Klei Aê Diê Blŭ: Y-Mathiơ 24:43-44
Êlan kliăng: “Snăn răng bĕ, kyuadah diih amâo thâo ôh ya hruê Khua Yang diih srăng hriê.” (Y-Mathiơ 24:42)
Klei êmuh ksiêm mĭn: Khua Yang Yêsu bi hmô hŏng rup pô sang dôk răng kơ mnuih knĕ čiăng bi hriăm kơ ya klei? Boh blŭ “dôk răng” brei ƀuh Khua Yang Yêsu čiăng phung ƀĭng kna Ñu hdĭp hŏng si ai tiê? Ya klei hlăm klei hdĭp mplư drei luč klei čang hmăng?
Khua Yang Yêsu lŏ yua klei bi hmô ênưih thâo săng snăk čiăng hưn êlâo kơ klei hñăr kơ klei Ñu srăng lŏ hriê. Amâo mâo ôh sa čô mnuih knĕ hưn êlâo kơ hdră ñu srăng nao tlĕ. Ƀiădah lĕ, kyua hŏng klei đing, pô sang mtrưm êlâo leh hbĭl pô knĕ srăng hriê čuă sang, sĭt nik pô sang amâo srăng pĭt ôh ƀiădah dôk răng jih sa mlam kăp răng kơ mnuih knĕ. Leh yăl dliê klei bi hmô anei, Khua Yang Yêsu lač kơ phung ƀĭng kna: “Kyuanăn brei diih dôk răng msĕ mơh; kyuadah Anak Mnuih srăng hriê êjai mông diih amâo mĭn ôh” (êlan 44). Tinei, Khua Yang amâo bi msĕ Ñu pô hŏng mnuih knĕ ôh, ƀiădah Ñu čiăng kñăm kơ klei hñăr. Hruê Ñu lŏ hruê truh hñăr msĕ si mnuih knĕ ƀoh mtih sang mŭt tlĕ êjai mlam anăn yơh. Kơ êdei, Khua ƀĭng kna Y-Pôl leh anăn Khua ƀĭng kna Y-Pêtrôs ăt lŏ yua klei bi hmô anei mơh čiăng mtô kơ phung đăo thâo kơ hruê mmông Khua Yang lŏ hriê: “Kyuadah diih pô thâo klă leh kơ Hruê Khua Yang srăng truh msĕ si sa čô knĕ êjai mlam” (I Têsalônik 5:2); “Ƀiădah Hruê Khua Yang srăng truh msĕ si sa čô knĕ” (II Y-Pêtrôs 3:10).
Êlâo tinăn, Khua Yang Yêsu hưn êlâo leh mơh kơ klei srăng truh êlâo kơ hruê Ñu lŏ hriê (Y-Mathiơ 24:1-42). Dlăng kơ jih jang klei truh hlăm lăn ala, wăt tơdah phung đăo amâo thâo klă ôh kơ hruê mmông Khua Yang lŏ hriê, ƀiădah brei drei thâo sĭt nik Khua Yang srăng lŏ hriê leh anăn hruê Ñu lŏ hriê giăm truh leh, kyuanăn brei drei dôk răng. Boh blŭ “dôk răng” hlăm klei Khua Yang Yêsu yăl dliê bi hmô brei ƀuh kơ klei pô sang čŏng čiăng dôk guôn tơdah thâo kơ mnuih knĕ srăng hriê tlĕ ti sang ñu. Khua Yang ăt čiăng phung ƀĭng kna dôk răng nanao mơh kăp guôn hruê Ñu lŏ hriê, kyuadah Khua Yang brei digơ̆ thâo êlâo leh klei bi knăl kơ hruê Ñu lŏ hriê.
Phung drei hruê anei msĕ mơh brei drei dôk răng nanao, đăm brei ôh klei mplư djiêô gah mjum drei pĭt leh anăn bi wơr hĕ klei kñăm čiăng kơ klei hdĭp drei jing dôk guôn Khua Yang Yêsu lŏ hriê. Tăp năng klei tui hlue Khua Yang sui thŭn leh ngă kơ drei knang kơ klei đăo drei pô, amâo mâo mđing, kƀah klei răng leh anăn amâo dôk răng ôh. Hdơr bĕ yang jhat mâo lu mnêč čiăng mplư leh anăn mjum drei pĭt. Khua ƀĭng kna Y-Pôl mtă: “Đăm brei Satan dưi hŏng drei; kyuadah drei thâo leh klei ñu čiăng ngă” (II Kôrantô 2:11). Brei drei jing êngal ti anăp klei mplư brei khăp kơ lăn ala, phưi tha klei hdĭp drei pô si čiăng jing leh anăn đing kơ klei Khua Yang lŏ hriê. Jih jang klei anăn srăng bi wơr drei kơ klei dôk răng kăp guôn hruê Khua Yang lŏ hriê. Brei drei dôk răng nanao, “brei diih hyuă hdrăng kơiêng, leh anăn brei pui kđen diih dôk trơ̆ng nanao” (Y-Luk 12:35)
Si drei dôk răng kăp guôn hruê Khua Yang Yêsu lŏ hriê?
Wah lač: Ơ Khua Yang khăp, đru kâo hdĭp hŏng klei thâo răng nanao kơ hruê Ih lŏ hriê čiăng kơ kâo dưi dôk mbĭt hŏng Ih hlăm anôk jăk mơak hlŏng lar. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Nêhêmi 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
