I Timautes 2:9-13
Nqe cim:
“Kuv xav kom txhua tus pojniam paub txajmuag. Nyias yuav tsum tu nyias lub cev tsis txhob cia siv hle zab hle zuav lossis hnav tej tsoos tsho uas tsis tsimnyog hnav; tsis txhob ntxias plaubhau kom txawv luag zej luag zos lossis tsis txhob coj tej saw nyiaj saw kub lossis hnav tej tsoos tsho uas kim kim. Tiamsis txhua tus pojniam yuav tsum ua haujlwm zoo pab lwm tus thiaj tsimnyog qhov uas lawv hais tias lawv yog cov ntseeg Vajtswv” (I Timautes 2:9-10)
Lus nug rau sawvdaws xav:
– Timthawj Paulus ntuas cov pojniam tsimnyog ua thiab tsis tsimnyog ua yam dabtsi ntsig txog qhov kev zoo nkauj sab nraud thiab sab hauv?
– Vim li cas Paulus qhia tias cov pojniam tsis muaj cai qhia thiab yuav tsum mloog cov txiv lus?
– Peb siv zaj kawm no rau yus zoo li cas?
Qhov teebmeem ntawm cov txivneej yog tsis tsa txhais tes dawbhuv thov Vajtswv, sib chim thiab sib cav, ces cov pojniam yog tsis tu cev kom tsimnyog, tsis ua zoo saib qhov kev tu tus kheej thiab teebmeem mloog cov txiv lus.
Thawj qhov, Timthawj Paulus hais txog seem tus pojniam nyiam ua yog zoo nkauj sab nraud. Tseeb tiag, lub cev ntaj ntsug uas tus Tswv pub rau peb yeej zoo thiab muaj nqis. Paulus tsis yog hais kom tus pojniam ntseeg yuav tsum tu sab ntsujplig xwb tsis tu sab nqaij tawv. Tiamsis Paulus ntuas cov pojniam hnav tej tsoos tsho tsimnyog, tu cev kom phim, tsis txhob lam tu cev txawv txawv coj los khav. Qhov tseemceeb, ob yam uas ua rau ib tug pojniam zoo nkauj yog ua zoo thiab mloog lus (nqe 9-12).
Tu tus kheej zoo nkauj los ntawm kev ua zoo ces yuav muaj ntau leej lees yuav. Tiamsis cov pojniam uas tsav hwjchim yuav ntsib kev tawmtsam. “Mloog lus”, raws li cov neeg nyiam kev “tso pojniam ywjpheej” nkag siab ces yog raug yuam ua qhev, yog poob qis thiab tsis muaj vajhuam sib luag. Tiamsis lo lus “mloog lus” hauv ntu Vajluskub no muaj lub ntsiab tias “kam nyob qis; tso yus qis dua ib tug neeg”. Lo lus no hais txog cov theem, meejmom, tsis yog hais txog qhov muaj nqis. “Mloog lus” tsis yog hais kom cov txivneej saib tsis taus cov pojniam, pojniam thiab txivneej yeej muaj nqis ib yam nkaus (Chivkeeb 1:27). Txawm yog li ntawd los, “cia li ua txhua yam raws li tsimnyog ua thiab raws li txoj kevcai” (I Kauleethaus 14:40 – Hmowsv). Ib pab tubrog yuav ntxhov yog hais tias tsis muaj tus coj. Ib lub tsevneeg yuav ntxhov yog tias tsis kam mloog niamtxiv lus. Pojniam, txawm yuav txawj ntse npaum twg, los yuav tsum saib taus tus txivneej. Muaj tus cwjpwm qhia, tsav hwjchim rau tus txivneej yog qhov uas tsis tsimnyog ua.
Peb tabtom ua neej nyob rau tiam lub ntiajteb saib qhov kev zoo nkauj sab nraud tseemceeb, cov lus uas qhia kom hnav tsoos tsho tsimnyog, zoo saib rau cov pojniam ntseeg cheemtsum heev. Peb ua neej pub rau tus Tswv, nrhiav qhov yus muaj nqis hauv tus Tswv. Thov Vajtswv qhia kom peb paub xaiv qhov uas yus zoo nkauj, tsis yog ris tsho hnav, coj nyiaj cob kub tiamsis yog ua zoo thiab mloog lus. Yog ib tug txivneej, peb cheemtsum siv lub meejmom kom haum tus Tswv siab thiab ua kom muaj nqis pub rau cov pojniam nyob hauv tsevneeg.
Thov Vajtswv,
Tus Tswv, ua tsaug uas Koj qhia nyuam yaus txog kev zoo nkauj tseeb, kev saib taus thiab mloog cov txivneej lus nyob hauv tsevneeg thiab Pawg Ntseeg. Thov Koj cia peb cov uas yog pojniam, txivneej zoo nkauj rau koj seem. Nyuam yaus tuav Tswv Yexus lub npe thov, Amees.
Peb ib leeg puas ntau nqi rau ib leeg los ntawm kev hnav tsoos tsho, coj nyiaj coj kub sab nraud?
Nyeem Vajluskub hauv peb lub xyoo: Tes Haujlwm 4
Kênh Youtube BHKTHN:
