Kalatias 6:1-5
Nqe cim:
“Nej yuav tsum sib pab ris nra, yog nej ua li ntawd thiaj yog nej coj raws li Yexus Khetos txoj kevcai”(nqe 2).
Lus nug rau sawvdaws xav:
– Zoo licas thiaj li yog tus neeg muaj kev ntseeg?
– Vim licas yuav tsum ua tib zoo ntuas tus neeg ua txhaum?
– Tus Tswv qhia licas txog lub luag haujlwm sib pab ris nra?
– Lo lus “nyias ris nyias lub nra” hauv nqe 5 txawv lo lus “sib pab ris nra” hauv nqe 2 zoo licas?
– Koj twb ua raws li tus Tswv Txojlus qhia no licas lawm?
Tsab ntawv Kalatias hais txog tus neeg ncaj ncees yog tus uas ntseeg xwb tsis yog ua haujlwm. Hauv tshooj 5, Timthawj Paulus hais txog qhov sib txawv ntawm tus neeg cia lub siab kav thiab cia Vaj Ntsujplig kav, Paulus ntuas cov ntseeg hais tias “nej yuav tsum cia Vaj Ntsujplig kav nej lub neej, nej tsis txhob cia nej lub siab kav nej ib zaug li” (Kalatias 5:16). Hla mus rau tshooj 6, Paulus qhia siv qhov uas cia Vaj Ntsujplig kav lub neej nyob hauv Pawg Ntseeg.
Nqe 1 hais txog lub luag haujlwm pab Vajtswv cov menyuam uas tau ua txhaum. Tus neeg pab yuav tsum yog tus “muaj kev ntseeg”, tus neeg uas kev ntseeg loj hlob qhia tawm los ntawm kev ua neeg mloog tus Tswv lus. Tus neeg no mus ntuas tus neeg txhaum los ntawm kev txo hwjchim, zoo li Tswv Yexus ntxuav cov thwjtim kotaw (Yauhas 13:13-15). “Ntuas…kom rov qab los ua zoo”, raws li lub ntsiab hauvpaus lus ces lo lus no yog hais raws li seem kws kho mob, uas yog kho tej pobtxha lov lossis txawv kom rov qab dhos zoo li qub, kuj ib yam li ntawd, lub homphiaj peb pab tus neeg uas tau ua txhaum tso kev txhaum tseg kom lawv tig rov qab los ntseeg zoo li qub. Vajtswv Txojlus kuj ceebtoom kom yuav tsum ceevfaj peb tus kheej, vim kev txhaum tsis xaiv leejtwg li, “Yog leejtwg xav hais tias nws twb sawv khov kho lawm, nws yuav tsum ceevfaj nyob tsam nws ntog” (I.Kauleethaus 10:12).
Nqe 2 hais txog lub luag haujlwm sib pab ris nra. Lub nra hnyav yog tej kev txomnyem, kev nyuaj siab ua rau qaug zog sab nqaij tawv lossis sab ntsujplig. Dua li qhov kev taij thov Vajtswv pab, peb yuav tau qhia tawm txojkev hlub los ntawm qhov peb ua haujlwm tshwm xws li mus ncig xyuas, txhawb zog, nplig siab, pab nyiaj txiag… Ua tau raws li nqe kevcai hlub lwm tus uas Tswv Yexus qhia ces yog ua tiav txoj kevcai (Mathais 22:37-40).
Nqe 3-5, Timthawj Paulus ntuas kom tsis txhob muab yus piv rau lwm tus nyob tsam yus khavtheeb, tiamsis cia li ua tib zoo saib yus tso. Vim txhua tus neeg puavleej tau tus Tswv muab nyias muaj nyias ib tes haujlwm ua. Raws li hauvpaus lus, lo lus “ris nra” hauv nqe 2 yog lub nra hnyav; tiamsis lo lus “lub nra” hauv nqe 5 yog lub nra sib uas tus Tswv muab rau peb (Mathais 11:30). Lub neej yav tom ntej, txhua tus tibneeg puavleej yuav mus sawv tabmeeg Yexus Khetos qhia tej haujlwm uas tus Tswv muab rau yus ua, tsis muab piv rau lwm tus tes haujlwm (II.Kauleethaus 5:10). Txhua tus ntseeg yuav tsum ua kom tiav lub luag haujlwm tus Tswv muab, thiab pab Vajtswv cov menyuam ris nra thaum ntsib kev txomnyem zoo li tej tes taw hauv lub cev sib pab ua haujlwm (I.Kauleethaus 12:25-26). Sib pab ris nra, ib leeg txhawb ib leeg hauv txojkev ntseeg thiab lub neej yog lub zoo sijhawm rau peb xyaum tus cai tswj hauv txojkev koom ua ke, ua kom cov ntseeg paub txog tus Tswv txojkev hlub thiab muaj kev sib raug zoo hauv cov kwvtij ntseeg Yexus.
Koj puas sib pab ris nra nyob hauv Pawg Ntseeg lawm tau?
Thov Vajtswv,
Vaj Ntsujplig, nyuam yaus thov Koj pub lub zog thiab lub tswvyim kom nyuam yaus ua tiav lub luag haujlwm uas tus Tswv muab, tsis tas li xwb thov Koj pab kom nyuam yaus ua tau ib tug neeg pab tau cov ntseeg thaum muaj kev txomnyem. Amees.
Nyeem Vajluskub hauv peb lub xyoo: Phau Ntawv Nkauj 66:1-67:7
Tshooj Youtube BHKTHN: https://www.youtube.com/c/bhkthn
