Klei Aê Diê Blŭ: I Bruă Mtao 19:1-18
Êlan kliăng: “Hriê bĕ kơ kâo, Ơ jih jang mnuih êmăn leh anăn gui ktrŏ, leh anăn kâo srăng brei diih mdei. Brei diih đua knông kâo leh anăn hriăm mơ̆ng kâo, kyuadah kâo jing ênang leh anăn mâo ai tiê luă gŭ; leh anăn mngăt diih srăng mdei.” (Y-Mathiơ 11:28-29).
Klei êmuh ksiêm mĭn: Ya klei truh ngă kơ khua pô hưn êlâo Y-Êli dlưh ai tiê klei mĭn? Si klei ñu lŏ kdơ̆ng wĭt? Si klei êdu êun, klei jăk Aê Diê bi êdah kơ ñu? Ya klei drei mă hriăm mơ̆ng klei bi hmô êdu êun mơ̆ng Aê Diê?
Hlăm klei bi kdơ̆ng tlă anăp hŏng 450 khua pô hưn êlâo yang Baal, knŏng hjăn mnơ̆ng myơr ngă yang mơ̆ng khua pô hưn êlâo Y-Êli mâo pui Aê Diê trŭn čuh ƀơ̆ng (I Bruă Mtao 18). Tơdah hmư̆ kơ phung khua pô hưn êlâo yang Baal arăng bi mdjiê jih, mo ̆ mtao Y-Ahap jing mtao mniê H’Jêsêbel arưp aram čiăng bi mdjiê khua pô hưn êlâo Y-Êli, snăn ñu huĭ êran đuĕ dăp. Dơ̆ng mơ̆ng ƀuôn Jesrêel ñu êran nao truh ti ƀuôn Bêr-Sêba, knông lăn čar Yuđa. Leh jih sa hruê êbat hlăm kdrăn tač, ñu dôk gŭ ti gŭ sa ƀĕ ana kyâo akâo čiăng djiê leh anăn lač, ñu amâo jing jăk hĭn kơ phung aê ñu ôh, leh anăn ñu đih pĭt. Dĭng buăl jăk êrâo ñu dua bliư̆, brei kơ ñu bêñ ăm ksă leh anăn êa mnăm. Khua pô hưn êlâo kgŭ ƀơ̆ng mnăm, snăn ñu lŏ mâo ai ktang êbat pă pluh hruê pă pluh mlam truh ti čư̆ Hôrep jing čư̆ Sinai, anôk Aê Diê brei klei bhiăn kơ Y-Môis, leh anăn ñu mŭt đăm hlăm ƀăng cư̆.
Tinei, khua pô hưn êlâo lŏ êlŏk hngah lu mta klei amâo djŏ hŏng Aê Diê ôh. Aê Diê iêu ñu kbiă kơ tač dôk dơ̆ng ti dlông čư̆ ti anăp Aê Diê, kyuadah Ñu amra găn tinăn. Mâo tlâo mta klei truh hŏng ngĭn prŏng ktang, klei yơ̆ng lăn ala leh anăn pui trơ̆ng ƀiădah amâo mâo Aê Diê dôk hlăm anôk anăn ôh. Ti knhal tuč Aê Diê yua asăp blŭ djơ djĕ blŭ hŏng khua pô hưn êlâo Y-Êli. Ñu thâo kral asăp Khua Yang, snăn ñu mă ao jhŭng guôm ƀo ̆ mta ñu leh anăn kbiă nao dôk dơ̆ng ti mbah ƀăng čư̆. Aê Diê lŏ êmuh khua pô hưn êlâo Y-Êli sa bliư̆ dơ̆ng, “Ya klei ih dôk ngă tinei?” Ñu lŏ êlŏk hngah msĕ si êlâo mơh. Aê Diê jao kơ ñu bruă nao trôč êa ƀâo mngưi kơ tlâo čô, ngă mtao leh anăn khua pô hưn êlâo, leh anăn brei ñu thâo Aê Diê mprăp leh kjuh êbâo čô amâo tuôm čuôn kơŭt ti anăp yang Baal ôh, ƀiădah khua pô hưn êlâo Y-Êli amâo thâo ôh.
Bi mni lač jăk kơ Aê Diê kyuadah Ñu jing êdu êun êdimima, gĭr ktĭr hŏng khua pô hưn êlâo Y-Êli. Wăt tơdah ñu dlưh ai tiê klei mĭn, klei đăo trŭn hrŏ, ƀiădah Aê Diê ăt pap brei, ăt khăp kơ ñu mơh. Wăt tơdah klei ñu blŭ pia êlŏk hngah amâo mâo klă, ƀiădah Khua Yang kăn ƀuah bi kmhal ñu rei, leh anăn Aê Diê ăt yua asăp êdu êun djơ djĕ blŭ hŏng ñu mơh. Aê Diê lŏ bi mrâo ñu dơ̆ng mơ̆ng asei mlei kđeh, klei mĭn leh anăn lŏ bi ktang mngăt ai tiê ñu.
Khua Yang Yêsu lač: “kâo jing ênang leh anăn mâo ai tiê luă gŭ” leh anăn Ñu brei kơ drei êlan kliăng čiăng dưi mâo klei mdei hlăm Ñu (Y-Mathiơ 11:28-29). Hruê anei, Yang Mngăt Jăk jing Pô Juh, yua hdruôm hră Klei Aê Diê Blŭ jing klei Ñu Blŭ čiăng đru kơrŭ drei (Y-Yôhan 14:16). Hlăm Yang Mngăt Jăk, drei mâo boh êdu êun (Galati 5:22). Grăp čô drei tui hriăm klei bi hmô êdu êun, luă gŭ mơ̆ng Aê Diê Tlâo Yang čiăng đru kơrŭ ayŏng amai adei drei, bi đru hdơ̆ng drei dôk kjăp hlăm Khua Yang kăp mă bruă kơ Ñu.
Si ngă drei mâo klei êdu êun, thâo gĭr hlăm klei hdĭp mơ̆?
Ơ Khua Yang, bi mni lač jăk kơ Ih kyua “Klei Ih Blŭ brei kâo dưi lŏ hdĭp, anăn jing klei bi juh kâo hlăm klei knap mñai.” Akâo kơ Khua Yang brei kâo êdu êun nanao bi đru hdơ̆ng găp hlăm gŏ sang wăt hlăm Phung Sang Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Phung Khua Phat Kđi 20:19-48
Kênh Youtube BHKTHN:
