Pajlug 27:19-20
Nqe cim:
“Koj pom koj tus duab hauv dej li cas thiab koj lub siab xav li cas, ces koj tes haujlwm zoo li ntawd. Txojkev tuag txhaws tsis paub puv li cas, neeg txojkev ntshaw tsis paub txaus ib yam li ntawd.” (Pajlug 27:19-20)
Lus nug xav:
– Tibneeg lub neej tau muab los piv rau ib daim iav tsom muaj lub ntsiab li cas?
– Tibneeg lub siab kev ntshaw zoo li yam dabtsi?
– Peb yuav tsum hloov dabtsi kom peb thiaj muaj lub neej txaus siab thiab zoo siab?
Pajlug 27:19-20 piav qhia ib lo lus tob heev txog tibneeg lub tsamthawj: ke yog daim iav tsom kom peb pom yus yog leejtwg, ke yog ib lo lus ceebtoom txog lub qhov tob tob ntawm peb lub siab ntshaw. Thaum muab ob qho no los ua ke, peb pom hais tias peb lub neej zoo li ib daim iav uas qhia txog lub siab tshaib nqhis thiab ntshaw tsis paub txaus. Ib lub neej uas poob siab, puv npo kev sib cav sib ceg, kev sib tw thiab kev khib, yog lub cim qhia tias peb tabtom raug lub qhovmuag uas ntsia pom txhua yam tsis txawj txaus tswj kav.
Hauv nqe 19, Vajntxwv Xalumoos muab peb lub neej piv rau ib daim iav tsom: los ntawm tej peb ua, tej peb hais thiab tej uas peb xaiv ua ua ntej tshaj qhia qhov tseeb txog tej yam uas nyob hauv peb lub siab. Yog peb xav paub peb lub siab zoo li cas, cia peb saib seb peb siv sijhawm thiab nyiaj txiag li cas. Ces daim iav tsom no yeej hais tseeb tsis dag li.
Hauv nqe 20, tus sau qhia ib qhov tseeb uas txaus ntshai: Ntawd yog neeg lub siab zoo ib yam li “Tub tuag teb thiab qhov puam tsuaj txhaws tsis paub puv li” (nqe 20 HMOWSV) qhia txog lub siab kev ntshaw tsis muaj hnub txaus. Hauv cov Yudais kev ntseeg, Tubtuag teb “Sheol” thiab lub qhov tob tob “Abaddon” lub ntsiab yog qhov chaw muaj kev puastsuaj thiab qhov chaw ntawm txoj kev tuag tsis muaj hnub paub xaus, niaj hnub txais los tiamsis tsis paub puv li. “Tibneeg lub qhovmuag” yog daim duab piv txwv txog peb txoj kev ntshaw. Lub siab ntshaw yeej tsis paub txaus; nqhis nqhawv xav tau ntau dua—nyiaj txiag ntau dua, neeg qhuas ntau dua, thiab koobmeej nrov dua. Nov yog lub qhov tob tob uas tsis paub txaus siab, tos ntsoov kev tau zoo tiamsis lub siab khoob lug xwb.
Cia kom ua neej paub txaus siab, peb yuav tsum tso tseg “txoj kev tshaib nqhis” ntawm lub qhov tob tob no. Peb yuav tsum ua lub neej paub ua Vajtswv tsaug. Lub siab uas paub ua Vajtswv tsaug yog cov tshuaj uas kho tau lub siab uas pheej tsis paub txaus. Txhua hnub, cia li siv ob peb feeb los hais tawm peb yam uas koj tau txais los ua Vajtswv tsaug. Qhov kev ua no yuav cob qhia peb ob lub qhovmuag kom ntsia yam uas Vajtswv twb pub rau peb lawm, tsis ntsia yam uas peb tseem tsis tau muaj. Dua li ntawd, peb yuav tsum xyaum ua neeg siab dav, lub siab ntshaw tsuas xav tau “txais los xwb,” tiamsis lub siab dav yeej xav “muab pub tawm mus xwb.” Cia li nrhiav ib lub sijhawm hauv lub thiv los muab koj tej nyiaj txiag pub rau lwm tus thiab txhob cia siab tos lawv pauj rov qab. Tes haujlwm uas peb ua no yuav rhuav tau peb txoj kev qia dub pov tseg. Thaum kawg, txoj kev daws tsis yog muab txhua yam kev ntshaw tua kom ploj, tiamsis yog tig txoj kev ntshaw ntawd mus rau qhov yog. Vajtswv Txojlus hais tias, “Rau qhov nej tej nyiaj txiag thiab qhov txhia chaw nyob qhov twg, nej lub siab yeej yuav nyob qhov ntawd” (Mathai 6:21). Peb lub siab raug tsim los rau tej yam uas nyob mus ibtxhis. Yog li ntawd, cia peb tig peb ob lub qhovmuag tawm ntawm lub tob tob hauv lub ntiajteb no mus, thiab tig mus ntsia Tswv Yexus Khetos Tus uas ua tau rau peb txaus siab tiag tiag.
Thov Vajtswv,
Tus Tswv, thov Koj zam txim rau nyuam yaus, vim nyuam yaus tau cia nyuam yaus lub siab khiav raws tej kev ntshaw uas tsis paub xaus hauv lub ntiajteb no. Thov Koj pab kom nyuam yaus xyaum ua lub neej muaj lub siab paub ua Vajtswv tsaug thiab muaj lub siab dav. Thov Koj tig txhua txoj kev ntshaw hauv nyuam yaus lub siab kom tig los nrhiav Koj, vim Koj tib leeg xwb thiaj ua tau kom nyuam yaus txaus siab tiag tiag. Thov Koj pab kom nyuam yaus lub neej qhia tawm Koj txoj kev hlub rau lwm tus. Nyuam yaus tuav Tswv Yexus Khetos lub npe thov, Amees.
Peb puas niaj hnub tsa peb lub qhovmuag ntsia ntsoov rau Vajtswv, lossis peb tseem poob rau hauv lub qhov tob tob ntawm lub ntiajteb no?
Nyeem Vajluskub hauv peb lub xyoos: Hakais 2
Kênh Youtube BHKTHN:
