Klei Aê Diê Blŭ: I Kôrantô 3:1-8
Êlan kliăng: “Kâo čiêm leh diih hŏng êa ksâo, amâo djŏ hŏng mnơ̆ng ƀơ̆ng khăng ôh. Kyuadah diih ka dưi tŭ mnơ̆ng ƀơ̆ng khăng ôh; leh anăn wăt ară anei kăn diih dưi tŭ rei, kyuadah diih ăt jing phung tui si kđeh” (I Kôrantô 3:2-3a)
Klei êmuh ksiêm mĭn: Ya boh blŭ Khua ƀĭng kna Y-Pôl yua čiăng lač kơ Phung Sang Aê Diê ƀuôn Kôrantô? Ti anôk ñu kna ñu blŭ msĕ snăn? Klei bi mguôp drei hŏng gŏ sang, hŏng phung mah jiăng, leh anăn hŏng Phung Sang Aê Diê brei ƀuh drei jing mnuih tui si kđeh hĕ amâodah mnuih tui si Yang Mngăt Jăk?
Hlăm kdrêč 2, Khua ƀĭng kna Y-Pôl bi kah phung tui hlue klei thâo mĭn ênuk anei, phung ñu pia jing “phung srăng êgao tuč sĭt” amâodah phung amâo tuôm thâo săng ôh klei thâo mĭn hgăm leh anăn ka bi êdah ôh” (I Kôrantô 2:6-8) hŏng phung “mă tŭ Mngăt Myang mơ̆ng Aê Diê” amâodah “phung khăp kơ Ñu” (I Kôrantô 2:9, 12), amâodah lač snei, ñu dôk bi kah “mnuih yang đar” hŏng “mnuih myang”. Hlăm trăn Klei Aê Diê Blŭ hruê anei, ñu đru drei thâo kral dua phung mnuih mâo leh klei bi mtlaih, anăn jing mnuih tui si kđeh leh anăn mnuih tui si Yang Mngăt Jăk (êlan 1).
Khua ƀĭng kna Y-Pôl blŭ hŏng klei khăng leh anăn kpă snăk hŏng phung đăo tinei. Ñu pia kơ digơ̆ jing “mnuih tui si kđeh”, “phung anak điêt hlăm Krist”, jing phung ñu čiêm hŏng êa ksâo, si tô hmô klei mtô êđal kơ klei đăo, čiăng bi hriăm digơ̆, kyuadah ñu lač digơ̆ “ka dưi tŭ mnơ̆ng ƀơ̆ng khăng ôh” (êlan 1-2). Tlâo blư̆ ñu lač kơ digơ̆ jing mnuih tui si kđeh (êlan 1-3). Ti anôk ñu kna ñu blŭ msĕ snăn? Ăt ñu kna ti klei ñu blŭ leh mơ̆ng kdrêč 1: “Kyuadah êjai mâo klei nač leh anăn klei bi mneh msao hdơ̆ng diih” (êlan 3). Khua ƀĭng kna Y-Pôl lač, klei bi keh nač, klei bi mneh msao jing klei bi knăl kơ sa čô mnuih tui si kđeh, jing anak điêt hlăm klei hdĭp myang. Mnuih prŏng leh srăng khăp leh anăn duah êlan hdĭp êđăp ênang hŏng mnuih mkăn. Bi phung hđeh điêt lĕ, diñu khăp kơ klei bi tăng mgăl leh anăn bi mneh msao kyua klei điêt dhiêt. Drei dưi thâo kral klei sa čô mnuih bi mguôp hŏng Aê Diê hŏng klei dlăng kơ klei pô anăn bi mguôp hŏng mnuih mkăn. Sa čô mâo klei nač, bi mneh msao nanao hŏng pô mkăn, snăn wăt tơdah ñu hur har nao kơ sang Aê Diê, mâo klei thâo săng kơ klei Aê Diê Blŭ, wăt ñu jing sa čô mnuih mă bruă hlăm Phung Sang Aê Diê, jing mnuih blŭ thâo knhâo mtô dưn, ñu ăt jing sa čô mnuih đăo tui si kđeh mơh. Mnuih khăp kơ Aê Diê sĭt nik ñu srăng khăp leh anăn duah klei êđăp ênang hŏng jih jang phung riêng gah.
Phung Sang Aê Diê jing sa boh gŏ sang hlăm anăn Aê Diê jing Ama. Ƀiădah ênguôt đei, hruê anei mâo lu Phung Sang Aê Diê tinăn tăp năng klei khăp jing klei blŭ lu hĭn kơ klei ngă. Hlăm Phung Sang Aê Diê, klei nač, klei bi kah mbha phung, klei bi mneh msao, klei bi blŭ jhat …lu hĭn kơ klei thâo bi pap, thâo bi khăp, thâo bi jum, msĕ si Khua Yang khăp leh anăn jum leh drei. Klei hriăm bi hriăm drei kơ klei bi mguôp hŏng mnuih mkăn, brei grăp čô drei jing mnuih tui si Yang Mngăt Jăk đru ba klei êđăp ênang kơ jih jang mnuih, leh anăn hŏng jih ai tiê bi grăng hĕ jih jang klei amâo thâo bi djŏ.
Mâo mơ̆ klei amâo bi djŏ hlăm klei bi mguôp hŏng Phung Sang Aê Diê brei drei lŏ bi grăng hĕ?
Wah lač: Ơ Khua Yang, bi mni kơ Ih kyua klei Khua ƀĭng kna Y-Pôl mtă hŏng klei khăng leh anăn hŏng klei kpă kơ phung đăo ti ƀuôn Kôrantô wăt kơ kâo pô. Đru kâo hdĭp hŏng klei thâo khăp, thâo pap brei leh anăn dôk jăk hŏng mnuih mkăn, kyuadah Ih jing Khua Yang kơ klei bi grăng. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Ôsê 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
