Klei Aê Diê Blŭ: II Y-Pêtrôs 1:9-11
Êlan kliăng: “Snăn Ơ phung ayŏng amai adei, brei diih hur har hĭn bi sĭt klei Aê Diê iêô leh anăn ruah diih, kyuadah tơdah diih ngă snăn, diih amâo srăng lĕ ôh” (II Y-Pêtrôs 1:10)
Klei êmuh ksiêm mĭn: Khua ƀĭng kna Y-Pêtrôs brei thâo kyua ya klei brei phung đăo kơ Krist ênưih lĕ? Ñu lač ya klei đru phung đăo kơ Krist amâo lĕ ôh? Klei jăk jĭn tơdah drei dôk kjăp ktuê êlan myang tui hlue Khua Yang ya jing?
Khua ƀĭng kna Y-Yôhan brei thâo hlăm I Y-Yôhan 2:16 klei kđeh tluh, klei ală tluh, leh anăn klei mgao hlăm klei hdĭp yơh jing klei Satan yua pioh mplư, guôm ală brei phung đăo kơ Krist ênưih lĕ. Tĭng kơ phung đăo kơ Krist pô, Khua ƀĭng kna Y-Pêtrôs brei ƀuh tơdah sa čô đăo leh kơ Khua Yang ƀiădah amâo thiăm ôh kơ knuih jăk siam msĕ si klei đăo, klei jăk, klei thâo săng, klei djŏ hnơ̆ng, klei gĭr, klei mpŭ kơ Aê Diê, klei khăp leh anăn ai tiê khăp (II Y-Pêtrôs 1:5-7), snăn pô anăn “jing mnuih bum ală, amâo dưi ƀuh kbưi ôh, leh anăn wơr bĭt hĕ Aê Diê bi doh ñu leh mơ̆ng klei soh êlâo” (êlan 9). Tơdah klei hdĭp myang amâo mâo đĭ hriê kơ prŏng ôh, ênưih snăk wơr bĭt klei bi mtlaih Aê Diê brei leh kơ drei. Hlăk anăn, ênưih snăk drei ngă tui si klei lăn ala mplư, ngă soh leh anăn lĕ.
Khua ƀĭng kna Y-Pêtrôs lŏ lač, sa čô mâo klei đăo đĭ hriê kơ prŏng, lŏ thiăm nanao knuih jăk msĕ si Klei Aê Diê Blŭ lač leh jing êlan bi êdah klă kơ klei drei jing hlăm Aê Diê, hur har hĭn “bi sĭt klei Aê Diê iêô leh anăn ruah diih” (II Y-Pêtrôs 1:10). Tơdah drei mprăp nanao klei thâo săng kơ drei pô, drei “amâo srăng lĕ ôh” (êlan 10). Klei jăk jĭn kơ hlei pô dôk kjăp ktuê êlan êbat myang jing “…Aê Diê srăng brei diih mŭt ênưih pưih hlăm ƀuôn ala mtao hlŏng lar Yêsu Krist, Khua Yang leh anăn Pô Bi Mtlaih drei” (êlan 11). Tơdah phung đăo mđing leh anăn hŏng jih ai tiê thiăm nanao knuih jăk Khua Yang lač leh, klei ktang Khua Yang srăng đru drei găn jih jang klei lông dlăng, klei mplư, leh anăn êbat tơl tuč êlan wĭt kơ Ƀuôn Aê Diê, mă tŭ klei jăk jĭn hlŏng lar Aê Diê brei.
Phung đăo kơ Krist knŏng đăo đuč jing ka djăp ôh, ƀiădah wăt brei đĭ hriê kơ prŏng mơh hlăm klei đăo hŏng klei lŏ thiăm jih jang knuih jăk. Boh kơ sa čô mâo klei hdĭp myang đĭ hriê kơ prŏng, leh anăn bi sĭt kơ klei Aê Diê iêo leh anăn ruah jing pô anăn amâo lui wir amâodah lĕ ôh. Klei anăn amâo djŏ čiăng lač pô anăn amâo srăng ngă soh ôh. Ƀiădah Khua ƀĭng kna Y-Pêtrôs čiăng lač drei amâo srăng weh đuĕ mơ̆ng êlan klei hdĭp leh anăn arăng lui hĕ ti tluôn ôh. Kyuanăn, čiăng dưi dôk kjăp leh anăn nao truh ti anôk bi kčah ktuê êlan wĭt kơ Ƀuôn Aê Diê, brei drei bi hdơr nanao kơ drei pô, ăt luă gŭ, knang kơ Yang Mngăt Jăk thiăm nanao knuih jăk Krist. Hur har bi sĭt klei drei jing anak Aê Diê, mâo klei Ñu iêô leh anăn ruah čiăng drei mboh lu kơ Ñu, jing năng kơ Ƀuôn ala mtao Khua Yang drei Yêsu Krist.
Ya drei srăng ngă čiăng amâo lĕ ôh, leh anăn dôk kjăp ktuê êlan êbat wĭt kơ Ƀuôn Aê Diê?
Wah lač: Ơ Khua Yang, thiăm bĕ klei ktang kơ kâo čiăng kơ wăt tơdah kâo tuôm hŏng klei knap mñai amâodah klei lông dlăng ăt hdơr nanao kơ Ih iêô leh anăn ruah kâo leh, čiăng kơ tơdah kâo lĕ buh ăt knang kơ Ih đru kâo lŏ kgŭ dơ̆ng. Đru kâo thiăm nanao knuih jăk siam jăk Krist, dôk kjăp amâo weh đuĕ ôh mơ̆ng êlan wĭt kơ Ƀuôn Aê Diê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: H’Rut 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
