Klei Aê Diê Blŭ: Klei Bi Hriêng 22:22-23
Êlan kliăng: “Đăm tlĕ ôh dŏ dô pô ƀun ƀin kyuadah gơ̆ jing pô ƀun ƀin, leh anăn đăm ktư̆ juă ôh pô knap mñai ti ƀăng jang.” (Klei Bi Hriêng 22:22)
Klei êmuh ksiêm mĭn: Pô čih hră lač kơ bruă tlĕ dŏ dô phung ƀun hŏng si dua hdră? Si Aê Diê bi kmhal phung tlĕ dŏ dô mnuih ƀun ƀin? Thâo kơ ngăn drăp knŏng jing mnơ̆ng yua si bi mlih leh klei drei hdĭp hŏng phung ƀun ƀin?
Aê Diê jing Pô kpă ênô, doh jăk leh anăn khăp hơiêng kyua anăn Ñu kăm amâo brei tlĕ ôh dŏ dô phung ƀun ƀin. Hlăm êlan 22, klei tlĕ dŏ dô phung ƀun čih hŏng sa hlăm dua hdră. Tal sa, tlĕ dŏ dô hŏng klei ktư̆ juă phung ƀun ƀin. Phung mdrŏng yua klei mnêč čiăng mplư, amâodah mjhua klei truh phung ƀun ƀin čiăng tlĕ dŏ dô digơ̆. Lu mnuih tơdah lĕ hlăm klei truh, djiê ƀrŭ anăn hiu duah lĭng čan prăk phung mdrŏng, mơ̆ng anăn phung mdrŏng amâo mâo klei pap mjhua boh klei dleh dlan digơ̆ čiăng ktư̆ juă, ngă jhat, duah prăk mnga lu đei. Diñu klư̆ phung ƀun hlăm boh klei jing hlŭn kơ digơ̆. Klei bhiăn Aê Diê kăm amâo dưi ôh mă prăk mnga ayŏng adei pô tơdah brei čan (Klei Mtô Mñă Klei Bhiăn 23:20), ka lač ôh kơ klei bi ngă jhat hdơ̆ng pô. Tal dua, phung mdrŏng mă klei dưi, ba ngăn sun kơ sang phat kđi čiăng ktư̆ juă phung ƀun. Boh blŭ “ƀăng jang anôk ñu dôk” amâodah “ƀăng jang” hlăk đưm jing anôk phat kđi, hlue ngă klei bhiăn (Klei Mtô Mñă Klei Bhiăn 21:19). Tinăn mâo phung khua kiă kriê, phung phat kđi hlăm êpul êya. Bruă yua klei dưi, prăk mah, sun ngăn phung khua phat kđi čiăng ktư̆ juă phung ƀun ƀin jing ngă klei jhat ti anăp Aê Diê.
Êlan 23 brei ƀuh Aê Diê mgang leh anăn rŭ ênua kơ phung ƀun ƀin. Aê Diê “mgang klei digơ̆” anăn Ñu srăng “plah mă mnơ̆ng phung plah mă leh dŏ dô digơ̆”. Bruă ngă jhat kơ phung ƀun ƀin jing klei soh amâo djŏ knŏng hŏng anak mnuih ôh ƀiădah wăt hŏng Aê Diê. Tơdah sa čô mnuih knang kơ prăk mah, klei dưi čiăng ktư̆ juă phung ƀun ƀin, snăn brei pô anăn hdơr wăt tơdah phung ƀun ƀin amâo dưi ngă jhat kơ diñu ôh, ƀiădah Aê Diê ăt srăng rŭ ênua klei jhat diñu ngă leh. Boh jhat kơ phung ƀai srăng tŭ amâo djŏ knŏng klei luč liê kơ mnơ̆ng dhơ̆ng, prăk mah ôh, ƀiădah lŏ luč “klei hdĭp”. Tơdah Aê Diê mă hĕ klei hdĭp phung măk ƀai, snăn wăt tơdah diñu mâo lu prăk mah hlăm sang dưn mơh ăt kăn dưi dưn ya mta rei.
Tơdah phung đăo thâo kơ ngăn drăp knŏng jing mnơ̆ng pioh yua hlăm klei hdĭp đuč snăn amâo mâo ya mta čiăng ngă jhat kơ phung ƀun ƀin ôh. Klei hdĭp drei ti lăn ala knŏng jing êjai, klei hdĭp drei jing dŏ Aê Diê, ka lač ôh kơ ngăn drăp, kyua anăn đăm ôh kyua prăk mah ngă soh hŏng Aê Diê. Klei Aê Diê Blŭ lač: “Ƀiădah Aê Diê lač kơ ñu, ‘Ơ mnuih mluk! Mlam anei Aê Diê srăng sua mă mngăt ih. Leh anăn mnơ̆ng ih mkra leh, hlei pô srăng dưn lĕ?’ Msĕ snăn mơh pô mkăm pioh lu ngăn drăp kơ ñu pô, leh anăn amâo jing mdrŏng hlăm Aê Diê ôh” (Y-Luk 12:20-21). Brei drei mđing kơ klei hdĭp hlŏng lar čiăng bi êdah klei kpă ênô, klei khăp hlăm knuih hdĭp grăp hruê.
Si drei hdĭp hŏng phung ƀun ƀin knap mñai?
Wah lač: Ơ Khua Yang, bi mni kơ Ih brei leh kơ kâo klei hdĭp hlŏng lar leh anăn mnơ̆ng ƀơ̆ng djăp grăp hruê. Akâo kơ Ih đru kâo thâo mđing kơ klei hdĭp hlŏng lar leh anăn thâo pap kơ phung ƀun ƀin msĕ Khua Yang pap leh leh anăn brei klei hơêč hmưi kơ kâo. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Rôm 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
