Lêwi 25:1-7; 18-22
“Gơnang bĕ kơ Kră Yang păng pơm ‘lơ̆ng. Oei bĕ lăm dêh char păng oei arih lăm tơdrong ‘lơ̆ng tơpăt Sư” (Hơriso 37:3)
Nơ̆r jet tơchĕng pơwao:
– Kră Yang ‘Bok Kei-Dei bơtho kon pơlei Isơrael gah tơdrong juăt sơnăm sa ‘bat thoi yơ?
– Kon pơlei Kră Yang gô mơn đei tơdrong kiơ kơplah lui gơnang kơ Kră Yang?
– Kon pơlei Kră Yang dang ei yua iŏk tơdrong âu thoi yơ?
Adrol kơ kon pơlei Isơrael wă mơ̆t tơ Dêh Char Pơkă, Kră Yang ‘Bok Kei-Dei khan kơ ‘bok Môis tơ kơpal kông Si-nai wă bơho tơtă kơ, kon pơlei Isơrael gah tơdrong juăt sơnăm Sa’bat. Kon pơlei Kră Yang athei ‘blŏk wei răk sơnăm sa ‘bat wă kơ teh đei pơdơh păng wă kơ lu sư băt lui gơnang kơ Kră Yang. Lăm rim tơdrâu sơnăm jang, truh sơnăm mă tơpơh teh athei pơdơh, kon pơlei Kră Yang ưh kơ gơh rei pơtăm, kĕch yuă. Dôm lu găr adrĕch chăt tơ teh lăm sơnăm mă- tơpơh gơh pơm tơmam yua ăn kơ kon pơlei, ăn kơ đĭch đam drŏnglo, drŏkăn, lu bơngai cuă jang, lu bơngai tơmoi, ăn kơ sem dơrongpăng lu sem mơmŏ kơpal teh (trong2-7).
Thoi noh, lăm sơnăm sa ‘bat, wă khan lăm sơnăm mă tơpơh, kon bơngai, sem dơrong, păng lu teh kăl kơ pơdơh. Tơdah lu teh ưh kơ đei jơ’năr kơ dơh lei teh ‘bônh kơ sap, kơdăng kơdon, lu ‘long gô hiup đĭ lu tơmam pơm kơ teh jing, dôm lu tơmam mơ̆r ưh pă đei pơm kơ tmam jing dơ̆ng bơih. Tơdrong wă kơ ăn teh pơdơh noh gơh rơhơi, sư gô đei plei hloh.
Kră Yang hơgăt ăn tơdrong juăt ăn teh pơdơh lăm sơnăm mă tơpơh, Sư wă hơmet tơm mam sa hơdrol ăn kơ kon pơlei Kră Yang lăm sơnăm mă tơdrâu (trong 21). Lăm sơnăm mă tơdrâu,lu sư rei pơtăm, Kră Yang ăn pŭn hiôk kơ lu sư đei tơmam sa tôm mah dĭng truh tơ sơnăm mă tơdrâu, lu sư gô đei tơmam sa tôm mah truh tơ sơnăm mă tơpơh kơ plah lu sư wei răk khôi juăt lăm teh jang sa păng tôm mah truh tơ sơnăm mă tơhngam. Sơnăm mă tơhngam lu sư wơ̆t pơtăm rei dơ̆ng, kơplah rei yuă ‘noh jơ̆ tơmam sa tơ sơnăm mă tơsĭn (trong 21-22).
Tơdah kon pơlei Kră Yang lui gơnang lăm tôm tơdrong păng wei răk khôi juăt Sư đei bơtho pơkă lei lu sư gô mơn Kră Yang gô tơgŭm lu sư. Kră Yang ‘Bok Kei-Dei jơ̆ Tơ’ngla pơm Tơpăt, ling lang wei răk dôm nơ̆r Sư pơkă. Tơdrong juăt Kră Yang ăn lăm sơnăm Sa ‘bat wă tơ’bôh Sư Kră Yang ‘lơ̆ng tơpăt păng ‘mêm mơnat. Ktă Yang jơ̆ Tơ’ngla Pơjing, pơjing đĭ-đăng tôm tơdrong păng kon bơngai. Sư tơchĕng tơtăm tơdrong kăl yua kăl kơ đei pơdơh ăn kơ kon bơngai, ăn kơ teh păng sem dơrong.
Kră Yang Yêsu khan: “’Bok Kei-Dei pơjing năr pơdơh Sa’bat wă pơyua kon bơngai đei năr pơdơh, ưh kơsĭ Sư pơjing năr Sa’bat wă kơ kon bơngai iŏk tơdrong gleh ôh” (Markôs 2:27). Tơdrong juăt sơnăm Sa’bat sư ling-lang đei lơi yua ăn kơ kon bơngai. Mă tơpă sư sơ’ngon dêh dang ei kon bơngai ưh pă wei răk tơdrong juăt gah tơdrong pơdơh, yua đĭ tôch ai tôm tơmam, yua iŏk teh jang sa, sem dơrong păng kon bơngai. Kon pơlei Kră Yang athei lui gơnang kơ Kră Yang lăm tôm tơdrong wă kơ wei răk khôi juăt `Sư. Arih hơtŏ hơnơ̆ng sơlam bơ̆jang păng pơdơh. Kră Yang đei pơkă: “Lu iĕm athei wei răk nơ̆r Inh tơtă, wei răk khôi juăt Inh păng pơm kiơ̆, thoi noh lu iĕm gô đei hiôk hian lăm dêh lu iĕm oei “ (trong 18).
Ơ Kră Yang, apinh ăn kơ inh năr âu đei tơmam sa tôm mah , apinh Ih ăn kơ inh đĭ jơhngơ̆m lui gơnang kơ Ih, bơwei hơnơ̆ng lăm tơdrong arih păng pơm kiơ̆ nơ̆r Ih tơtă wă kơ inh mơn đei tơdrong tơpăt păng tơdrong tơgŭm đơ̆ng Ih rơđah hơđăl. Yua anăn Kră Yang Yêsu Krist, Amen.
Lu bơ̆n hăm đĭ jơhngơ̆m lui gơnang kơ Kră Yang păng bơwei bơ̆n kơdih hăm tơdrong tơpăt ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Jang 26.
Kênh Youtube BHKTHN:
