II.Kevcai 15:6-11
Nqe cim:
“ Nej yuav tsum zoo siab hlo muab rau nws ntawm lub siab dawb paug, tus Tswv thiaj yuav foom koob hmoov rau txhua yam uas nej ua” (nqe 10).
Lus nug rau sawvdaws xav:
– Vajtswv ua dabtsi ua ntej xyoo Xanpataus los yuav txog?
– Tus Tswv muab cov neeg uas tsis kam qiv nyiaj rau nws cov kwvtij hu licas?
– Vajtswv txoj kevcai qhia rau Nws haivneeg kom muaj lub siab qiv txais nyiaj rau tej kwvtij zoo licas?
– Koj pheej muaj lub siab pab lwm tus zoo licas?
Thaum muab txojcai hais txog xyoo xuam nujnqis, Vajtswv qhia paub yuav muaj ntau leej thaum ze rau lub xyoo Xanpataus lawv tsis kam qiv txais nyiaj rau cov neeg txomnyem, vim lawv paub hais tias cov nyiaj qiv ntawd luag yuav tsis them rov los, yuav poob cov nyiaj ntawd. Vajtswv muab qhov uas lawv npaj siab li ntawd hu ua “muaj lub siab xav phem”. Nws qhia hais tias: “Nej tsis txhob muaj lub siab xav phem…” (nqe 9b), cov neeg npluanuj uas tsis kam pab cov neeg txomnyem nyob ibncig lawv yuav muaj txim txhaum yog hais tias cov neeg txomnyem quaj thov tus Tswv pab (nqe 9c). Lawv ua txhaum vim lawv ntshai tej nyiaj txiag poob rau xyoo xuam nujnqis heev dua li uas hlub tshua cov neeg txomnyem tsis muaj dabtsi.
Vajtswv yog tus uas muaj nplooj siab hlub, yog li Nws txoj kevcai qhia tawm qhov ntawd. Raws li qhov kev cheemtsum no, tus Tswv txoj kevcai qhia rau Nws haivneeg tsis txhob ua neeg qia dub, tsis txhob muab pob nyiaj khaws cia tsis kam pab cov neeg txomnyem nyob ibncig. Tiamsis tus Tswv haivneeg yuav tsum pab cov neeg txomnyem ntawd, pab los ntawm kev zoo siab hlo, ua siab dawb paug, tsis khuvxim, txaus siab poob nyiaj txiag vim tej zaum cov neeg txomnyem yuav them tsis taus rov qab. Qhov no qhia paub tus Tswv xav kom Nws haivneeg muaj kev hlub, hmov tshua cov neeg txomnyem lub neej thiab zoo siab hlo cev tes pab lawv, tsis txhob yog mloog tus Tswv Txojlus qhia tas tsis ua raws.
Muaj tej yam kev pab tsis yog tuaj ntawm lub siab zoo siab hlo tuaj tiamsis yog tuaj ntawm lub siab ntshai tuaj. Peb ntshai tsam tshuav tus Tswv nqi yog hais tias yus tsis kam pab ib tug neeg txomnyem twg thaum yus txaus peevxwm pab. Peb tsis xav pab los vim qhov kev ntshai yuam kom peb pab lwm tus xwb. Vajtswv yog tus paub txhua tus tibneeg lub siab yog li tsis tas peb yuav ua zoo li ntawd rau tus Tswv. Tsimnyog peb cia li thov Vajtswv pab kom yus muaj lub siab hlub tshua cov neeg txomnyem thiab zoo siab hlo pab, pub rau lawv. Txawm yog peb tus kheej pab tsis tau tas cov neeg txomnyem, tiamsis yog tagnrho peb cov ntseeg Yexus koom tes pab lawv ces ntseeg thiab cia siab hais tias peb yuav muaj kev hloov pauv nyob hauv cov ntseeg Yexus.
Koj puas kam pab cov neeg txomnyem los ntawm lub siab dawb paug thiab?
Thov Vajtswv,
Vajtswv, Koj yog tus Tswv muaj kev hlub. Koj twb muab Koj txojkev hlub los hlub nyuam yaus yog li thov Koj pab kom nyuam yaus muab txojkev hlub ntawd mus hlub tau lwm tus, txaus siab hlo cev tes pab cov neeg txomnyem nyob ibncig nyuam yaus. Amees.
Nyeem Vajluskub hauv peb lub xyoo: Phau Ntawv Nkauj 76:1-77:20
Kênh Youtube BHKTHN:
