II Pêtrôs 1:9-11
“Ơ ‘nhŏng oh, ‘Bok Kei-Dei krao bơ̆n lui kơ Sư boih, na bơ̆n athei adrin lui mă kơjăp bĕ, na Sư gô iŏk bơ̆n tơpă. Dah bơ̆n adrin lui kiơ̆ thoi noh tơpă, bơ̆n huay kơ achăng lê̆ Sư ôh.” (II Pêtrôs 1:10)
Nơ̆r jet tơchĕng pơwao:
– Pêtrôs tơbăt yua kơ đơ̆ng tơdrong kiơ pơm kơ bơngai lui ‘bônh kơ pơ̆k?
– Sư pơma hơđăl tơdrong kiơ tơgŭm kơ bơngai lui ưh kơ pơ̆k huŏng?
– Pŭn hiôk kơplah bơ̆n kơjăp lăm trong bơ̆n kiơ̆ Kră Yang noh kiơ?
Yôhan tơbăt lăm Mathiơ, I Yôhan 2:16 thoi âu đơ̆ng tơdrong kư̆ kă jơhngơ̆m kon bơngai ‘maih pơm, tơdrong kư̆ kă mơ̆n măt kon bơngai ‘maih lăng, lơ tơdrong tơpă, mơ’nah đei tơmam yua wă pơang akâu sư kơdih noh dôm tơdrong yang satan ba truh tơdrong pơhlŭ, pĕng lê̆ măt pơm kơ bơngai lui ‘bônh dêh kơ pơ̆k huŏng. Jing bơngai lui, Pêtrôs tơbăt dah minh ‘nu bơngai lui kơ Kră Yang bơih mălei ưh kơ pơm tơdrong ‘lơ̆ng, thoi đon lui, pơm ‘lơ̆ng, hŏk pơhrăm, gơh gơ̆t, kĕ chơ̆n, tơdrong lui yom păng tơdrong ‘mêm, jơhngơ̆m băt ‘mêm (II Pêtrôs 1:5-7), “Mă-lei bu ưh kơ pơm kiơ̆ dôm tơdrong noh, bơngai noh sư thoi bơngai măt bơbul, ưh kơ ‘bôh hơdah; păng sư thoi bơngai hiơt kơ ‘Bok Kei-Dei dŏng pơklaih bơ̆n đơ̆ng tơdrong yoch.” (trong 9). Tơdrong arih gah bơhngol ưh kơ wơ̆ pran lei na ‘bônh dêh kơ hiơt kơ tơdrong dŏng pơklaih ăn kơ bơ̆n. Kơplah noh, bơ̆n ‘bônh kơ druh kiơ̆ dôm tơdrong pơhlŭ lăm teh đak, pơm yoch păng pơ̆k huŏng.
Pêtrôs khan dơ̆ng tơdrong arih đon lui wơ̆ pran, pơthim dơ̆ng dôm tơdrong ‘lơ̆ng thoi nơ̆r Kră Yang bơtho noh wă tơbăt rơđah hơđăl anih oei lu bơ̆n lăm Kră Yang ‘Bok Kei-Dei, khan hơđăl, “’Bok Kei-Dei krao bơ̆n lui kơ Sư bơih” (II Pêtrôs 1:10). Pŭn hiôk kơ đe bu kơjăp lăm trong yak năm noh “Thoi noh na ‘Bok Kei-Dei pơchoh kơ bơ̆n trong să, ăn kơ bơ̆n tŏk oei tơ dêh char Yêsu Krist pơgơ̆r ling lang hloi, yua kơ Yŏng bơ̆n Yêsu Krist dŏng pơklaih bơ̆n.” (trong 11). Dah kon pơlei răng mơ̆ng păng adrin đĭ jơhngơ̆m pơthim dôm tơdrong ‘lơ̆ng Kră Yang bơtho, lei na tơdrong pran Kră Yang gô tơgŭm bơ̆n kĕ hlôi đơ̆ng tơdrong pơlong, pơhlŭ na yak trong brŏk tơ plei ‘lơ̆ng truh tôch, iŏk tơdrong pŭn hiôk đơ̆ng Kră Yang ăn.
Bơmgai lui ưh kơ khan lui kơ Kră Yang đĕch tôm mah bơih, na athei wơ̆ pran lăm đon lui hăm trong thim dôm tơdrong đei yua đơ̆ng tơdrong arih gah bơhngol wơ̆ pran păng tơ’bôh tơdrong Kră Yang krao, rơih iŏk noh bơngai ưh kơ dŭn dah pơ̆k huŏng. Tơdrong noh ưh kơsĭ bơngai noh ưh kơ đei layơ pơm yoch. Mălei Pêtrôs wă pơma khan thoi âu lu bơ̆n ưh kơ đei layơ weh đơ̆ng tơdrong arih păng ưh kơ đei achăng lê̆ tơ rŏng. Kơlih kơ thoi ei wă kơ gơh kơjăp păng truh tơ anih pơkă lăm trong năm brŏk tơ plei ‘lơ̆ng, bơ̆n kăl tơ’blŏk bơ̆n kơdih, athei iŏk đon ala bĕ, gơnang kơ Yang Bơhngol ‘Lơ̆ng na thim tơdrong ‘lơ̆ng lăm bơngai lui, băt kơnăl anih noh ‘măn kơ kon ‘Bok Kei-Dei, đei Kră Yang krao păng rơih iŏk wă kơ bơ̆n ling lang đei yua kơ Kră Yang, trŏ kơ arih tơ dêh char ling lang Kră Yang Yêsu Krist.
Ơ Kră Yang! Apinh ‘Bă thim jơhngơ̆m pran wă kơ inh mă tơ’bơ̆p hăm tơdrong truh dah tơdrong pơhlŭ kư̆m ‘blŏk Kră Yang krao păng rơih iŏk inh, păng dah pơ̆k huŏng kư̆m gơnang kơ tơdrong pran Kră Yang wă kơ iung dơ̆ng. Apinh Kră Yang tơgŭm inh adrin đĭ jơhngơ̆m tơdrong ‘lơ̆ng trŏ kơ bơngai lui, kơjăp ưh kơ weh đơ̆ng trong ‘brŏk tơ plei ‘lơ̆ng. Krao khan yua Anăn Kră Yang Yêsu Krist, Amen.
Bơ̆n kăl kơ pơm kiơ wă kơ huay pơ̆k huŏng, păng truh tơ anih pơkă lăm trong brŏk tơ plei ‘lơ̆ng?
Đŏk Sơ̆p Hla bơar ‘Bok Kei-Dei lăm pêng sơnăm: Rut 4
Kênh Youtube BHKTHN:
