Klei Aê Diê Blŭ: Klei Mtô Mñă Klei Bhiăn 15:6-11
Êlan kliăng: “Brei diih brei kơ gơ̆ hŏng klei ênưih, leh anăn diih amâo srăng mâo ai tiê ktrŏ ôh êjai brei kơ gơ̆; kyuadah kyua klei anăn Yêhôwa Aê Diê diih srăng hơêč hmưi klei jăk jĭn kơ diih hlăm jih jang bruă leh anăn hlăm jih jang klei diih ngă.” (Klei Mtô Mñă Klei Bhiăn 15:10).
Klei êmuh ksiêm mĭn: Ya klei Aê Diê mprăp tơdah thŭn Sabat giăm truh? Si Aê Diê iêu kơ phung hngah brei kơ ayŏng adei drei čan hlăm mmông anăn? Si klei bhiăn Aê Diê mtô kơ phung ƀuôn sang Ñu kơ knhuah brei ayŏng adei čan? Hŏng si knhuah drei khăng đru mnuih mkăn?
Tơdah mtrŭn klei mtă kơ thŭn bi êngiê nư, Aê Diê thâo êlâo leh srăng mâo lu mnuih kyua thŭn Sabat giăm truh snăn diñu hngah amâo brei phung ƀun ƀin čan ôh kyuadah diñu thâo sĭt kơ nư anăn digơ̆ amâo hmao tla wĭt ôh, diñu srăng luč hĕ sa ênoh prăk. Aê Diê pia klei tĭng yap anăn jing “klei mĭn jhat hlăm ai tiê”. Ñu mtă: “Răng bĕ huĭdah mâo klei mĭn jhat hlăm ai tiê diih…” (êlan 9a), tơl tơdah phung mdrŏng sah hngah đru phung ƀun ƀin jŭm dar diñu hlăk mmông anăn srăng mâo klei soh tơdah phung ƀun ƀin ur kwưh truh kơ Aê Diê (êlan 9c). Diñu ngă soh kyuadah klei diñu uêñ mĭn jing huĭdah prăk diñu luč kyua klei bhiăn thŭn bi êngiê nư hĭn kơ klei uêñ mĭn kơ klei dleh knap ayŏng adei pô.
Aê Diê jing Pô mdrŏng hŏng klei khăp, snăn klei bhiăn Ñu ăt bi êdah wăt hlăm klei anăn mơh. Hlăm klei mâo sĭt klă anei, klei bhiăn Aê Diê mtô kơ phung ƀuôn sang Ñu đăm khăng ai tiê, đăm kpăt kngan kơ̆ng pioh prăk ti anăp klei knap mñai phung riêng gah ôh. Bi klăk hŏng klei anăn, brei phung ƀuôn sang Aê Diê đru phung ƀun ƀin anăn, hĭn mơh brei đru hŏng ai tiê khăp kmah, amâo mâo hŏng klei mgô̆, tŭ ư wăt luč liê prăk dưn kyua năng ai phung ƀun anăn amâo dưi tla wĭt ôh dŏ čan. Klei anei brei ƀuh Khua Yang čiăng kơ phung ƀuôn sang Ñu thâo khăp, thâo pap tơdah dôk ti anăp klei kƀah knap phung ƀun ƀin, snăn mblang bi prŏng kngan kăp đru digơ̆, amâo djŏ ôh knŏng ngă khă bi leh klei bhiăn Khua Yang mtô.
Mâo mơh đa klei đru amâo kbiă hriê mơ̆ng klei mơak ôh ƀiădah mơ̆ng klei huĭ. Drei huĭdah srăng soh hŏng Khua Yang tơdah drei amâo đru sa čô mnuih dôk găn klei dleh dlan êjai anăn drei mâo klei dưi đru. Klei mtrŭt kyua klei huĭ anăn ngă kơ drei đru mnuih mkăn hŏng klei mgô̆ ƀiădah amâo mâo sĭt čiăng mơ̆ng ai tiê ôh. Aê Diê jing Pô ƀuh jih hlăm lam ai tiê grăp čô mnuih snăn amâo yuôm ôh drei wĭt ngă klei msĕ snăn hŏng Ñu. Hrô kơ klei anăn, akâo kơ Khua Yang brei drei mâo klei mgei ai tiê thâo khăp thâo pap ti anăp phung dôk găn klei dleh knap kăp kah mbha, thiê brei. Sĭt yơh hjăn păn drei amâo dưi đru jih jang mnuih ƀun ƀin ôh, ƀiădah tơdah jih jang phung đăo drei bi mguôp mbĭt bi đru phung dôk găn klei dleh knap, sĭt nik drei srăng dưi ngă sa klei bi mlih prŏng hlăm ƀuôn sang Aê Diê dưm.
Si ngă drei uêñ mĭn čiăng đru phung dleh knap hŏng klei kmah mơ̆?
Wah lač: Ơ Khua Yang, jing Aê Diê klei khăp. Akâo kơ Ih yua klei khăp Ih khăp leh kơ kâo brei kâo thâo khăp kơ mnuih mkăn, kăp mblang prŏng kngan đru phung riêng gah kâo dôk găn klei dleh dlan
Dlăng Klei Aê Diê Blŭ hlăm tlâo thŭn: Klei Mmuñ Hđăp 76:1-12; 77:1-20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
