I Kauleethaus 3:1-8
Nqe cim:
“Kuv muab mis rau nej noj xwb, kuv tsis muab mov thiab zaub rau nej noj, rau qhov nej tseem noj tsis tau taus zaub mov. Txawm yog nimno los nej tseem noj tsis tau taus thiab” (I Kauleethaus 3:2)
Lus nug xav:
– Timthawj Paulus siv cov lus twg los piav txog cov ntseeg nyob hauv Pawg Ntseeg Kauleethaus?
– Vim qhov twg Paulus hais li ntawd?
– Txojkev sib raug zoo ntawm peb nrog tsevneeg, phoojywg thiab Pawg Ntseeg qhia paub peb yog neeg nqaij tawv lossis yog neeg ntsujplig?
Nyob hauv tshooj 2, Timthawj Paulus cais meej cov neeg caum lub tswvyim ntiajteb, Paulus muab lawv hu ua “cov yuav ploj mus” lossis “tsis muaj ib tug paub lub tswvyim ntawd” (I Kauleethaus 2:6-8) thiab cov neeg “txais yuav Vaj Ntsujplig” lossis “cov neeg hlub Vajtswv” (I Kauleethaus 2:9,12). Ua lwm seem lus hais, Paulus cais cov neeg “nqaij tawv” thiab neeg “ntsujplig”.
Hauv ntu Vajluskub hnub no, Paulus qhia rau peb paub cais ob hom neeg uas twb dim: neeg ntiajteb thiab neeg tshiab (nqe 1).
Timthawj Paulus hais hnyav thiab ncaj qha rau cov ntseeg. Paulus muab lawv hu ua “neeg ntiajteb”, “menyuam mos hauv Yexus Khetos”, cov neeg uas Paulus muab mis rau lawv noj, txhais tau tias yog cov neeg tsis paub kev ntseeg, cia kom qhia tau lawv, Paulus hais tias lawv noj tsis taus zaub mov (nqe 1-2). Paulus hais peb zaug tias lawv yog neeg ntiajteb (nqe 1-3). Vim qhov twg Paulus hais li ntawd? Kuj yog raws li qhov teebmeem uas Paulus hais hauv tshooj 1: “Yog nej tseem muaj kev sib khib thiab ib leeg nrog ib leeg sib cav sib ceg” (nqe 3). Timthawj Paulus hais tias khib, sib ntxub, sib cav yog lub cim ntawm neeg ntiajteb, tus uas tsis muaj kev ntseeg ua. Tus neeg loj hlob yeej paub hlub thiab nrhiav kev ua neej sib raug zoo nrog lwm tus. Menyuam yaus ces nyiam sib cav sib ceg heev kom yeej swb thiab nthe nrov nrov tej yam tsis muaj qab hau. Peb yuav paub tau ib tug neeg muaj kev sib raug zoo nrog Vajtswv los ntawm qhov uas peb pom nws muaj kev sib raug zoo nrog lwm tus. Tus neeg uas pheej khib, ua tsis haum lwm tus ces txawm yog nws nquag mus tom tuamtsev, paub Vajtswv Txojlus, ua haujlwm hauv Pawg Ntseeg, txawj hais lossis txawj qhia npaum twg los tus neeg ntawd yeej tseem yog tus ntseeg nqaij tawv xwb. Tus neeg hlub Vajtswv yeej yuav hlub thiab nyiam sib raug zoo nrog tej neeg ib ncig.
Pawg Ntseeg yog tsevneeg uas Vajtswv yog Leej Txiv. Tiamsis yog ib qhov tu siab, nimno muaj ntau lub Pawg Ntseeg yog qhov chaw hais kev hlub ntau dua nqis tes ua. Nyob nauv Pawg Ntseeg, txojkev khib, faib pab, sib tw, thuam neeg…ntau dua li uas ua siab ntev, sib hlub, ib leeg txais yuav ib leeg, ib yam li tus Tswv hlub thiab txais yuav peb. Zaj kawm no qhia txog peb txojkev sib raug zog nrog lwm tus, peb txhua tus yuav tsum yog neeg tshiab ua rau sawvdaws muaj kev sib haumxeeb, thiab pab kho tej kev tsis sib haum kom zoo tuaj.
Thov Vajtswv,
Vajtswv, ua Vajtswv tsaug vim muaj Timthawj Paulus cov lus qhia meej thiab ncaj rau cov ntseeg hauv nroog Kauleethaus thiab nyuam yaus. Thov pab kom nyuam yaus ua neej sib hlub, ua siab ntev, nyob sib haum nrog lwm tus, vim tus Tswv yog tus uas ua kom sawvdaws nyob sib haum. Nyuam yaus tuav Tswv Yexus lub npe thov, Amees.
Puas muaj qhov kev tsis sib haum twg nyob hauv peb Pawg Ntseeg es Vajtswv siv peb los ua tus kho?
Nyeem Vajluskub hauv peb lub xyoo: Hauxeyas 8
Kênh Youtube BHKTHN:
