Bơtho Khôi Juăt 34:1-12
“Đơ̆ng năr noh, lăm lu bơngai Isơrael ưh kơ đei bơngai bu khan lê̆ adrol nhen thoi Môis, mă Kră Yang băt juăt kơ tơ’bơ̆p pơma dơnuh” (Bơtho Khôi Juăt 34:10)
Nơ̆r jet tơchĕng pơwao:
– ‘Bok Kei-Dei tơ’bôh kơ ‘bok Môis tơdrong kiơ adrol kơ sư wă lôch?
– Yua kơ kiơ jô̆ ‘bok Môis ‘noh ‘bok khan adrol gĭt pha ‘biơ̆ lăm ‘Bok Kei-Dei?
– Tơdrong kiơ tơ’bôh bơ̆n lui kơ tơdrong Kră Yang pơgơ̆r?
Kơplah đŏk chăl tuch luch lăm Sơ̆p Hla bơar Bơtho Khôi juăt, lu bơ̆n kư̆m đei hmach ‘biơ̆ kơ ‘bok Môis yua kơ chăl arih sư pơmat pơgơ̆r kon pơlei Isơrael wă năm tơ anih Teh Pơkă, mălei kơdih sư ưh kơ gơh mơ̆t tơ dêh noh wă iŏk dôm tơdrong hiôk hian lăm anih noh, na lăp dơ̆ng tơmang lăng đơ̆ng kơpal kông đĕch. Dah tơchĕng tơdrong ‘nâu lei na gô ưh kơ ‘bôh tơdrong mă gĭt kăl hloh, ‘noh bơih gơh jô̆ kơ ‘bok Môis ‘bok khan lê̆ adrol gĭt pha ‘biơ̆ păng jơ̆ bơngai pơgơ̆r gĭt kăl hăm kon pơlei Isơrael. Tơdrong ‘nâu wă tơbăt đơ̆ng tơdrong ưh kơ đei bơngai pơgơ̆r ayơ lăm kon pơlei Isơrael mă Tơ’ngla ‘Bok Kei-Dei ‘bŭ hơmet, kư̆m ưh kơ đei bơngai khan lê̆ adrol ayơ đơ̆ng rŏng kơ ‘noh gơh tơ’bơ̆p Kră Yang, păng kư̆m ưh kơ đei bơngai bu đơ̆ng rŏng gơh pơm dôm tơdrong tih tin păng hli krưp thoi Kră Yang ăn kơ ‘bok Môis gơh pơm ‘bơ̆t anăp kon pơlei Isơrael.
Gơh pơma, hiôk ‘lơ̆ng dêh tơpă kơ ‘bok Môis kơplah đei ‘Bok Kei-Dei ăn dôm tơdrong gĭt noh. Ưh kơ sĭ ‘bok Môis pơm kơ ‘Bok Kei-Dei lăp đon đĕch, mălei sư kư̆m jing minh ‘nu bơngai pơgơ̆r gĭt hăm kon pơlei Isơrael, đei ‘bơm kơ kon pơlei pơla tih dêh ding mah ‘Bok Kei-Dei ưh kơ đei ăn kơ bơngai bu băt anih bơsat mă Sư ‘bŭ ‘bok Môis tơdrong ‘noh đei wă kơnhăm yua kơ lu sư ‘mêm dêh kơ ‘bok Môis na Sư kuă ăn lu sư băt hli kơ lu sư kơkuh kơ bơsat ‘bok Môis thoi minh ‘nu yang.
Bơ̆n tơchĕng gah ‘bok Môis gơh mơ̆t tơ anih Teh Pơkă lei tơdrong arih sư rai hiôk hian hloh. Mălei ‘noh tơdrong tơchĕng kon bơngai đĕch, yua kơ tơdrong tơchĕng ‘Bok Kei-Dei tih hloh kơ tơdrong tơchĕng bơ̆n ưh kơ băt dang yơ (Êsai 55:8-9). Jing bơngai lui, bơ̆n kăl kơ pơhrăm chu iŏk dôm tơdrong mă khan đei tơdrong truh thoi yơ hĭ, mă bơ̆n hlôh dah ưh kơ hlôh, lei na đĭ đăng tă kơ oei lăm tơdrong tơdă ‘lơ̆ng đơ̆ng ‘Bok Kei-Dei ‘măn kơ tơdrong arih kơ kon Sư ngăl, yua kơ Kră Yang bơih Tơ’ngla pơgơ̆r tôm tơdrong truh lăm teh đak kư̆m thoi tơ kơpal plĕnh. Phŏ phŏ lơ wơ̆t bơ̆n juăt kơ pơma bơ̆n lui kơ Kră Yang pơgơ̆r, mălei dah đei tơdrong kiơ truh mă ưh kơ thoi bơ̆n wă, bơ̆n tơchĕng ưh kơ ngeh tơdrong pơgơ̆r păng tơdrong ‘mêm Kră Yang ‘măn kơ bơ̆n! Dah phŏ phŏ bơ̆n đei tơdrong truh thoi noh, athei lăng tơ tơdrong arih ‘bok Môis, athei ‘blŏk sư bơih minh ‘nu ‘bok khan lê̆ adrol gĭt pha ‘biơ̆ lăm ‘Bok Kei-Dei, tơdrong mă sư ưh kơ gơh mơ̆t tơ anih Teh Pơkă, mălei oei oei lăm tơdrong Kră Yang pơgơ̆r, păng tơdrong noh ưh kơ đei ‘bơm kiơ kơ tơdrong ‘mêm Kră Yang ‘măn kơ sư.
Kơkuh kơ Kră Yang, bơnê kơ Ih ăn kơmĭl ‘lơ̆ng đơ̆ng ‘bok Môis đĭ jơhngơ̆m bơ̆jang kơ Ih. Apinh ăn kơ inh arih đĭ jơhngơ̆m hăm Ih, mă khan đei lơ tơdrong inh ưh kơ hlôh, yua kơ kiơ Ih ăn tơdrong ‘noh truh kơ inh. Apinh Ih tơgŭm ăn kơ inh lui ngeh kơ dôm tơdrong truh kơ chăl arih inh, tă kơ lăm tơdrong tơdă ‘lơ̆ng Ih ‘măn kơ inh ngăl. Krao khan yua anăn Kră Yang Yêsu Krist, Amen.
Hăm đei tơdrong kiơ truh kơ chăl arih bơ̆n pơm kơ bơ̆n mơn ưh kơ lăp đon kơ Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 51
Kênh Youtube BHKTHN:
