Klei Aê Diê Blŭ: I Y-Timôthê 5:21-25
Êlan kliăng: “Đăm ruăt ênă kngan pioh brei arăng kơ bruă Khua Yang ôh” (I Y-Timôthê 5:22a)
Klei êmuh ksiêm mĭn: Si mbang boh blŭ “ênă kngan” hlăm êlan 22? Ya ngă Khua ƀĭng kna Y-Pôl mtô kơ Y-Timôthê “Đăm ruăt ênă kngan pioh brei arăng kơ bruă Khua Yang ôh”? Si drei yua klei hriăm hlăm bruă ruah phung mă bruă hlăm Phung Sang Aê Diê?
Khua ƀĭng kna Y-Pôl čih hră đru kơ Khua pô mtô hlăk ai Y-Timôthê kơ klei yuôm bhăn hlăm bruă kiă kriê Phung Sang Aê Diê. Êlâo anăn, ñu mtô kơ klei dôk dơ̆ng ƀơ̆ng huă hŏng phung khua mduôn jing phung mă bruă kơ Aê Diê mbĭt hŏng pô, ăt msĕ mơh brei răng tơdah ksiêm dlăng bruă kčŭt hưn amâodah kpĭ mjuăt. Hlăm trăn Klei Aê Diê Blŭ hruê anei, ñu mtô “Đăm ruăt ênă kngan pioh brei arăng kơ bruă Khua Yang ôh” (êlan 22).
Mkŏ hŏng bruă phung khua mduôn ti dlông, snăn boh blŭ “ênă kngan” dưi thâo săng hlue si klei hưn mdah bruă klam, ruah sa čô mnuih hlăm bruă klam mă bruă kơ Khua Yang. Anei jing bruă yuôm bhăn snăk, mâo Aê Diê, Khua Yang Yêsu leh anăn phung dĭng buăl jăk dlăng, kyua anăn, đăm dlăng ôh anei jing klei bhiăn hră mơar ƀiădah jing sa bruă hlăm mngăt myang. Brei jih ai tiê thâo răng, amâo dưi ruăt kuăt ôh. Êlâo anăn, hlăk êjai Khua ƀĭng kna Y-Pôl mtô kơ knuih jăk phung khua kiă kriê, phung khua sang yang, ñu ăt mtă mtăn: “Msĕ mơh brei arăng lông dlăng diñu êlâo; tơdah diñu bi êdah diñu pô amâo mâo klei arăng dưi ƀuah ôh, brei diñu djă bruă khua sang yang” (I Y-Timôthê 3:10).
Đăm mâo klei mĭn jhat leh anăn yap mnuih mdê mdê ôh hlăm klei ênă kngan hrŏng ruah (êlan 21). Pô dôk hlăm sa bruă klam lăn ala brei mâo bi mklă jing si năng, snăn pô dưi dưm hlăm bruă myang brei mâo Phung Sang Aê Diê ksiêm dlăng bi nik hĭn. Khua ƀĭng kna Y-Pôl mtă kơ Y-Timôthê hlăm êlan 24-25, brei ksiêm dlăng knuih hdĭp êlâo kơ ênă kngan ruah. Phung Sang Aê Diê brei mâo klei thâo mĭn leh anăn Yang Mngăt Jăk atăt gai čiăng ruah phung mă bruă. Huĭ hyưt snăk tơdah ruăt kuăt ruah sa čô mnuih ka mâo klei đăo kjăp, sa čô mnuih amâo mâo klei thâo, amâodah sa čô mnuih mâo knuih hdĭp êdu awăt hlăm bruă khua kiă kriê. Leh anăn ăt huĭ hyưt snăn tơdah pô kiă kriê amâo mtăp mđơr hlăm klei ruah, amâodah brei prăk mah, bruă klam amâodah klei khăp hjăn hlăm bruă anăn.
Klei mă bruă kơ Phung Sang Aê Diê amâo djŏ knŏng ktrŏ kơ êpul mkŏ mjing, hră mơar ôh ƀiădah lŏ jing bruă klam myang ti anăp Aê Diê. Khua pô mtô Y-Timôthê brei jih ai tiê thâo răng ksiêm dlăng bi klă klei hdĭp, klei đăo leh anăn knuih hdĭp jăk phung djŏ ruah. Djăp klei bi mklă hlăm klei mă bruă kơ Khua Yang hmăi sơăi kơ klei hdĭp myang pô mkăn leh anăn ñu pô. Khua ƀĭng kna Y-Pôl lač, “. Đăm ngă soh mbĭt hŏng arăng ôh. Răng kriê ih pô jing doh jăk” (êlan 22). Jing brei anak răng kriê knuih hdĭp doh jăk, anei ăt jing tur knơ̆ng čiăng kơ anak đăm “ruăt ênă kngan”. Hruê anei, Phung Sang Aê Diê khăng kƀah mnuih mă bruă ƀiădah ăt kăn djŏ kyua klei anăn ruah mdưm hĕ ruăt kuăt, kƀah klei ksiêm dlăng. Akâo kơ Aê Diê brei kơ grăp čô drei ƀuh bruă klam pô hlăm bruă ruah phung mă bruă kơ Phung Sang Aê Diê.
Drei thâo răng mơ̆ hlăm bruă ruah phung mă bruă hlăm Phung Sang Aê Diê?
Wah lač: Ơ Khua Yang, akâo kơ Ih brei kơ phung kiă kriê Phung Sang Aê Diê ăt msĕ mơh grăp čô hmei mâo klei thâo mĭn leh anăn thâo răng hlăm bruă ruah phung mă bruă, čiăng kơ Phung Sang Aê Diê dưi mkŏ mjing, klei hdĭp myang dưi đĭ kyar leh anăn lu mnuih dưi dŏng mtlaih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: : Klei Bi Êdah 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
