I Kôrintô 3:1-8
“Inh athei ăn kơ iĕm huch đak toh đĕch, ưh kơ gơh ăn kơ iĕm sa tơmam arăng ôh, yua kơ iĕm ưh kơ kĕ ôh iŏk tơdrong ‘noh. Mă-lei dang ei iĕm kư̆m oei hơnơ̆ng lei-lăi thoi noh đĕch” (I Kôrintô 3:2)
Nơ̆r jet tơchĕng pơwao:
– ‘Bok Pôl đei yua nơ̆r ayơ wă roi pơdah kơ lu bơngai lui tơ pơlei Kôrintô?
– Đơ̆ng tơdrong kiơ na sư gơh pơma thoi noh?
– Tơdrong tơ’bưh lăm hnam dơnŏ, buŏl juăt păng Khŭl Bơngai lui tơ’bôh ăn kơ bơ̆n bơngai kiơ̆ sĕch akar lei mă bơngai lui ‘lơ̆ng?
Lăm chăl mă 2, Pôl đei pơma pơting kơ tơdrong lu bơngai kiơ̆ kơ tơdrong gơh hơgei kon bơngai kiơ̆ thoi lăm chăl âu, na sư khan kơ lu bơngai noh “gô hiong răm” dah mă “lu sư ưh kơ băt kơ tơdrong hlơp ‘Bok Kei-Dei đei ôn” (I Kôrintô 2:6-8) hăm bơngai mă “sơng iŏk Yang Bơhngol ‘Lơ̆ng đơ̆ng ‘Bok Kei-Dei” dah mă “lu bơngai mă ‘mêm kơ Kră Yang” (I Kôrintô 2:9,12). Pơma pha ra wă khan sư pơting kơ bơngai “sĕch akar” păng “bơngai đei đon lui”.
Lăm Sơ̆p hla bơar Nơ̆r ‘Bok Kei-Dei năr âu, Pôl tơgŭm bơ̆n đei ‘bôh kơ bơngai mă ‘Bok Kei-Dei đei dŏng pơklaih bơih: Wă khan đei 2 khul bơngai arih oei kiơ̆ kơ sĕch akar păng bơngai arih ‘lơ̆ng kiơ̆ thoi đon lui (trong 1).
Pôl đei pơma pran păng tơpăt kơ lu bơngai lui lăm âu. Sư đei krao kơ lu sư khan “bơngai sĕch akar” “nhen thoi oei nghe lăm Yê-su Krist”, lu bơngai mă sư khan nhen thoi oei rong hăm đak toh, wă khan dôm tơdrong ‘bônh kơđeh wă đei bơtho lu sư, yua kơ lu sư ưh kơ gơh sa “tơmam hơrăk” (trong 1-2), Pêng wơ̆t Pôl khan kơ sư bơngai oei kiơ̆ thoi sĕch akar (trong 1-3). Sư iŏk đơ̆ng tơdrong kiơ na gơh pơma tơdrong thoi noh? Sư iŏk đơ̆ng chăl 1 tơl ăn tơdrong âu noh jơ̆ yua kơ “lăm lu iĕm oei đei tơdrong hơreh păng tơgar băl” (trong 3). Pôl đei pơma hơđăl ‘ngeng, ưh kơ iă, tơgar, pơjah noh jơ̆ tơ’bôh kơ bơngai oei kiơ̆ thoi sĕch akar wă, noh jơ̆ nhen thoi bơngai oei nge đĕch. Bơngai wơ̆ tơ̆l noh jơ̆ bơngai đei tơdrong ‘mêm păng chă tơdrong hiôk hơiă hăm bơngai nai. Bơngai oei nge ling lang kơ chă tơdrong wă pơjei băl păng pơm tơdrong đơ̆ng tơdrong iĕ jing tơdrong tih. Lu bơ̆n đei ‘bôh tơdrong tơbưh hăm kon bơngai bơ̆n tơ’bôh ăn tơdrong hlơp bơ̆n tơ’bưh hăm ‘Bok Kei-Dei. Bơngai ling lang chă tơdrong pơjah, pơm ăn tơdrong ưh kơ đei minh jơhngơ̆m đon mă khan bơngai ‘noh pơnam kơnăm tơ hnam akŭm, dah mă hlôh wao nơ̆r ‘Bok Kei-Dei, mă khan tơgŭm pran lăm hnam akŭm mă khan bơtho hơgei dang yơ ră mă lei sư jơ̆ minh ‘nu bơngai sĕch akar. Bơngai bu mă ‘mêm kơ Kră Yang ‘Bok Kei-Dei lei trŏ tơpă sư gô ‘mêm mơnat păng adrin arih hiôk hơiă hăm bơngai oei jum dăr kơ sư.
Khul bơngai lui jơ̆ hnam dơnŏ wă khan ‘Bok Kei-Dei jơ̆ ‘Bă lu bơ̆n. Mă lei sơ’ngon tơpă, dang ei đei lơ hnam akŭm tơdrong ‘mêm jơ̆ ưh kơ pơm mă lei pơma păng nơ̆r đĕch. Lăm Khul Bơngai Lui, tơdrong ngeng, pơm tơklah tơklang, pơma roi ‘bơm…lơ hloh kơ tơdrong mơnat ăn, ‘mêm mơnat, sơng iŏk dih băl, nhen thoi Kră Yang ‘mêm păng sơng iŏk bơ̆n. ‘bai pơhrăm âu tơblŏk ăn kơ bơ̆n tơdrong tơ’bưh hăm bơngai nai, rim ‘nu kơ bơ̆n kăl kơ pơm ăn tơdrong noh păng đĭ jơhngơ̆m tơgŭm tơdrong ưh kơ ‘lơ̆ng jing ‘lơ̆ng lăm hnam akŭm.
Ơ Kră Yang, bơnê kơ Ih đei nơ̆r tơblŏk pran dêh đơ̆ng Pôl ăn kơ bơngai lu tơ pơlei Kôrintô păng ăn kơ inh. Apinh Ih ăn kơ inh arih đei ‘mêm mơant, hiôk hơiă hăm bơngai nai, yua kơ Ih jơ̆ tơ’ngla ‘long sơlam ăn kơ lu nhôn. Yua anăn Kră Yang Yêsu Krist. Amen
Tơdrong kiơ tơblŏk ăn kơ bơ̆n blŏk khan bơ̆n jơ̆ đĭch đam ‘Bok Kei-Dei?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hôsia 8
Kênh Youtube BHKTHN:
