Klei Aê Diê Blŭ: Galati 6:1-5
Êlan kliăng: “Đru bi gui klei ktrŏ hdơ̆ng diih, snăn bi sĭt klei bhiăn Krist” (Galati 6:2).
Klei êmuh ksiêm mĭn: Si klei jing mnuih mâo Yang Mngăt Jăk? Si klei mkra sa čô lĕ hlăm klei soh hŏng klei êdu êun? Ya klei Khua Yang mtô kơ bruă klam bi gui klei ktrŏ hdơ̆ng găp? Si klei mdê “gui” hlăm êlan 5 hŏng “gui” hlăm êlan 2? Si klei drei ngă leh tui si klei Khua Yang mtô?
Hră čih Galati kñăm kơ klei yap kpă kyua klei đăo, amâo djŏ kyua bruă ngă ôh. Hlăm kdrêč 5, khua ƀĭng kna Y‑Pôl hưn mdah klei mdê ti krah bruă mơ̆ng kđeh hŏng boh mơ̆ng Yang Mngăt Jăk leh anăn mtă mtăn kơ phung đăo “Brei Yang Mngăt Jăk kiă kriê klei hdĭp diih leh anăn diih amâo srăng bi mơak kơ klei kđeh čiăng ôh” (Galati 5:16). Mơ̆ng kdrêč 6, ñu mă yua klei sĭt nik anei kơ klei hdĭp sĭt hlăm Phung Sang Aê Diê.
Êlan 1 lač kơ bruă čuăn čiăng đru phung anak Aê Diê dôk lĕ hlăm klei soh. Pô đru brei “mâo Yang Mngăt Jăk”, brei jing mnuih khue prŏng hlăm klei đăo bi êdah hŏng klei hdĭp đup gưt kơ Khua Yang. Pô anei nao bi tuôm hŏng mnuih lĕ hlăm klei soh hŏng klei luă gŭ, msĕ si rup bi hmô Khua Yang Yêsu rao jơ̆ng kơ phung ƀĭng kna Ñu (Y‑Yôhan 13:13-15). “Mkra brei ñu wĭt ngă djŏ” hlue si klei blŭ phŭn jing boh hră yua hlăm klei mdrao gŭn čiăng mkra klang joh amâodah kliăng atŭt klang ktlaih, đru bi wĭt msĕ si yang đar, msĕ snăn mơh, bruă kñăm kơ drei jing kăp đru mnuih tăm lĕ hlăm klei soh, brei lui hĕ klei soh jhat, lŏ wĭt kơ klei hdĭp huĭ mpŭ kơ Khua Yang. Klei Aê Diê Blŭ ăt mtă êlâo brei răng kơ drei pô msĕ mơh, kyuadah amâo mâo ôh pô klei soh “amâo dưi mŭt kma”, “Snăn hlei pô mĭn ñu dôk dơ̆ng, brei ñu răng huĭdah ñu srăng lĕ buh” (I Kôrantô 10:12).
Êlan 2 lač kơ bruă klam kah mbha đru bi gui klei ktrŏ hdơ̆ng găp. Gui klei ktrŏ jing gui klei dleh, klei kpĭ ktư̆ êgao đei kơ yang đar hlăm lu kdriêk klei hdĭp klei mĭn, asei mlei amâodah mngăt ai tiê. Êngao kơ klei wah lač brei, drei bi êdah klei khăp hŏng bruă ngă sĭt êmĭt msĕ si đru čuă čhưn, bi juh, bi mđĭ ai, đru prăk kăk… Gưt ngă tui si klei mtă klei khăp Khua Yang Yêsu mtô jing ngă ênŭm leh klei bhiăn Ñu (Y‑Mathiơ 22:37-40).
Êlan 3-5, khua ƀĭng kna Y‑Pôl mtă mtăn đăm bi msĕ drei pô hŏng mnuih mkăn ôh huĭdah jing mgao, ƀiădah brei ksiêm dlăng drei pô hŏng Khua Yang. Kyuadah grăp čô mâo sơăi bruă Khua Yang jao mbĭt hŏng bruă klam mdê mdê brei gui. Hlue si klei blŭ phŭn “gui” hlăm êlan 2 jing gui klei ktrŏ; bi hlăm êlan 5 jing klei gui hdjul Khua Yang jao (Y‑Mathiơ 11:30). Hlăm klei hdĭp ênuk êdei, grăp čô srăng hưn mdah sơăi ti anăp klei Krist phat kđi jih bruă Khua Yang jao kơ pô, amâo bi msĕ hŏng bruă pô mkăn ôh (II Kôrantô 5:10). Grăp čô phung đăo brei bi leh ênŭm bruă klam Khua Yang jao, mđrăm hŏng klei đru bi gui klei ktrŏ mbĭt hŏng phung anak Aê Diê dôk găn klei dleh dlan, msĕ si đơ kdrêč hlăm sa asei mlei mđing uêñ bi đru hdơ̆ng găp (I Kôrantô 12:25-26). Đru bi gui klei ktrŏ hdơ̆ng găp, bi kơrŭ hdơ̆ng găp hlăm klei đăo leh anăn hlăm klei hdĭp jing klei myun brei drei hriăm mjuăt hlăm klei bi mguôp, bi đru phung anak ƀuôn sang Aê Diê mđrăm mbĭt thâo kral klei Khua Yang khăp leh anăn bi mguôp sĭt klă hŏng ayŏng amai adei hlăm klei đăo.
Si ngă drei mđing uêñ bi đru gui klei ktrŏ hdơ̆ng găp hlăm Phung Sang Aê Diê leh mơ̆?
Wah lač: Ơ Yang Mgăt Jăk Aê Diê, akâo Ih đru kâo mâo klei dưi leh anăn klei thâo mĭn čiăng dưi bi leh ênŭm bruă Khua Yang jao, wăt dưi đru ba klei tŭ dưn kơ ayŏng amai adei mkăn êjai digơ̆ tuôm hŏng klei dleh dlan. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 66:1-20; 67:1-7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
