I Lu Pơtao 18:36-37
“Ơ Kră Yang! Apinh Ih mơ̆ng păng tơl tơwih nơ̆r inh, wă kơ lu kon pơlei pơla ‘nâu băt kơnăl Ih bơih Kră Yang ‘Bok Kei-Dei păng gô pơm kơ jơhngơ̆m lu sư wih tơ Ih.” (I Lu Pơtao 18:37)
Nơ̆r jet tơchĕng pơwao:
– Tơdrong Êli ‘bok khan lê̆ adrol đei tơdrong pơlong thoi yơ păng đei yua liơ liơ?
– Nơ̆r sư krao khan bơ̆n ‘bôh tơdrong kăl tơm ‘noh yă kiơ?
– Lu bơ̆n pơhrăm rok kơmĭl krao khan đơ̆ng Êli ‘bok khan lê̆ adrol ‘noh thoi yơ?
Chăl arih đei đon lui păng krao khan đơ̆ng Êli ‘bok khan lê̆ adrol ling lang đei tơdrong pơlong păng rim năr rai dêh. Sơ̆p hla bơar ‘Bok Kei-Dei đei chih roi lơ nơ̆r sư krao khan đei Kră Yang tơl tơwih mă phara ‘biơ̆. “Mă khan ‘bok Êli bơngai rơdu tơrăn thoi lu bơ̆n.” mălei nơ̆r sư krao khan gah đei phang ang pêng sơnăm minh puăt (I Lu Pơtao 17:1; Yakơ 5:17) ‘noh pơtơm blŭng a wă kơ ‘blŏk kơ tơdrong jang sư. Pơtrơp dơ̆ng, Kră Yang ăn tơdrong pơlong rai tih hloh dơ̆ng, krao khan apinh ăn kơ kon drŏnglo yă adro tơ pơlei Sarepta gơh iung arih (I Lu Pơtao 17:20-22). Kră Yang tơl tơwih nơ̆r sư krao khan wă kơ oei yua sư lăm tơdrong jang tih hloh dơ̆ng. ‘Noh jơ̆ kơplah Êli ‘bok khan lê̆ adrol mă tơblah hăm jơhngơ̆m pran hăm pơtao Ahap păng puăn hrĕng pơđăm jĭt ‘nu khan lê̆ adrol gah ‘Baal păng puăn hrĕng ‘bok khan lê̆ adrol gah Atartê. ‘Bơ̆t tơm măt lu pơtao păng lu kon pơlei, sư pơyơ̆r krao khan păng đei yua ‘noh jơ̆ kĕ jei yua kơ Anăn Kră Yang, kon pơlei Kră Yang wih kơkuh kơ Kră Yang.
Lăm nơ̆r krao khan apinh Kră Yang soi tơmam soi ‘buh, lu bơ̆n ‘bôh lu tơdrong kăl dêh. Mă minh, ‘bok Êli yua Anăn Yêhôwa, wă khan Kră Yang Arih ling lang, jơ̆ anăn mă Kră Yang ‘Bok Kei-Dei đei tơ’bôh ăn kơ ‘Bok Môis wă tơ’blŏk ăn tơdrong pơgơ̆p Kră Yang hăm lu ‘bok kơdră Abraham, Ysăk păng Jakôp, Kră Yang arih ling lang wei răk nơ̆r pơkă hăm lu sư. Kră Yang jơ̆ oei “Kră Yang ‘Bok Kei-Dei lăm Isơrael” mă khan lu sư hiơt kơ Kră Yang, achăng lê̆ sư na kơkuh kơ rup yang. Mă ‘bar, ‘Bok Êli pơma dơnuh hăm Kră Yang “inh jơ̆ bơngai đĭch đam Ih” sư wă pơma tơ’bôh kơ lơ bơngai băt mă khan sư ‘noh ‘bok khan lê̆ adrol đei pơm lơ tơdrong mơsêh mălei sư ‘noh jơ̆ minh ‘nu đĭch đam Kră Yang ưh kơ yua kiơ, sư ling lang chu yom pơm kiơ̆ thoi Kră Yang wă lăp đon păng sư wă kơ rim ‘nu bơngai băt hlôh kơ Kră Yang bơih pơgơ̆r păng wei rong kon pơlei Sư. Mă pêng, tơdrong kơnhăm lăm tơdrong sư krao khan noh wă kơ “Kon pơlei âu ‘bôh băt kơ Kră Yang Yêhôwa jơ̆ ‘Bok Kei-Dei păng sư pơm ăn kơ jơhngơ̆m lu sư gô wih brŏk” wă kơ lu sư gơh klaih, gơh đei pŭn hiôk đơ̆ng Kră Yang ăn. ‘Bok Êli ưh kơ pơang gah tơdrong jang khan lê̆ adrol, mălei sư ling lang băt sư kơdih jơ̆ đĭch đam awih awăn kiơ̆ thoi Kră Yang lăp đon, yua kơ anăn Kră Yang păng kơnhăm tôch ai lăm tơdrong krao khan wă kơ lơ bơngai băt kơ Kră Yang ưh kơ wă băt kơ sư kơdih, tuch luch đei yua noh Kră Yang mơ̆ng nơ̆r sư krao khan.
Pơhrăm rok kơmĭl ‘bok Êli krao khan, lu bơ̆n athei krao khan hăm jơhngơ̆m đon tơ jur akâu kơdih, lui gơnang kơ Kră Yang păng athei ‘blŏk Kră Yang mơ̆ng nơ̆r krao khan yua Anăn Sư, kiơ̆ thoi Sư lăp đon, Dêh char Sư păng yua kơ Kră Yang iơ̆m dim ‘mêm mơnat kơ lu bơ̆n. Băt tơpă tơdrong âu gô tơgŭm lu bơ̆n krao khan kiơ̆ thoi tơdrong tơchĕng Kră Yang păng Kră Yang tơl tơwih nơ̆r krao khan.
Ơ ‘Bă lu nhôn oei tơ plĕnh ti. Apinh Ih tơgŭm inh ‘nĕ kơ krao khan kiơ̆ kơdih wă mălei wă kơ krao khan đei jơhngơ̆m wă kơ Anăn Ih jing ư-ang, Dêh char Ih gơh tĕnh truh, tơdrong tơchĕng Ih gơh jing mă tơ teh âu kư̆m thoi tơ plĕnh ti, yua anăn Yêsu Krist, Amen!
Lu bơ̆n hăm krao khan yua kơ Anăn Kră Yang wă kơ rim ‘nu bơngai băt păng ‘mêm yom kơ Kră Yang rai hloh ưh?
Đŏk Sơ̆p hla bơar ‘Bok Kei-Dei lăm pêng sơnăm: Hơriso 35-36
Kênh Youtube BHKTHN:
