I Timôthê 2:9-13
“Gah tơdrong abĕn ao lu bơngai drŏ-kăn, inh ưh kơ wă kơ sư hrŭk abĕn ao wă pơang akâu kơdih đĕch. Păng inh ưh kơ wă kơ sư pơm sŏk sư wă pơang kơ đe; păng ưh kơ wă kơ sư ‘bot tơmam maih hơdah anam kăp. Inh ưh kơ wă kơ sư hrŭk ao rŏ kăp jên mơ̆n. Bơngai bu lui kơ ‘Bok Kei-Dei sư ưh kơ gơh pơm thoi noh ôh. Sư athei đei đon ‘mêm mơnat kơ đe păng asong đe tơmam.” ( I Timôthê 2:9-10)
Nơ̆r jet tơchĕng pơwao:
– ‘Bok Pôl bơtho bơngai drŏkăn gơh pơm păng ưh kơ gơh pơm tơdrong kiơ gah tơdrong pơguăng gah ‘nguaih kư̆m thoi tơdrong ‘lơ̆ng lăm lu sư kơdih?
– Yua kơ kiơ sư bơtho lu bơngai drŏkăn ưh kơ gơh bơtho păng athei chu yom bơngai drŏnglo?
– Lu bơ̆n yua iŏk ‘bai pơhrăm âu kơ bơ̆n kơdih thoi yơ?
Tơdah lu bơngai drŏnglo yơ̆r ti mă ưh kơ rơgoh ‘lơ̆ng na krao khan, lei pơjah pơjăng băl, noh lu bơngai drŏkăn pơguăng ưh kơ ‘lơ̆ng lăm tơdrong pơguăng lu sư păng lăm tơdrong chu yom bơngai drŏnglo.
Blŭng a, ‘Bok Pôl pơma gah cheng lu bơngai drŏkăn juăt kơ tơchĕng tơtăm ‘noh jơ̆ tơdrong pơm ‘lơ̆ng gah ‘nguaih. Mă khan lei ră, Akâu jăn đơ̆ng Kră Yang ăn kơ lu bơ̆n tơm sư khan ‘lơ̆ng păng gĭt găl. Sư ưh kơ đei khan lu bơngai drŏkăn lui yom lăp tơchĕng tơdrong ‘lơ̆ng gah bơhngol đĕch, ‘nĕ kơ hiơ̆k kơ gah ‘nguaih. Mălei noh, sư bơtho lu bơngai drŏkăn athei hrŭk hơbăn ao mă ‘lơ̆ng, pơguăng lăp ai păng mă hơiă, ‘nĕ kơ pơguăng hloh kơ lu bơngai drŏkăn jing bơngai ‘lơ̆ng hloh ‘noh pơguăng hăm tơdrong pơm ‘lơ̆ng păng oei hreh na chu yom (trong 9-12).
Pơguăng hăm tơdrong pơm ‘lơ̆ng ‘noh jơ̆ tơdrong đei lơ bơngai lăp đon. Mă khan lei ră, lu bơngai pơjah wă kơ lei-lăi lăm lu bơngai drŏkăn dêh tơpă lăm tơdrong mă ‘bar “chu yom” kiơ̆ kơ tơdrong hlôh lu bơngai “tơ’ngla rơngei bơngai drŏkăn” jing đĭch đam , oei ưh kơ kĕ păng ưh kơ hơtŏ hơnơ̆ng.
Mă khan thoi ei, nơ̆r “chu yom” âu wă khan “chu yom tơ ala; chu dan tơ ala bu ‘noh. Nơ̆r âu pơma kơ tơdrong pơgơ̆r kơjung kơđeh, bơngai gơh jang, ưh kơ sĭ tơdrong gĭt găl ôh. “Chu yom” ưh kơ lăp đon kơ
tơdrong tơchĕng hlôh kơ tơdrong gĭt kơ bơngai drŏnglo, ưh kơ gĭt kơ bơngai drŏ kăn, yua kơ Kră Yang pơjing bơngai drŏnglo, drŏkăn gĭt sư lei-lăi đĕch (Blŭng a 1:27). Mă khan thoi ei ră, “Mălei iĕm athei akŭm ‘blep trŏ thoi Kră Yang wă, ‘nĕ kơ akŭm kư̆kă” (I Kôrintô 14:40). Minh grŭp linh gô kơdâu tơrơ dah ưh kơ đei bơngai pơgơ̆r. Minh pôm hnam dơnŏ gô chhŭr nuih tơdah kon hơ’lơ̆p ưh kơ chu yom mĕ ‘bă. Bơngai drŏkăn, mă hơgei dang yơ, kư̆m athei pơyom mă tơpă hăm lu bơngai drŏnglo. Iŏk jơhngơ̆m đon bơtho, pơm pơhloh kơ lu bơngai drŏnglo noh ưh kơ trŏ. Lu bơ̆n oei arih lăm teh đak mă ‘lơ̆ng hơiă gah ‘nguaih đe ‘maih lăng dêh dang ei, nơ̆r bơtho athei hrŭk hơbăn ao mă ‘lơ̆ng, mă lăp măt, ưh kơ wă kư̆kă, yua kơ tơdrong gĭt dêh kơ lu bơngai drŏkăn bơngai lui. Lu bơ̆n arih ăn kơ Kră Yang, chă tơdrong gĭt ăn kơ Kră Yang, apinh Kră Yang ăn kơ bơ̆n hơdrol hloh pơm kơ bơ̆n mă ‘lơ̆ng hloh ưh kơ sĭ yua đơ̆ng hơbăn ao, đơ̆ng pơguăng, mă lei đơ̆ng tơdrong pơm ‘lơ̆ng păng tơdrong chu yom. Jơ̆ bơngai drŏ nglo, lu bơ̆n kăl kơ pơm kơ Kră Yang lăp đon păng ba ăn tơdrong đei yua ăn kơ lu bơngai drŏ kăn lăm hnam dơnŏ.
Ơ Kră Yang, bơnê kơ Ih bơtho inh gah tơdrong pơguăng ‘lơ̆ng mă trŏ gah ‘nguaih, kư̆m thoi tơdrong pơyom, chu yom gơh pơm trŏ bơngai drŏ nglo lăm hnam dơnŏ păng Khul Bơngai Lui. Apinh ăn kơ inh lu bơngai drŏ kăn, drŏ nglo ‘lơ̆ng hơiă kiơ̆ kơ măt Ih lăng. Yua Anăn Kră Yang Yêsu Krist. Amen.
Lu bơ̆n hăm pơma pơ ư băl gah hơbăn ao, pơguăng gah ‘nguaih ưh?
Đŏk Sơ̆p Hla ar ‘Bok Kei- Dei lăm pêng sơnăm: Tơdrong Jang 4
Kênh Youtube BHKTHN:
