Klei Aê Diê Blŭ: Klei Mphŭn Dơ̆ng 7:1-24
Êlan kliăng: “Yêhôwa bi rai jih jang mnơ̆ng hdĭp ti rŏng lăn ala, mnuih, hlô mnơ̆ng, mnơ̆ng êbat ban, leh anăn čĭm čap hlăm adiê; diñu rai luč jih ti lăn ala. Ăt dôk knŏng Y-Nôê leh anăn phung dôk mbĭt hŏng ñu hlăm kŭmpăn” (Klei Mphŭn Dơ̆ng 7:23)
Klei êmuh ksiêm mĭn: Si klei lač kơ hnơ̆ng kơ klei bi kmhal? Hlei pô mâo Aê Diê bi mtlaih leh anăn si klei diñu mâo klei bi mtlaih? Ya ngă Aê Diê bi mtlaih diñu? Ya drei srăng ngă čiăng đru kơ phung riêng gah pô ti anăp klei Aê Diê bi kmhal?
Tơdah klei soh lar hlăm lăn ala, Aê Diê čuăn leh bi rai jih lăn ala hŏng klei êa lip. Gưl êa lip anei amâo djŏ knŏng hlăm dŭm anôk đuč ôh ƀiădah jih gưl êa lip kluôm lăn ala, sa gưl êa lip ktang kngăm jih lăn ala, wăt čŏng čư̆ dlông hĭn, ngă kơ jih jang mnơ̆ng hdĭp djiê mngăt jih (êlan 19-23). Dưi lač anei jing gưl bi kmhal ktang snăk, amâo mâo hlei pô dưi tlaih ôh.
Ƀiădah mâo đa đa mnuih dưi tlaih. Êlan 7 brei thâo: “Y-Nôê mŭt hlăm kŭmpăn mbĭt hŏng phung anak êkei ñu, mô̆ ñu, leh anăn phung mtâo mniê ñu,”. Mbĭt hŏng gŏ sang 8 čô anei jing dŭm mta hlô mnơ̆ng ti lăn ala hlue si hlâo mdua mdua (êlan 8-9). Aê Diê kriê pioh klei hdĭp anak mnuih leh anăn dŭm mta hlô mnơ̆ng čiăng kơ Ñu mjing sa lăn ala mrâo leh gưl bi kmhal. Aê Diê bi mtlaih diñu mơ̆ng klei bi kmhal hŏng klei brei diñu mdăp hlăm kŭmpăn. Klei Aê Diê Blŭ brei thâo leh mnuih leh anăn hlô mnơ̆ng mâo ruah mŭt leh hlăm kŭmpăn snăn “Yêhôwa kđăl ƀăng bhă” (êlan 16). Aê Diê jing Pô bi mtlaih leh anăn răng kriê klei hdĭp kơ phung Ñu ruah.
Klei Aê Diê Blŭ lŏ čih Klei Aê Diê lač hŏng Y-Nôê: “Mŭt bĕ hlăm kŭmpăn mbĭt hŏng jih gŏ sang ih, kyuadah kâo ƀuh ih kpă ênô ti anăp kâo đơ phung mnuih ênuk anei” (êlan 1). Aê Diê bi mtlaih Y-Nôê leh anăn jih gŏ sang ñu kyua Ñu ƀuh gơ̆ jing mnuih “kpă ênô”. Ƀiădah klei phŭn Y-Nôê jing mnuih kpă ênô ti anăp Aê Diê jing klei đăo, msĕ si Klei Aê Diê Blŭ hlăm Hêbrơ 11:7 brei thâo: “Hŏng klei đăo Y-Nôê gưt leh anăn ngă sa boh kŭmpăn čiăng bi mtlaih sang ñu, leh Aê Diê hưn kơ ñu kơ klei srăng truh ka arăng tuôm ƀuh ôh. Hŏng klei ngă snăn ñu phat kđi lăn ala leh anăn jing pô dưn klei kpă ênô truh kyua klei đăo”. Jing mnuih hdĭp ti lăn ala, klă sĭt Y-Nôê amâo jing mnuih kluôm ênŭm ôh. Klei kpă ênô ñu “hriê mơ̆ng klei đăo” leh anăn klei đăo anăn bi êdah hlăm bruă ñu jih ai tiê mpŭ leh anăn hdĭp gưt asăp kơ Aê Diê.
Grăp čô mnuih ti lăn ala soh jhat sơăi leh anăn jih jang năng tŭ klei bi kmhal sơăi. Ƀiădah bi mni kơ Aê Diê kyua klei pap Ñu, Aê Diê brei klei pap brei leh anăn bi mtlaih hlei pô dưm klei đăo hlăm Khua Yang Yêsu. Leh anăn Khua Yang čiăng kơ phung mâo klei bi mtlaih brei hiu hưn klei Klei Mrâo Mrang Jăk kơ klei bi mtlaih Ñu brei kơ lăn ala čiăng kơ diñu ăt dưi tlaih mơ̆ng bi kmhal knhal tuč.
Drei ƀuăn rơ̆ng hdĭp hŏng si hdră êlan, čiăng bi êdah ai tiê hdơr knga kơ Khua Yang kyua dưi tlaih mơ̆ng klei bi kmhal?
Wah lač: Ơ Khua Yang, kâo thâo kâo mâo klei soh leh anăn năng tŭ klei bi kmhal. Ƀiădah kyua klei pap Ih, kyua klei đăo hlăm Khua Yang Yêsu, kâo mâo klei bi mtlaih mơ̆ng klei bi kmhal huĭ hyưt. Akâo kơ Ih đru kâo hdĭp grăp hruê năng hŏng klei bi mtlaih, leh anăn amâo mdei hiu hưn klei pap anăn kơ phung ka thâo kral Ih.. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
