Rôm 13:8-10
“’Noh na tơ̆ng bơ̆n ‘mêm kơ bôl buăl, bơ̆n ưh kơ pơm kơnê̆ kơ bôl buăl ôh. Tơ̆ng bơ̆n ‘mêm kơ bôl buăl bơ̆n gô răk đĭ dôm tơdrong ‘Bok Kei-Dei pơkă kơ bơ̆n noh.” (Rôm 13:10)
Nơ̆r jet tơchĕng pơwao:
- ‘Bok Pôl đei tơgŭm nơ̆r thoi yơ lăm tơdrong hre đom?
- Sư đei tơ’blŏk dơ̆ng khôi juăt wă kơ nhăm tơdrong kiơ?
- Arih thoi yơ na hoei kơ pơrăm bơngai jih ‘ma kơ bơ̆n?
- Lu bơ̆n tơ’bôh tơdrong ‘mêm kơ plah arih lăm kon pơlei pơla thoi yơ?
Lu bơ̆n đei arih lăm teh đak ‘bĕnh kơ tơdrong tơklah, kret tơsen păng tơdrong tơ’bưh băl lơ pơchah răm. Lăm kơ plah dôm tơdrong ‘noh, ‘Bok Kei-Dei krao lu kon Sư athei arih đei tơdrong ‘mêm mơnat lăm kon pơlei pơla. “’Nĕ kơ hre đom kơ minh ‘nu bơngai bu, mă lei athei hre gah tơdrong ‘mêm mơnat dih băl đĕch” (trong 8a). Tơpă đĭ đăng tơdrong hre kăl kơ ‘mong mă tôm, mălei hre gah tơdrong ‘mêm lei ling lang ưh kơ đei tôch. Yua kơ ‘Bok Kei-Dei đei ‘mêm kơ bơ̆n tih tơpă păng rơkah rơkai lăm Kră Yang Yêsu Krist (Rôm 5:8), na lu bơ̆n kư̆m đei nơ̆r krao wơ̆n wă kơ bơ̆n đei ‘mêm kơ bơngai nai. Tơdrong ‘mêm ưh kơ trŏ kơ thoi tơdrong pŭ trăp dah đei bơngai pơgŏ mă lei noh jơ̆ yua kơ đei jơ-hngơ̆m băt bơnê đơ̆ng tơdrong mơnat Kră Yang ăn đĕch. Lu bơngai mă sơng iŏk tơdrong mơnat đơ̆ng Kră Yang lu sư gô đei tơdrong pơtrŭt wă kơ bơ̆n đei ‘mêm kơ bơngai nai.
‘Bok Pôl chih thim dơ̆ng: “yua kơ bơngai bu ‘mêm kơ bơngai jê̆ sư noh jơ̆ pơm pơkeh kơ khôi juăt” (trong 8b), Sư đei tơ’blŏk dôm tơdrong khôi juăt ưh kơ pơm pơyô kư̆ kă, ưh kơ pơlôch bơngai, ưh kơ hưch ham wă kơ pơma pran kơ tơdrong kăl kơ hyơ̆k kơ ‘mêm mơnat kơ bơngai jih ‘ma kơ bơ̆n. Dôm khôi juăt tơ kơpal ‘noh jơ̆ wă bơwei tơdrong arih kơplah đei arih hơdai dih băl, bơtho lu bơ̆n arih pơyom dih băl, tơpăt tơpă, arih hoei kơ pơm kư̆ kă hăm klo kăn đe păng băt kơ đei bơnê. Mălei tơdrong ‘mêm jơ̆ tơdrong mă dơ̆ng hơdrol hloh kơ dôm tơdrong noh. Kơplah đei tơdrong ‘mêm tơpă, lu bơ̆n gô ưh kơ wă pơm kơ bơngai đei tơdrong pơrăm bơngai nai, ưh kơ hơlĕnh, pơgŏ pơđep, dah plơ̆ plĕch dah wă tơgar iŏk ăn kơ bơ̆n kơdih đơ̆ng tơma đe. Tơdrong ‘mêm jơ̆ tơgŭm bơ̆n pơyom kơ rim bơngai, yua kơ đĭ đăng kon bơngai bơ̆n jơ̆ rup ‘Bok Kei-Dei ngăl. Thoi noh, arih hăm tơdrong tơpăt ưh kơ sĭ bơwei tơdrong gah ‘nguaih đĕch ôh mă lei tơdrong ‘mêm chông anhăk ba tơdrong jang bơ̆n rim năr.
Pôl đei pơm thim thoi âu: “tơdrong ‘mêm ưh kơ pơrăm bơngai jih ‘ma kơ bơ̆n” (trong 10). Tơdrong pơrăm ưh kơ sĭ pơrăm gah akâu jăn đĕch ôh. Mă lei đei tơdrong nơ̆r pơma pơm dih băl ưh kơ hyôk. Tơdrong hơlĕnh pơrăm kơ tơdrong lui ngeh dih băl, đơ̆ng tơdrong hưch ham jing pơgŏ dih băl. Tơdrong ưh kơ hyơ̆k bơngơ̆t ba ăn kơ bơngai nai jĭ jăn lăm tơdrong sơ’ngon. Thoi noh, arih hăm tơdrong ‘mêm noh jơ̆ rơih iŏk tơdrong ưh kơ pơrăm bơngai nai, mă lei ba ăn tơdrong pơklaih.
Kon bơngai bơ̆n đei tơdrong bơtho dih băl lăm tơdrong bơwei akâu jăn kơdih, chă tơdrong lơi kơ dih, pơm plơ̆ dah đei nơ̆r pơma kơnê̆. Mă lei Nơ̆r Kră Yang bơtho lu bơ̆n kăl kơ arih hăm tơdrong ‘mêm păng chu hŭt akâu jăn kơdih bơ̆n, đei jơ-hngơ̆m ‘mêm păng trŏ thoi Nơ̆r tơpăt sĭt đơ̆ng Kră Yang Yêsu (Philiip 2:1-11). Kơplah arih hăm tơdrong ‘mêm, lu bơ̆n jing hơdah pơchrang lăm măng mu, noh jơ̆ tơdrong kdranh pơsĭt kơ Kră Yang ‘Bok Kei-Dei, păng pơm pơkeh khôi juăt Kră Yang. Apinh Kră Yang ăn kơ chăl arih bơ̆n ưh kơ pơm ăn kơ gơ̆p đei tơdrong sơ’ngon mă lei ba ăn tơdrong pơklaih; huei kơ pơrăm mă lei pơjing tơiung; ưh kơ sĭ ‘mêm băl kơplah ‘bơ̆t jơnăr hyôk đĕch mă lei wă pơm ‘mong ăn kơ tơdrong ‘mêm Kră Yang.
Ơ Kră Yang, apinh Ih tơgŭm inh arih ‘mêm mơnat lăm teh đak dang ei, wă kơ lơ bơngai ‘bôh tơdrong tơpăt păng ‘bĕnh tơdrong ‘mêm đơ̆ng Kră Yang Yêsu Krist đơ̆ng chăl arih inh. Yua anăn Kră Yang Yêsu Krist. Amen
Lu bơ̆n tơ’bôh jơ-hngơ̆m pơm kiơ̆ Khôi juăt lăm chăl arih bơ̆n thoi yơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jop 32
Kênh Youtube BHKTHN:
