ncaj ncees, ua siab ncaj rau tus txijnkawm thiab paub txaus siab rau yam uas yus muaj. Tiamsis, txojkev hlub thiaj yog lub hauv paus tob tob uas nyob tom qab txhua yam kevcai ntawd. Thaum peb hlub tiag tiag, peb yuav tsis xav ua phem rau lwm tus; peb yuav tsis dag, tsis quab yuam, tsis ntxeev siab lossis txeeb tej uas yog lwm tus tug. Txojkev hlub pab peb saib taus txiaj ntsig ntawm tibneeg, vim txhua tus puavleej raug tsim raws li Vajtswv tus yam ntxwv. Yog li ntawd, ua neej ncaj ncees tsis yog tsuas yog ua raws tej kevcai sab nraud xwb, tiamsis yog cia txojkev hlub coj peb tej haujlwm txhua hnub.
Timthawj Paulus tseem hais ntxiv tias: “Yog nej hlub kwvtij zejzog, nej yeej tsis ua phem rau leejtwg” (nqe 10). Kev ua phem tsis yog tsuas hais txog kev siv lubcev ua nruj ua tsiv xwb. Tej lus iab lus daw kuj ua rau lwm tus mob siab. Kev dag ntxias rhuav tshem kev sib ntseeg siab. Kev ntshaw ua rau muaj kev tsimtxom. Kev tsis quav ntsej ua rau lwm tus mob siab. Yog li ntawd, ua neej muaj kev hlub yog xaiv tsis ua rau lwm tus mob siab, tiamsis coj kev kho zoo los rau lawv.
Tibneeg feem ntau sib qhia kom paub tiv thaiv yus tus kheej, nrhiav yam uas muaj txiaj ntsig rau yus thiab ua pauj thaum raug lwm tus thuam lossis ua phem rau. Tiamsis Vajtswv Txojlus qhia kom peb ua neej nrog txojkev hlub yeem txi tus kheej, muaj lub siab hlub tshua thiab ua raws qhov tseeb, raws li Tswv Yexus tus qauv (Filipis 2:1-11). Thaum ua neej sib hlub, peb dhau los ua lub teeb nyob hauv qhov tsaus ntuj, ua tus timkhawv ciaj sia rau Vajtswv Lub Tebchaws thiab ua tiav Vajtswv txoj Kevcai. Thov tus Tswv pab kom peb lub neej tsis ua rau lwm tus raug mob siab, tiamsis coj kev kho zoo los; tsis ua rau muaj kev puastsuaj, tiamsis txhim ruaj khov; tsis yog tsuas hlub thaum yooj yim, tiamsis hlub los ntawm nplooj siab nco txog Vajtswv tej koob hmoov hlub uas Nws pub rau peb.
Thov Vajtswv,
Tus Tswv, thov Koj pab kom nyuam yaus ua neej muaj kev hlub hauv zej zos txhua hnub, kom lwm tus pom Tswv Yexus Khetos tus yam ntxwv uas ncaj ncees thiab muaj kev hlub dhau ntawm nyuam yaus lub neej. Nyuam yaus tuav Tswv Yexus Khetos lub npe thov, Amees.
Peb qhia tshwm nplooj siab ua raws tus Tswv txoj kevcai dhau ntawm kev ua neej li cas?
Nyeem Vajluskub hauv peb lub xyoos: Yauj 32
Kênh Youtube BHKTHN:
