Đaniel 9:1-9
“Inh lăng tơ Kră Yang ‘Bok Kei-Dei, noh Kră Yang ‘Bok Kei-Dei, inh krao khan, hơpơi apinh păng ơ̆t kơ sŏng sa, hrŭk ao ‘bi, pung tơnuh tơ kơ̆l na krao chă.” (Đaniel 9:3)
Nơ̆r jet tơchĕng pơwao:
– Yua kơ kiơ ‘bok Đaniel pơtơm krao khan, tơdrong dŏng pơklaih adrĕch adrung sư?
– Sư đei krao khan lăm jơhngơ̆m đon thoi yơ?
– Lu bơ̆n pơhrăm rok kơmĭl kiơ đơ̆ng ‘bok Đaniel đei krao khan?
‘Bok Đaniel jơ̆ minh ‘nu bơngai linh tơblah lăm tơdrong krao khan (Đaniel 6:10). Sư kư̆m jơ̆ bơngai đei jơhngơ̆m hơlen păng hlôh Nơ̆r Kră Yang pơma đơ̆ng lăm ‘Bok khan lê̆ adrol Jêrêmi khan adrĕch adrung sư gô đei tơdrong dŏng pơklaih đơ̆ng rŏng 70 sơnăm đơ̆ng đe puh jăk. Nơ̆r Kră Yang pơkă wă dŏng pơklaih pơdrŭt sư krao khan đĭ jơhngơ̆m păng krao khan apinh Kră Yang. Lăm nơ̆r krao khan, sư pơm tơ’bôh jơhngơ̆m hơpơi kơ nơ̆r Kră Yang pơkă noh gơh pơkeh jing kơplah sư pơma: “Inh tơwih muh măt tơ gah Kră Yang jơ̆ ‘Bok Kei-Dei, iŏk tơdrong krao khan đĭ jơhngơ̆m, ôr krao apinh.” Wă tơ’bôh wă tơpă đĭ jơhngơ̆m lăm tơdrong krao khan.
Mă khan đei jô̆ khan minh lăm pêng ‘nu bơngai ‘lơ̆ng tơpăt lăm teh đak âu (Êsêkiên 14:14) mălei ‘bok Đaniel ling lang “ơ̆t kơ sŏng sa, hrŭk ao ‘bi, yơ̆l tơnuh na krao chă”. Sư ‘bôh mơn kơdih: “Ưh kơsĭ gơnang kơ tơdrong ‘mêm mơnat đĭ jơhngơ̆m đơ̆ng sư (Đaniel 9:18). Tơdrong tơbral wă tơ’bôh jơhngơ̆m chu iŏk đon ala na năm jê̆ Kră Yang. Sư băt tơpă tơdrong gleh truh noh yua kơ tơdrong yoch đơ̆ng kon pơlei Isơrael pơm ưh kơsĭ đơ̆ng tơdrong tơchĕng Kră Yang ‘Bok Kei-Dei; sư ling lang ‘lơ̆ng tơpăt. Yua kơ thoi noh, tơplih kơ jô̆ jŏk noh, sư đĭ jơhngơ̆m tơbral yoch kơdih đei pơm (trong 5-6). Sư ưh kơ ôn, dŏng kơdih kâu dah tơpŭ ăn kơ đe nai mălei sư chu iŏk lăp đon kơdih sư, kon pơlei păng lu bơngai pơgơ̆r, “Ơ Kră Yang ‘Bok Kei-Dei, mơ̆ng mă tôm bĕ! Ơ Kră Yang ‘Bok Kei-Dei mơnat ăn bĕ! Ơ Kră Yang ‘Bok Kei-Dei! ‘Blŏk bĕ păng pơm bĕ. Ơ Kră Yang ‘Bok Kei-Dei inh! Yua kơ Ih bơih ‘nĕ pă gô dơ̆ng; yua kơ pơlei tih Ih păng kon pơlei Ih, mă đei krao păng anăn Ih (Đaniel 9:19 BTTHĐ). Minh ‘nu bơngai đĭ jơhngơ̆m păng chu iŏk đon ala thoi noh liơ mă Kră Yang khan ưh kơ ‘mêm kơeng, păng Sư gô wơh linh jang ‘lơ̆ng Sư bơtho tơ’bôh hloi kơplah sư krao khan! (Đaniel 9:20-27).
Nơ̆r ‘Bok Đaniel krao khan hăm jơhngơ̆m sơ’ngon tơbral tơdrong yoch, ơ̆t kơ sŏng sa, đei ‘măn kơmĭl gah tơdrong đei jơhngơ̆m krao khan đĭ jơhngơ̆m hăm tơdrong hlôh băt Nơ̆r Kră Yang, chu iŏk đon ala hăm đĭ jơhngơ̆m tơpă. Lơ wơ̆t lu bơ̆n đei krao khan mălei kơ’bah tơdrong hlôh Nơ̆r Kră Yang, ling lang pơm kiơ̆ kơ bơ̆n kơdih. Lơ bơngai hlôh Nơ̆r Kră Yang mălei krao khan ưh tam đĭ jơhngơ̆m. Dah krao khan tam mă chu iŏk đon ala băt tơbral tơdrong yoch bơ̆n kơdih. Dôm nơ̆r bơ̆n krao khan thoi noh Kră Yang ưh kơ mơ̆ng, lăp đon păng tơl tơwih. Apinh Kră Yang tơgŭm bơ̆n ling lang kơjăp lăm Nơ̆r Kră Yang păng đĭ jơhngơ̆m krao khan kơ adrĕch adrung, khul bơngai lui păng hnam dơnŏ bơ̆n kơdih.
Ơ Kră Yang mă ‘lơ̆ng tơpăt! Tơ’bôh tơ lăm kơmĭl ‘bok Đaniel krao khan, inh băt kơdih oei kơ’bah lơ tơdrong! Apinh Ih tơgŭm inh đĭ jơhngơ̆m krao khan kiơ̆ thoi Ih wă, wă kơ nơ̆r inh krao Ih tơl tơwih. Yua anăn Kră Yang Yêsu Krist, Amen!
Lu bơ̆n băt mơn kơdih kâu oei kơ’bah thoi yơ lăm tơdrong krao khan?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Pơđơ̆k 18
Kênh Youtube BHKTHN:
