II Petus 1:9-11
Nqe cim:
“Yog li ntawd cov kwvtij, nej yuav tsum muab siab rau ua haujlwm heev dua yav tas los thiaj tsimnyog qhov uas Vajtswv hu thiab xaiv nej cia lawm. Yog nej ua li ntawd, nej yuav tsis yuam kev ib zaug li.” (II Petus 1:10)
Lus nug xav:
– Timthawj Petus qhia paub lub vimchiv twg yoojyim ua rau cov ntseeg yuam kev?
– Petus hais tias dabtsi pab tau cov ntseeg tsis yuam kev?
– Koob hmoov thaum peb sawv ruaj hauv txojkev nrog tus Tswv mus yog dabtsi?
Timthawj Yauhas qhia paub hauv I Yauhas 2:16 hais tias qhov kev ntshaw ntawm sab nqaij tawv, lub qhovmuag, thiab kev khav ntawm kev ua neej yog yam uas dab ntxwgnyoog muab los ntxias, plooj cov ntseeg lub qhovmuag kom ua yuam kev. Hais rau seem cov ntseeg Yexus tus kheej, Timthawj Petus qhia tias yog ib tug neeg twb ntseeg tus Tswv tiamsis tsis loj hlob ntxiv qhia tawm ntawm kev ua neej ntseeg, kev ua zoo, paub ntxiv, tswj siab, ua siab ntev, muaj kev ntseeg thiab kev hlub (II Petus 1:5-7), ces nws “qhovmuag fam lawm, nws pom tsis tseeb thiab nws tsis nco qab hais tias Yexus Khetos twb ntxuav nws tej kev txhaum huv tibsi lawm” (nqe 9). Lub neej ntseeg tsis loj hlob ces yoojyim hnov qab tus Tswv txojkev cawm dim pub rau yus. Thaum ntawd, peb yuav yoojyim ua raws tej kev sim ntawm lub ntiajteb, ua txhaum thiab yuam kev.
Timthawj Petus hais ntxiv tias lub neej ntseeg loj hlob, pheej ntxiv tej cwjpwm zoo uas raws li Vajtswv Txojlus qhia yog qhov uas qhia tawm peb lub meejmom nyob hauv Vajtswv, “tsimnyog qhov uas Vajtswv hu thiab xaiv nej cia lawm” (II Petus 1:10). Thaum kawm ntxiv ces yus yuav “tsis yuam kev” (nqe 10). Koob hmoov rau cov uas sawv ruaj khov ntawm txojkev ntseeg yog “muaj feem mus nyob hauv peb tus Tswv Yexus Khetos tus uas yog peb tus Cawmseej lub tebchaws uas nyob mus ibtxhis li” (nqe 11). Thaum Vajtswv cov menyuam ua tib zoo saib thiab siv zog ua zoo ntxiv raws li tus Tswv qhia, ces tus Tswv lub zog yuav pab kom peb tiv dhau tej kev sim siab, kev txhaum thiab taug txojkev ncaj qha mus rau Vajtswv lub tebchaws, txais koob hmoov mus ibtxhis.
Cov ntseeg Yexus tsis yog ntseeg txaus lawm, tiamsis kev ntseeg yuav tsum loj hlob qhia tshwm los ntawm kev ua zoo. Nqi zog ntawm lub neej ntseeg loj hlob thiab tabpov tau Vajtswv hu, xaiv cia ces yog tsis thim rov qab lossis dawm ntog. Qhov ntawd tsis tau txhais tias tus ntawd tsis paub ua txhaum li. Tiamsis Timthawj Petus xav hais tias peb yuav tsis poob txojsia ntev, thiab tsis raug muab tso tseg tom qab. Yog li ntawd, cia kom peb sawv tau ruaj khov thiab mus txog tom kawg uas yog Vajtswv lub tebchaws, peb yuav tau ua tib zoo saib tus kheej, txo hwjchim, vamkhom Vaj Ntsujplig pub tej kev ua zoo ntawm kev ntseeg Yexus, ua tabpov lub meejmom peb yog Vajtswv menyuam, tau Nws hu thiab xaiv los ua neej tawg paj txi txiv pub rau Nws, ua neej tsimnyog rau Yexus Khetos lub tebchaws uas nyob ibtxhis.
Thov Vajtswv,
Vajtswv! Thov Koj ntxiv zog kom nyuam yaus tiv taus tej kev sim siab lossis kev dag ntxias, nco ntsoov tias Koj yog tus hu thiab xaiv nyuam yaus, txawm yog yuam kev los vamkhom tus Tswv tsa sawv. Thov Koj pab kom nyuam yaus paub rau siab ua qhov zoo raws kev ntseeg, sawv ruaj khov txojkev mus ntuj ceebtsheej. Nyuam yaus tuav Tswv Yexus Khetos lub npe thov, Amees.
Peb cheemtsum ua dabtsi kom tsis yuam kev, thiab taug txojkev mus txog ntuj ceebtsheej?
Nyeem Vajluskub hauv peb lub xyoo: Luv 4
Kênh Youtube BHKTHN:
