Philêmôn 17-21
17 Inh buăl ih kư̆m jang tơdrong ‘Bok Kei-Dei mơ̆n na dang ei inh wă kơ ih sơng iŏk Ônêsim hŏ, ‘noh kư̆m thoi ih sơng iŏk inh mơ̆n. 18 Dah sư ‘mơn iŏk tơmam ih, dah sư hre kơ ih tơmam kiơ, ih ‘nĕ jô̆ kơ sư hŏ. Ih jô̆ tơdrong sư ‘noh kơ inh đĕch. 19 Âu hŏ, tơ̆ng ih wă kơ sư duh kơ ih, dang ei inh chih hla bơar kơ ih păng ti inh kơdih, inh wă kơ ih băt kơ inh wă duh dŏng sư tơpă. Mă-lei ih kư̆m dang bơngai hre kơ inh mơ̆n kơlih kơ ih lui kơ Yêsu Krist đơ̆ng inh bơtho. 20 Ơ Philêmôn, ba ‘nhŏng oh yua kơ ba lui kơ Kră Yang Yêsu Krist, na dang ei ih đih sơng Ônêsim hŏ. Thoi noh inh bơnê kơ Kră Yang Yêsu Krist tơpă, na jơhngơ̆m inh kư̆m chơt hiôk. 21 Inh chih kơ ih kơthơ âu kơlih kơ inh băt kơ ih gô pơm kiơ̆ kơ dôm nơ̆r inh pơma kơ ih. Inh kư̆m băt kơ ih gô pơm ‘lơ̆ng hloh kơ nơ̆r inh pơma kơ ih.
Trong tơm ‘bai pơhrăm ‘nâu:
“Dah sư ‘mơn iŏk tơmam ih, dah sư hre kơ ih tơmam kiơ, ih ‘nĕ jô̆ kơ sư hŏ. Ih jô̆ tơdrong sư ‘noh kơ inh đĕch.” (Philêmôn trong 18)
Nơ̆r jet tơchĕng pơwao:
– ‘Bok Pôl yua iŏk hơnă tơm ayơ wă apinh Philêmôn gơh mơnat?
– Kơplah huach tơmam wă duh ‘mong ăn đêl hre kơ ‘bok Ônêsim, na ‘bok Pôl đei iŏk tơdrong kiơ?
– Lu bơ̆n chu hŭt tơdrong kiơ wă tơgŭm ‘nhŏng, mŏ oh bơ̆n pôm đon dih băl?
Kơkuh kơ đĭ đăng,
Tơdrong anat Sư lăm bơngai đĭch kơdâu klĕnh ‘noh Ônêsim păng Philêmôn tơ’ngla sư, na ‘bok Pôl ưh kơ lê̆ loh đĕch ôh. Na sư đei yua đơ̆ng tơdrong bôl juăt lăm Kră Yang na apinh Philêmôn mơnat păng sơng iŏk ‘bok Ônêsim: “Inh buăl ih kư̆m jang tơdrong ‘Bok Kei-Dei mơ̆n na dang ei inh wă kơ ih sơng iŏk Ônêsim hŏ, ‘noh kư̆m thoi ih sơng iŏk inh mơ̆n.” (trong 17). Păng đơ̆ng noh dơ̆ng, ‘Bok Pôl kư̆m băt sĭt tơpă ‘bok Philêmôn gô lăp đon mơ̆ng păng pơm kiơ̆: “Inh chih kơ ih kơthơ âu kơlih kơ inh băt kơ ih gô pơm kiơ̆ kơ dôm nơ̆r inh pơma kơ ih. Inh kư̆m băt kơ ih gô pơm ‘lơ̆ng hloh kơ nơ̆r inh pơma kơ ih.” (trong 21). Mă khan lei ră, ‘bok Pôl ưh kơ pơgŏ păng kư̆m ưh kơ ăn kơ Philêmôn chu pơmat ôh. Sư chu pŭ hre tơplih kơ bơngai đĭch đêl tơtông iŏk tơmam đe na kơdâu klĕnh đơ̆ng tơ’ngla sư păng pơkă wă ‘mong pơkeh tôm kơ Philêmôn.
Lăm Kră Yang, lu bơ̆n “mă gah tơdrong ‘mêm kơ bôl buăl ưh kơ tôch ôh” (Rôm 13:8). Pôl đei chông anhăk Philêmôn năm tơ Kră Yang Yêsu thoi noh sư bơih oei hre kơ ‘bok Pôl gah tơdrong ‘mêm tơdrong hre noh ling lang, mălei sư ưh kơ đei tơ’blŏk. Bơngai pơm đĭch mă kơdâu klĕnh Ônêsim hre gah tơmam đĕch păng ‘bok Pôl chu pŭ duh tang kiơ̆ kơ tơdrong juăt sư hơpơi ‘bok Philêmôn sơng iŏk ‘bok Ônêsim. “Ơ Philêmôn, ba ‘nhŏng oh yua kơ ba lui kơ Kră Yang Yêsu Krist, na dang ei ih đih sơng Ônêsim hŏ. Thoi noh inh bơnê kơ Kră Yang Yêsu Krist tơpă, na jơhngơ̆m inh kư̆m chơt hiôk.” (trong 20).
Nhen thoi Ônêsim minh ‘nu bơngai đĭch, lu bơ̆n âu bơih bơngai yoch trŏ kơ hiong răm păng ưh kơ đei bu lăm lu bơ̆n đei minh tơdrong kiơ dah pơm minh tơdrong kiơ trŏ wă kơ ‘Bok Kei-Dei mơnat. Mă khan lei ră, Kră Yang Yêsu lăp đon chu pŭ iŏk dôm tơdrong yoch lu bơ̆n ‘bơ̆t hơngiĕng sư. Kră Yang chu lôch tơ’long pơglang tơplih tơdrong hre kơ yoch lu bơ̆n. Đơ̆ng noh na bơ̆n gơh mơnat, gơh tơ’bưh hăm ‘Bok Kei-Dei păng Sư sơng iŏk bơ̆n lăm Kră Yang Yêsu Krist.
Lu bơ̆n mă bu bu oei hre kơ tơdrong Dŏng pơklaih Kră Yang, hre kơ tơdrong ‘mêm băl hre kơ bơngai chông anhăk bơ̆n năm tơ Kră Yang, hre kơ bơngai bơwei bơ̆n, hre kơ bơngai bơngơ̆t kơ bơ̆n gah bơhngol… đơ̆ng noh, athei mơnat kơ bơngai pơm kơnê̆ kơ bơ̆n, pŭ iŏk pơmat na pơm kơ đe gơh pơhiôk dih băl. Kră Yang Yêsu khan: ““Pŭn dêh lu bơngai gơh pơm sơlam kơ đe wă kơ lu sư tơhiôk băl, đe gô jô̆ sư kon ‘Bok Kei-Dei.” (Mathiơ 5:9). Mă khan hiong hiach gah tơmam, hiong gah jơ năr ‘măn jơhngơ̆m pran wă pơhiôk kơ lu ‘nhŏng, mŏ, oh bơ̆n na mơnat dih băl, minh jơhngơ̆m păng ‘mêm mơnat dih băl.
Lu bơ̆n pôm đon lăm tơdrong krao khan,
Kơkuh kơ Ih Kră Yang, inh bơnê kơ Ih Kră Yang yua kơ Ih đei chu pŭ iŏk yua kơ tơdrong yoch inh hăm pham Ih kơdih. Apinh Ih tơgŭm inh đei jơhngơ̆m pŭ iŏk pơmat păng chu iŏk pơmat noh na arih băt mơnat, minh jơhngơ̆m ‘mêm mơnat băl lăm Kră Yang. Krao khan yua anăn Kră Yang Yêsu Krist, Amen.
Ơ đĭ đăng bơngai mơ̆ng mă ‘mêm kơeng,
Lu bơ̆n hăm pŭ iŏk yua kơ bơngai nai wă kơ lu sư huay pă pơma tơhil băl dơ̆ng ưh?
Dah đei pơm ưh kơ ‘lơ̆ng hăm lu ‘nhŏng oh bơ̆n
Athei băt ‘mong mă lơ hloh dơ̆ng
Pơma pơhiôk dih băl
‘Mêm, mơnat, tơgŭm ‘nhŏng oh
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 19
Kênh Youtube BHKTHN:
