Pajlug 22:22-23
Nqe cim:
“Koj tsis txhob mus txeeb cov neeg pluag tug, vim lawv hais tsis taus; tsis txhob mus txeeb cov neeg uas tsis muaj leejtwg pab hauv tsev tu plaub ntiag tug” (Pajlug 22:22)
Peb nyeem ntxiv Phau Txhais Tshiab HMOWSV:
“Tsis txhob lws tus neeg pluag rau qhov nws pluag heev, tsis txhob quab yuam cov uas raug kev txom nyem ntawm rooj loog uas tu plaub,
Lug nug rau sawvdaws xav:
– Tus sau qhia tshwm kev quab yuam tus pluag los ntawm ob yam twg?
– Tus Tswv yuav rau txim rau tus quab yuam cov neeg txomnyem licas?
– Zeem paub hais tias tej khoom nyiaj txiag qhov txhia chaw tsuas yog khoom cuabyeej xwb pab peb pauv hloov tus cwjpwm rau cov neeg pluag licas?
Vajtswv yog tus ncaj ncees, dawbhuv thiab hlub tshua, yog li ntawd Nws txwv tsis pub quab yuam cov neeg pluag. Nyob hauv nqe 22, kev quab yuam tus neeg pluag tau sau tseg dhau ntawm ob yam. Thib ib, quab yuam dhau ntawm kev mus txeeb cov neeg pluag tug. Cov neeg npluanuj siv tej tswvyim phem los dag ntxias, lossis ntxab ntxawm tus neeg pluag tej kev txomnyem los quab yuam lawv. Muaj coob tug thaum raug mob nkeeg, raug kev ib siab ob qig thiaj yuav tsum mus qiv txais tus npluanuj, thaum ntawd tus npluanuj tsis muaj siab hlub yuav ntxab ntxawm lawv lub tsamthawj txomnyem los quab yuam, ua phem thiab ua kom tau nyiaj ntau. Lawv thawb tus pluag mus rau kev ua lawv qhev. Tus Tswv txojcai twb txwv tsis pub tsub paj lim rau yus tej kwvtij thaum qiv txais nyiaj (II Kevcai 23:20), tsis tas yuav hais txog qhov uas yuav txeeb lawv tug. Thib ob, tus neeg npluanuj tau siv nws lub hwjchim, kev xiab nyiaj los quab yuam cov pluag. Lo lus “tsev tu plaub” lossis “rooj loog tu plaub” thaum ub yog qhov chaw txiav txim, ua raws txoj kevcai (II Kevcai 21:19). Qhov chaw ntawd muaj tej nomtswv, cov neeg tu plaub ntug. Qhov uas siv meejmom, nyiaj txiag, xiab nyiaj rau cov tu plaub ntug kom quab yuam tus pluag yog kev phem tabmeeg tus Tswv.
Nqe 23 qhia pom hais tias Vajtswv tuaj cov neeg pluag tog thiab yuav ua pauj rau lawv. Tus Tswv yuav “ua tus hais lawv tej plaub” thiab nws yuav “txov txhua tus uas txov lwm tus txojsia lawm”. Tes haujlwm quab yuam tus pluag yog kev txhaum, tsis yog txhaum rau neeg xwb tiamsis tseem txhaum rau tus Tswv thiab. Thaum ib tug siv nyiaj txiag, meejmom los quab yuam tus pluag, ces tus ntawd yuav tsum nco ntsoov hais tias txawm yog tus pluag ua tsis tau licas rau lawv, los Vajtswv yuav ua pauj lawv tes haujlwm. Lub txim uas tus neeg siab phem yuav raug ris tsis yog tsuas raug poob tej khoom qhov txhia chaw sab nqaij tawv xwb, tiamsis tseem raug poob “txojsia”. Thaum tus Tswv txov tus neeg npluanuj siab phem txojsia, ces txawm lawv muaj nyiaj puv txhab los tsis muaj yam dabtsi pab tau lawv.
Thaum cov ntseeg Tswv Yexus zeem paub hais tias tej khoom nyiaj txiag tsuas yog yam cuabyeej siv los pab txhawb kev ua neej ces tsis tas yuav quab yuam tus pluag. Peb lubneej hauv ntiajteb tsuas nyob ib ntus xwb, peb txojsia yog tus Tswv tug, yog li tsis txhob cia leejtwg vim nyiaj txiag es ho ua txhaum rau tus Tswv. Vajtswv Txojlus samhwm hais tias: “Tus neeg ruam, hmo no koj txojsia twb yuav tu; yog li ntawd, tej qhov txhia chaw uas koj npaj tseg yuav yog leejtwg tug? Yexus xaus lus hais tias: Tus uas npaj nyiaj txiag qhov txhia chaw los ua nws tug kom nws npluanuj, Vajtswv tsis suav hais tias tus ntawd yog neeg npluanuj” (Lukas 12:20-21). Cia li tig nrhiav txojsia ibtxhis kom ua tau lubneej ncaj ncees, hlub tshua lwm tus txhua hnub.
Thov Vajtswv,
Tus Tswv, thov ua Koj tsaug vim Koj pub rau nyuam yaus muaj txojsia thiab zaub mov txhua hnub. Thov pub nyuam yaus paub tig nrhiav txojsia ibtxhis thiab hlub tshua cov pluag ib yam li Tswv Yexus tau hlub thiab pub koob hmoov rau nyuam yaus. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb tau ua licas rau cov neeg pluag lawm?
Nyeem Vajluskub hauv peb lub xyoos: Loos 10
Kênh Youtube BHKTHN:
