Klei Aê Diê Blŭ: II Y-Timôthê 1:3-5
Êlan kliăng: “Kâo hdơr kơ klei ih đăo sĭt suôr. Klei đăo anăn hdĭp leh êlâo hlăm aduôn ih H’Lôis, leh anăn hlăm amĭ ih H’Ônis, leh anăn kâo thâo sĭt ară anei klei đăo anăn ăt hdĭp hlăm ih” (II Y-Timôthê 1:5)
Klei êmuh ksiêm mĭn: Si dua klei Khua ƀĭng kna Y-Pôl lŏ mñă djŏ kơ klei đăo Y-Timôthê? Hlăm ya mta klei – klei “đăo phŭn” jing jăk amâodah amâo jing jăk ôh? Si srăng ngă čiăng mkŏ mjing sa găp djuê huĭ mpŭ kơ Aê Diê hlăm gŏ sang drei?
Tơdah Khua ƀĭng kna Y-Pôl hdơr kơ anak ñu hlăm mngăt leh anăn wah lač kơ gơ̆ hŏng êa ală, ñu lŏ mñă dua mta klei djŏ kơ Y-Timôthê: Tal sa jing “klei đăo sĭt”, čiăng lač jing “klei đăo sĭt suôr” Y-Timôthê. Tal dua, “klei đăo anăn, hdĭp leh êlâo hlăm aduôn ih H’Lôis, leh anăn hlăm amĭ ih H’Ônis, leh anăn kâo thâo sĭt ară anei klei đăo anăn ăt hdĭp hlăm ih” (êlan 5). Klei anei brei ƀuh Y-Timôthê kkiêng hlăm gŏ sang huĭ mpŭ kơ Aê Diê mơ̆ng mphŭn, klei đăo gŏ sang dưi răng pioh leh anăn lui pioh kơ lu phung gưl êdei.
Hlăm hdruôm hră Klei Aê Diê Blŭ mâo lu blư̆ Khua Yang lač: “Kâo jing Aê Diê Y-Abraham, Aê Diê Y-Isăk, leh anăn Aê Diê Y-Yakôp” (Klei Kbiă 3:6, 3:15; Y-Mathiơ 22:32; Y-Markôs 12:26,…). Tinei, Khua ƀĭng kna Y-Pôl lač kơ klei đăo hlăm aduôn, hlăm amĭ leh anăn hlăm Y-Timôthê pô. Dua êlan blŭ anăn ñu yua čiăng lač kơ klei jăk sơăi, lač kơ sa găp djuê huĭ mpŭ kơ Aê Diê hŏng klei djă pioh klei đăo, bi hriăm brei djă pioh kơ lu phung gưl êdei.. Klei bhiăn djă pioh klei đăo hlăm lu ênuk mơ̆ng gŏ sang jing sa klei năng bi mni leh anăn lač jăk kơ Aê Diê lu snăk, leh anăn anei mơh jing klei drei čiăng mâo hlăm klei hdĭp drei pô leh anăn hlăm klei hdĭp phung anak čô drei. Hlăm klei hdĭp brei drei ƀuh klă, hlei pô mâo gŏ sang mpŭ kơ Aê Diê, tơdah ñu ngă soh amâodah mâo klei rŭng, ñu srăng mâo klei đru hŏng klei djŏ čiăng lŏ kgŭ ênưih hĭn kơ pô mkăn. Ƀiădah ênguôt đei tơdah ênuk amĭ ama huĭ mpŭ kơ Aê Diê, bi phung anak čô amâo mâo huĭ mpŭ kơ Aê Diê ôh (msĕ si phung anak êkei khua ngă yang Y-Hêli, Khua pô hưn êlâo Y-Samuel, …lu phung mkăn đa đa). Klei yăl dliê ênguôt anăn brei ƀuh, amâo djŏ ôh klei đăo sĭt suôr “hdĭp leh” hlăm aê aduôn, hlăm amĭ ama srăng čŏng čiăng čăt leh anăn bi ktuê kơ phung anak čô. Kyuanăn, lu blư̆ Klei Aê Diê Blŭ mñă brei bi hriăm Klei Aê Diê Blŭ kơ phung hđeh “êjai dôk gŭ hlăm sang, êjai hiu, êjai dôk đih, leh anăn êjai kgŭ (Klei Mtô Mñă Klei Bhiăn 6:7, 11:19).
Hruê anei, mâo lu gŏ sang hưn ktưn kơ klei bhiăn djă pioh klei đăo diñu, ƀiădah mâo mơh đa đa gŏ sang “đăo phŭn” phung anak čô amâo lŏ djă pioh ôh klei đăo. Đăo phŭn tui si klei čiăng lač lu gưl ênuk hlăm gŏ sang bi hriăm kơ phung anak čô djă pioh klei huĭ mpŭ kơ Aê Diê jing klei bi mni kơ Aê Diê. Đăo phŭn amâo srăng jing jăk ôh tơdah klei đăo sĭt suôr “dôk hdĭp” leh hlăm aê aduôn, amĭ ama ƀiădah amâo “dôk hdĭp” ôh hlăm phung anak čô. Bi mni kơ Aê Diê bi mtlaih leh drei leh anăn dưm drei hlăm gŏ sang đăo leh amâodah ka đăo ôh. Wăt snăn dưn, brei drei dôk kjăp hlăm klei đăo, ngă klei bi hmô jăk leh anăn hŏng jih ai tiê bi hriăm klei đăo anăn kơ phung gưl êdei. Tơdah drei thâo uêñ kơ klei hưn klei đăo kơ phung anak leh anăn kăn wơr bĭt lei kơ ênuk phung čô drei, sĭt nik Khua Yang srăng brei kơ drei sa găp djuê huĭ mpŭ kơ Ñu bŏ hŏng klei jăk jĭn.
Ya drei srăng ngă čiăng mkŏ mjing klei đăo sĭt suôr leh anăn lui pioh klei đăo anăn lŏ čuê kơ phung čô čĕ?
Wah lač: Ơ Khua Yang, đru kâo mkŏ jing gŏ sang thâo huĭ mpŭ kơ Ih hŏng klei đăo sĭt suôr kơ grăp čô mnuih hlăm gŏ sang kâo, čiăng grăp čô mâo klei đăo hdĭp pioh lŏ bi hriăm kơ phung êgưl êdei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Sakari 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
