Klei Aê Diê Blŭ: II Klei Yăl Dliê 29:4-11
Êlan kliăng: “Ơ phung anak êkei kâo, đăm ngă klei amâo uêñ ôh, kyuadah Yêhôwa ruah leh diih brei dôk dơ̆ng ti anăp Ñu, čiăng mă bruă kơ Ñu, leh anăn jing phung dĭng buăl Ñu leh anăn čuh mnơ̆ng ƀâo mngưi kơ Ñu” (II Klei Yăl Dliê 29:11)
Klei êmuh ksiêm mĭn: Mtao Y‑Hêsêkia bi kƀĭn phung khua ngă yang leh anăn phung Lêwi ya klei ñu čiăng lač? Ya bruă ñu jak digơ̆ ngă? Drei thâo ya bruă Aê Diê iêo brei drei ngă kơ Phung Sang Aê Diê?
Leh pŏk ƀăng bhă sang Aê Diê, Mtao Y‑Hêsêkia iêo bi kƀĭn jih jang phung khua ngă yang leh anăn phung Lêwi čiăng lač kơ bruă lŏ mkŏ mjing klei kkuh mpŭ hlăm sang Aê Diê. Êlâo hĭn, ñu mtă brei digơ̆ bi doh digơ̆ pô leh anăn bi doh hĕ sang Aê Diê, kyuadah phung ama diñu ngă leh klei jhat, lui wir Aê Diê leh anăn amâo lŏ kkuh mpŭ kơ Gơ̆ ôh. Ñu lŏ mñă kơ boh jhat phung ƀuôn sang Aê Diê srăng tŭ čiăng brei digơ̆ răng (êlan 6-10). Ară anei, ñu hưn kơ digơ̆ thâo klei ñu mĭn čiăng lŏ ngă sa klei bi mguôp hŏng Aê Diê, bi êdah klei mtao leh anăn phung ƀuôn sang ktưn ngă čiăng lŏ wĭt tui duah Aê Diê hŏng jih ai tiê (II Klei Yăl Dliê 15:12), čiăng kơ klei Aê Diê ngêñ srăng weh đuĕ mơ̆ng diñu. Knhal tuč, hŏng jih ai tiê ñu iêô jak phung khua ngă yang leh anăn phung Lêwi snei, “Ơ phung anak êkei kâo, đăm ngă klei amâo uêñ ôh, kyuadah Yêhôwa ruah leh diih brei dôk dơ̆ng ti anăp Ñu, čiăng mă bruă kơ Ñu, leh anăn jing phung dĭng buăl Ñu leh anăn čuh mnơ̆ng ƀâo mngưi kơ Ñu.”
Jing sa čô pô gĭt gai uêñ kơ klei hdĭp myang leh anăn khăp kơ Aê Diê, Mtao Y‑Hêsêkia mâo klei ênguôt kyua klei phung ƀuôn sang awăt hlăm klei hdĭp myang leh anăn kyua klei soh phung ƀuôn sang ngă tơdah digơ̆ lui wir sang Aê Diê, amâo lŏ kkuh mpŭ kơ Aê Diê tinăn ôh. Ñu thâo klă klei jing sang Aê Diê bi êdah klei bi mguôp phung ƀuôn sang hŏng Aê Diê leh anăn klei digơ̆ khăp kơ Aê Diê. Ñu čiăng ngă sa mta klei lŏ bi êrâo klei hdĭp myang phung ƀuôn sang, čiăng digơ̆ lŏ wĭt tui duah leh anăn kkuh mpŭ kơ Aê Diê, čiăng kơ digơ̆ amâo lŏ jing “mnơ̆ng bi huĭ arăng, mnơ̆ng bi kngăr, leh anăn mnơ̆ng arăng djik djak” ôh. Kyuanăn ñu mñă brei phung khua ngă yang leh anăn phung Lêwi hdơr kơ klei Aê Diê iêô leh digơ̆, đăm ngă klei amâo uêñ ôh ƀiădah ngă bruă mtam čiăng lŏ mkŏ mjing klei kkuh mpŭ hlăm sang Aê Diê.
Hruê anei, phung đăo kơ Krist jing sa phung găp djuê Aê Diê ruah, phung khua ngă yang kơ mtao, čiăng hưn bruă yuôm bhăn Khua Yang Yêsu ngă leh (I Y‑Pêtrôs 2:9). Amâo djŏ knŏng hjăn pô mtô, khua pô mtô ôh, ƀiădah Aê Diê iêô jih jang drei brei jing phung dĭng buăl Ñu, ngă lu mta bruă kơ Ñu, leh anăn myơr mnơ̆ng ƀâo mngưi kơ Ñu, si tô hmô myơr kơ Ñu asăp wah lač, klei bi mni. Akâo Khua Yang brei kơ drei mâo klei mĭn msĕ si Mtao Y‑Hêsêkia mâo leh, ƀuh klei čiăng Phung Sang Aê Diê, leh anăn čuăn ngă sa mta klei čiăng đru hlei pô awăt hlăm klei hdĭp myang lŏ wĭt kơ Khua Yang. Đăm drei ngă klei amâo uêñ ôh, lui măng ai si klei hdĭp myang pô mkăn jing, ƀiădah brei drei hưn mtam Anăn Khua Yang kơ phung ka thâo kral Khua Yang ôh čiăng kơ digơ̆ srăng kkuh mpŭ kơ Ñu, čiăng hŏng klei anăn digơ̆ dưi weh đuĕ mơ̆ng klei Aê Diê ngêñ (Y‑Yôhan 3:36).
Si ngă drei “ngă klei amâo uêñ”, leh anăn amâo mđing mơ̆ kơ klei Phung Sang Aê Diê amâodah phung riêng gah drei čiăng?
Wah lač: Ơ Khua Yang Yêsu, brei kâo hdĭp djŏ hŏng klei Ih iêô leh kâo jing khua ngă yang kơ mtao, čiăng kơ kâo mă bruă, kkuh mpŭ leh anăn myơr kơ Ih klei wah lač leh anăn amâo bi kdung ôh hlăm bruă atăt mnuih mkăn hriê kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Y‑Samuel 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
