Klei Aê Diê Blŭ: Bruă Lêwi 25:1-7; 18-22
Êlan kliăng: “Knang bĕ kơ Yêhôwa leh anăn ngă klei jăk; dôk bĕ hlăm čar leh anăn hdĭp hŏng klei sĭt suôr Ñu.” (Klei Mmuñ Hđăp 37:3)
Klei êmuh ksiêm mĭn: Si klei Aê Diê mtô phung ƀuôn sang kơ klei bhiăn thŭn Sabat? Ya klei phung ƀuôn sang Aê Diê srăng thâo kral tơdah đăo knang kơ Aê Diê? Si phung anak ƀuôn sang Aê Diê anei mă yua klei bhiăn anei hruê anei?
Êlâo kơ phung ƀuôn sang Israel mŭt hlăm Čar Aê Diê Ƀuăn, Aê Diê lač kơ Y-Môis ti dlông čư̆ Sinai čiăng mtă mtăn kơ phung ƀuôn sang Israel kơ klei bhiăn thŭn Sabat. Phung ƀuôn sang Aê Diê brei hdơr djă pioh klei bhiăn thŭn Sabat čiăng brei lăn dưi mdei leh anăn čiăng brei diñu thâo knang kơ Khua Yang. Grăp năm thŭn buh pla, truh thŭn tal kjuh brei lăn mdei, phung anak ƀuôn sang Aê Diê amâo dưi buh pla, khăt mkra ana boh, puôt wiă ôh. Jih jang boh mơ̆ng lăn čăt hjăn hlăm thŭn tal kjuh pioh yua jing mnơ̆ng ƀơ̆ng huă kơ phung ƀuôn sang, kơ phung hlŭn êkei mniê, kơ dĭng buăl mưn, kơ phung dôk jưh bhiâo, kơ hlô mnơ̆ng rông leh anăn kơ hlô dliê dôk hlăm lăn (êlan 2-7).
Snăn, hlăm thŭn Sabat, jing thŭn tal kjuh, anak mnuih, hlô mnơ̆ng rông, leh anăn lăn brei dôk mdei. Tơdah lăn amâo mâo mmông mdei ôh srăng jing sah, khăng, ana kyâo hrip jih mnơ̆ng ƀơ̆ng jăk, mnơ̆ng hdĭp tŭ dưn bi jăk lăn amâo hmao đĭ hriê kơ prŏng pioh bi mjing lăn jing jăk ôh. Bruă brei lăn dưi mdei đru lăn mâo mmông mgaih ksul, snăn boh wiă srăng đĭ lu hĭn.
Tơdah Aê Diê čuăn klei bhiăn Sabat brei lăn mdei hlăm thŭn tal kjuh, Ñu mprăp êlâo leh mnơ̆ng ƀơ̆ng huă kơ phung ƀuôn sang Ñu hlăm thŭn tal năm (êlan 21). Hlăm thŭn tal năm, diñu buh pla, Khua Yang srăng hơêč hmưi kơ diñu mâo mnơ̆ng ƀơ̆ng huă kơ jih thŭn tal năm leh anăn djăp mnơ̆ng ƀơ̆ng huă wăt kơ jih thŭn tal kjuh, tơdah diñu djă pioh klei bhiăn Sabat kơ lăn, leh anăn tơl djăp truh kơ thŭn tal sapăn mơh. Thŭn tal sapăn diñu dơ̆ng lŏ wĭt buh pla, tơdah truh mmông puôt wiă srăng mâo djăp mnơ̆ng ƀơ̆ng huă kơ jih thŭn tal duapăn (êlan 21-22).
Tơdah phung ƀuôn sang Israel đăo knang kluôm dhuôm kơ Khua Yang leh anăn djă pioh klei bhiăn Ñu mtă, snăn diñu srăng bi knal klei Khua Yang thiê brei kơ diñu. Aê Diê jing Pô sĭt suôr, Ñu djă pioh klei Ñu ƀuăn leh. Klei bhiăn Khua Yang čuăn kơ thŭn Sabat brei ƀuh Ñu jing kpă ênô leh anăn klei khăp. Khua Yang jing Pô Hrih Mjing, Ñu hrih mjing jih jang mnơ̆ng leh anăn anak mnuih. Ñu mđing uêñ kơ anak mnuih leh anăn wăt lăn, hlô mnơ̆ng rông čiăng mâo klei dôk mdei.
Khua Yang “Yêsu lač kơ digơ̆, “Aê Diê mjing hruê sabat pioh kơ mnuih, amâo djŏ ôh mjing mnuih pioh kơ hruê sabat.” (Y-Markôs 2:27). Klei bhiăn thŭn Sabat kluôm dhuôm kyua pioh klei tŭ dưn kơ anak mnuih. Ênguôt êdi hruê anei anak mnuih amâo djă pioh klei bhiăn klei mdei ƀiădah yua jih ai hnơ̆ng mâo mơ̆ng jih jang mnơ̆ng, mjhua klei yua lăn, hlô mnơ̆ng rông leh anăn ai mnuih msĕ mơh. Phung anak Aê Diê brei đăo knang kluôm dhuôm kơ Khua Yang čiăng djă pioh klei bhiăn Ñu. Khua Yang ƀuăn leh: “Kyuanăn brei diih ngă tui hlue klei bhiăn Kâo, leh anăn djă pioh klei Kâo mtă leh anăn ngă tui hlue digơ̆; snăn yơh diih srăng dôk hlăm čar hŏng klei hơĭt.” (êlan 18).
Si ngă drei đăo knang kơ Khua Yang hŏng jih ai tiê leh anăn čiêm rông drei hŏng klei sĭt suôr Ñu mơ̆?
Wah lač: Ơ Khua Yang, brei kơ hmei mnơ̆ng ƀơ̆ng huă djăp kơ grăp hruê. Brei kâo jih ai tiê đăo knang kơ Khua Yang, djă pioh klei bi knar hlăm klei hdĭp leh anăn gưt ngă tui si klei Ih mtă, čiăng kơ kâo thâo kral klă mngač klei sĭt suôr leh anăn klei Khua Yang thiê brei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
