Klei Aê Diê Blŭ: I Y-Timôthê 2:9-13
Êlan kliăng: “Kâo čiăng msĕ mơh kơ phung mniê mprăp diñu pô djŏ tui si klei bhiăn, amâo ƀôñ ƀŭk, amâodah mprăp hŏng mah, añŭ yuôm, amâodah hơô ao kdrăm kơah ênoh yuôm ôh. Ƀiădah brei bruă jăk jing kdrăp diñu, tui si jing djŏ kơ phung mniê hưn diñu jing phung mă bruă kơ Aê Diê” (I Y-Timôthê 2:9-10)
Klei êmuh ksiêm mĭn: Ya klei Khua ƀĭng kna Y-Pôl mtă brei phung mniê ngă leh anăn amâo dưi ngă ôh hŏng klei siam ti êngao leh anăn hŏng knuih jăk diñu? Si ngă ñu mtă amâo brei phung mniê mtô ôh leh anăn brei digơ̆ đup gưt kơ phung êkei? Si ngă drei mă yua klei hriăm anei kơ drei pô?
Tơdah klei jhat kơ phung êkei jing klei amâo yơr kngan doh wah lač, klei krêñ leh anăn bi mneh msao, snăn klei jhat kơ phung mniê jing kƀah klei êdu êun, kƀah klei djŏ hnơ̆ng hlăm klei bi siam kơ asei mlei, leh anăn klei amâo đup kơ klei dưi phung êkei.
Êlâo hĭn, Khua ƀĭng kna Y-Pôl blŭ kơ klei phung mniê khăng uêñ mĭn hĭn jing klei siam ti êngao. Sĭt nik Aê Diê brei leh kơ drei asei mlei siam leh anăn yuôm bhăn snăk. Amâo djŏ ñu lač phung mniê huĭ mpŭ kơ Aê Diê knŏng uêñ mĭn kơ klei hdĭp myang, đăm uêñ kơ rup ti êngao ôh. Hrô kơ klei anăn, ñu mtă kơ phung mniê brei ƀar hơô khuăt, mprăp diñu pô djŏ tui si klei bhiăn, amâo hơô ao kdrăm kơah, ênoh yuôm ôh. Yuôm hĭn, dua mta klei srăng mjing phung mniê jing jăk siam hĭn anăn jing klei mprăp hŏng bruă jăk leh anăn dôk ñăt đup gưt (êlan 9-12).
Mprăp bi siam hŏng bruă jăk jing klei lu mnuih tŭ ư. Ƀiădah lĕ, phung bi blah kơ klei mtăp mđơr kơ phung mniê srăng bi kdơ̆ng hŏng klei lač tal dua. “Đup”, tui si klei thâo săng phung tui hlue bruă krŭ kdơ̆ng “bi êngiê phung mniê” jing klei jing hlŭn mnă, jing ti gŭ hĭn, amâo mâo mtăp mđơr ôh. Ƀiădah boh blŭ “đup” tinei lŏ mblang jing “gưt tui si; dưm pô ti gŭ klei dưi sa čô mnuih”, boh blŭ anei lač kơ klei djŏ pruê̆, kơ klei dưi, amâo djŏ lač kơ ênoh ôh. “Đup” amâo mtrŭt mjhar kơ klei mĭn mpŭ kơ êkei, mưč kơ mniê ôh, kyuadah Aê Diê hrih êkei, mniê jing yuôm msĕ sơăi (Klei Mphŭn Dơ̆ng 1:27). Ƀiădah, “brei diih ngă jih jang klei hŏng klei kpă leh anăn djŏ pruê̆” (I Kôrantô 14:40). Sa phung kahan srăng jing mtŭk mtŭl tơdah amâo mâo ôh pô gĭt gai. Sa boh gŏ sang srăng jing mtŭk mtŭl mơh tơdah phung anak amâo čiăng gưt asăp ôh kơ amĭ ama. Jing mniê, wăt tơdah thâo lu dưn mơh, ăt brei mâo klei mpŭ mơh kơ êkei. Ngă klei mtô, mưč kơ êkei jing klei amâo bhiăn ngă ôh.
Drei dôk hdĭp hlăm ênuk arăng dlăng yuôm kơ klei siam ti êngao msĕ si ară anei, mâo klei mtă kơ phung mniê đăo leh kơ Yêsu Krist, brei ƀar hơô djŏ tui si klei bhiăn, đăm ƀar hơô mơiêng ao kdrăm kơah ênoh yuôm ôh. Drei hdĭp kơ Khua Yang, duah ênoh drei hlăm Khua Yang. Akâo Khua Yang đru drei êlâo hĭn mprăp bi siam hĭn kơ drei pô, amâo djŏ hŏng mơiêng ao ôh, ƀiădah hŏng bruă jăk leh anăn hŏng klei gưt asăp. Jing êkei, brei drei yua klei dưi drei bi mơak kơ Khua Yang leh anăn ba klei tŭ dưn kơ phung mniê hlăm gŏ sang.
Si ngă drei dôk bi ksiêm mkă hdơ̆ng drei hŏng kdrăp čŭt hơô, mnơ̆ng bi siam kơ asei mlei leh anăn hŏng klei siam ti êngao mơ̆?
Wah lač: Ơ Khua Yang, kâo lač jăk kơ Ih bi hriăm kâo thâo klei djŏ kơ klei siam ti êngao, wăt kơ klei mpŭ leh anăn gưt kơ klei dưi phung êkei hlăm gŏ sang leh anăn Phung Sang Aê Diê. Đru kâo jing sa čô êkei, sa čô mniê siam ti anăp ală Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
