Hơriso 4:1-8
“Ơ Kră Yang, inh gô ‘bĭch păng tep hiôk-hian; Yua kơ lăp minh ‘nu Ih đĕch ăn kơ inh oei hiôk rơnŭk.” (Hơriso 4:8)
Nơ̆r jet tơchĕng pơwao:
– Ih mơn ‘bôh bơngai chih hla bơar Hơriso 4 tơdrong arih sư thoi yơ?
– Hơriso ‘nâu tơbăt kơ lu bơ̆n tơdrong kiơ gah Kră Yang ‘Bok Kei-Dei păng kon bơngai?
– Lu bơ̆n pơhrăm iŏk tơdrong ayơ păng yua iŏk ‘bai pơhrăm năr âu thoi yơ?
Hơriso chăl 4, jơ̆ nơ̆r krao khan đĭ jơhngơ̆m ‘bok Đawit, lu bơ̆n hăm mơn tơdrong sư krao khan apinh. Sư lui ngeh Kră Yang ‘Bok Kei-Dei jơ̆ Tơ’ngla tơpăt, ‘bĕnh tơdrong ‘mêm (trong 1). Kră Yang ‘măn lu bơngai ‘lơ̆ng ăn kơ Sư, mơ̆ng păng tơl nơ̆r lu sư kiơ̆ trong tơpăt Kră Yang (trong 1, 3). Kră Yang Sư Yang sơng iŏk tơdrong kơkuh păng lăp đon tơmam soi ‘lơ̆ng tơpăt (trong 5). Kră Yang wei lăng, tơgŭm păng ăn kơ inh hiôk rơnŭk (trong 7-8). Minh Kră Yang đĕch ăn kơ bơ̆n hiôk hơđơ̆ng, hiôk rơnŭk păng hơđơ̆ng tơpă. Tơdrong chơt hiôk Kră Yang ăn tih tơpă hloh kơ mơdrŏng đei tơmam lơ.
Hơriso 4 ăn kơ lu bơ̆n ‘bôh đei ‘bar tơdrong arih: Pơtao Đawit păng lu bơngai hli yom kơ Kră Yang gô krao chă păng chu Kră Yang đĭ chăl arih sư. Lăm tơdrong anat truh, lu sư krao apinh dŏng tơgŭm đơ̆ng Kră Yang, lu sư ưh kơ gơnang kơ kon bơngai ôh păng mă tơdrong pran ayơ (trong 1). Lu sư lui ngeh Kră Yang mơsêh, tơpăt ling lang mơ̆ng păng tơl tơwih tôm tơdrong kăl wă. Lu sư pơyơ̆r tơdrong tơpăt pơm tơmam soi ‘lơ̆ng, arih gơnang păng chu nơ̆r Kră Yang (trong 5). Lu sư chă tơdrong chơt hiôk lăm tơdrong tơ’bưh hăm Kră Yang ‘Bok Kei-Dei ưh kơ trŏ chă mŭk tơmam tơ ala teh âu ôh (trong 7). Lu sư đei tơdrong hiôk rơnŭk păng hơđơ̆ng lăm jơhngơ̆m yua kơ Kră Yang băt tôm tơdrong păng tơpăt oei lăm lu sư. Tơplơ̆ dơ̆ng, lu bơngai pơm kơnê̆ kơ Kră Yang chă tơmam tơ ala teh âu wă lăp kơ jơhngơ̆m lu sư chơt hiôk chă tơmam tơ ala teh âu, ‘mêm kơ tơdrong kư̆ kă (trong 2). Ưh kơ lui ngeh kơ tơdrong ‘lơ̆ng Kră Yang (trong 6), lu sư khan tơdrong chơt hiôk lĕch đơ̆ng mơdrŏng păng lu sư druh kiơ̆ tơdrong ‘noh (trong 7). Tuch luch, lu sư ưh kơ lăp jơhngơ̆m păng arih ưh kơ hơđơ̆ng yua kơ dôm tơdrong ‘noh lu sư druh kiơ̆ kư̆ kă đĕch. Ưh kơ đei tơl tơwih kơ lu sư kiơ̆ thoi lu sư wă.
Chăl arih ưh kơ đei chơt hiôk păng hơđơ̆ng jơ̆ chăl arih ưh kơ đei Kră Yang oei hơdai! Minh tơdrong arih hơđơ̆ng ưh kơ sĭ khan ưh kơ tơ’bơ̆p tơdrong truh, mălei chăl arih đei Kră Yang oei hơdai đei Kră Yang wei lăng păng tơgŭm. Lu bơ̆n thoi bơngai ayơ? Tơdrong chơt hiôk ưh kơ trŏ đơ̆ng đei tơmam lơ mălei tơdrong chơt hiôk noh đơ̆ng Kră Yang ăn. Lăm dôm tơdrong apinh Kră Yang ăn kơ bơ̆n đĭ jơhngơ̆m krao apinh Sư, wei lăng hăm tơdrong tơpăt ‘lơ̆ng tơpă, păng tơdrong ‘mêm Kră Yang. Athei lui gơnang kơ Kră Yang, chĕp kơjăp nơ̆r Kră Yang păng yak kiơ̆ trong tơpăt Sư. Lu bơ̆n gô ‘bôh mơn đei tơdrong hơđơ̆ng păng chơt hiôk lăm chăl arih.
Ơ Kră Yang, ưang kơ Ih Yang mơsêh, tơpăt păng ‘mêm kơ inh! Lă pơnăr Ih inh chơt hiôk hơđơ̆ng. Apinh Ih tơgŭm inh ling lang gơnang, chu kiơ̆ nơ̆r Kră Yang, păng băt mơ̆ng nơ̆r Ih, lăng ‘bôh tơdrong jang ‘lơ̆ng Ih lăm chăl arih inh, krao khan yua anăn Kră Yang Yêsu Krist, Amen.
Lu bơ̆n đei chơt hiôk păng hơđơ̆ng tơpă lăm Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Kôrintô 1
Kênh Youtube BHKTHN:
