Levis Kevcai 25:1-7; 18-22
Nqe cim:
“Cia siab rau tus TSWV thiab ua zoo, yog nej ua li ntawd, nej yuav nyob hauv lub tebchaws tso siab lug” (Ntawv Nkauj 37:3)
Lus nug rau sawvdaws xav:
– Vajtswv qhia cov Yixalayees txog kevcai xyoo xanpataus li cas?
– Vajtswv haivneeg yuav saj tau dabtsi thaum lawv tso siab rau Nws?
– Nim no Vajtswv cov menyuam siv txoj kevcai no li cas?
Ua ntej uas mus tebchaws coglus, Vajtswv hais rau Mauxes saum roob Xinais kom cob cem rau cov Yixalayees txog txoj kevcai xanpataus. Vajtswv haivneeg yuav tsum coj txoj kevcai xyoo xanpataus kom liaj teb tau so thiab lawv thiaj paub tso siab rau Vajtswv. Rau lub xyoo cog qoob loo, txog xyoo tim xya liaj teb yuav tsum tau so, Vajtswv haivneeg tsis tau cog qoob loo, tsis tau tav, tsis tau mus sau. Tej qoob tuaj hauv liaj teb tuaj, lossis txi xyoo tim xya cia rau tej pejxeem, tub qhe, ntxhais qhev, cov tub zog, cov neeg txawv tebchaws, tsiaj txhu kab noog hauv av tau noj. (nqe 2-7).
Yog li ntawd, hauv xyoo xanpataus uas yog xyoo tim xya, tibneeg, tsiaj txhu thiab liaj teb cheem tsum tau so. Yog liaj teb tsis muaj sijham so av yuav ntxaug, tawv, tej qoobloo nqug tej zoo av tas, tej nyuag kab hauv av ua tsis yeej rov qab rau tej av rog. Qhov uas cia liaj teb so ua rau tej av rov zoo tuaj, cog yuav sau tau qoobloo ntau dua.
Thaum uas Vajtswv teem muaj kevcai xanpataus rau liaj teb tau so xyoo tim xya, Vajtswv twb npaj txhij qoobloo rau Nws haivneeg xyoo tim rau lawm(nqe 21). Hauv lub xyoo tim rau, lawv cog qoobloo, Vajtswv pub rau lawv muaj zaub mov noj rau xyoo tim rau, thiab kuj txaus noj rau xyoo tim xya, yog hais tias lawv coj raws li txoj kevcai xanpataus tseem txaus noj rau xyoo tim yim thiab. Xyoo tim yim lawv rov tau cog qoobloo ntxiv, thiab tsuas yog sau los rau xyoo tim cuaj noj lawd xwb (nqe 21-22).
Yog hais tias Vajtswv haivneeg tso siab plhuav rau Nws thiab coj raws li tej kevcai uas Nws qhia ces lawv yuav tau saj Vajtswv kev pab. Vajtswv yog Tus ncajncees Nws ibtxwm ua li Nws coglus. Txoj kevcai uas Vajtswv teem rau xyoo tim xya qhia pom Vajtswv yog tus ncajncees thiab muaj kev hlub tiag tiag. Vajtswv yog Tus tsim ib puas tsav yam thiab tibneeg. Nws pom txog kev cheem tsum tau so ntawm tibneeg, liaj teb, thiab tsiaj txhu.
Tswv Yexus hais tias “Vajtswv tsim Hnub Xanpataus rau neeg, tsis yog tsim neeg rau Hnub Xanpataus” (Malakaus 2:27). Kevcai xyoo xanpataus puavleej yog vim muaj nqi rau tibneeg. Tu siab ntau uas niaj hnub nim no tibneeg tsis coj txoj kevcai so no lawd, tiamsis tseem muab txhua yam los siv kawg zog, tsis hais liaj teb, tsiaj txhu thiab tagnrho tibneeg. Vajtswv cov menyuam yuav tsum ua neej tso siab plhuav rau Nws, coj raws li Nws txoj kevcai, faib sib npaug kev ua haujlwm thiab kev so. Vajtswv coglus: “Nej yuav tsum ua raws li tus TSWV tej kevcai thiab tej lus samhwm, nej thiaj yuav tau zoo nyob kaj siab lug hauv nej lub tebchaws” (nqe 18).
Thov Vajtswv,
Vajtswv, thov pub rau nyuam yaus muaj mov noj hnub no, thov pab nyuam yaus tso siab plhuav rau Koj, txawj faib sib npaug rau kev ua haujlwm thiab kev so, coj raws li koj txoj kevcai kom saj tau Koj txoj ncajncees thiab kev pab meej tseeb. Nyuam yaus tuav Tswv Yexus Khetos lub npe thov, Amees.
Peb puas tso siab plhuav rau Vajtswv thiab yug yus los ntawm Vajtswv txoj kev ncajncees?
Nyeem Vajluskub hauv peb lub xyoos: Tes Haujlwm 26
Kênh Youtube BHKTHN:
