Hơriso 90:12
“Apinh Ih bơtho lu nhôn băt kơ jô̆ khei năr lu nhôn arih. Wă kơ lu nhôn đei jơhngơ̆m đon hơgei,” (Hơriso 90:12)
Nơ̆r jet tơchĕng pơwao:
– Yua kơ kiơ ‘bok Môis apinh Kră Yang bơtho sư băt kơ jô̆ khei năr?
– Bơ̆n hlôi yua jơ năr lăm sơnăm 2025 ‘nâu thoi yơ bơih?
– Bơ̆n hŏk iŏk tơdrong kiơ lăm sơnăm hlôi bơih păng apinh Kră Yang ăn kơ bơ̆n hơmet tơplih tơdrong kiơ wă kơ bơ̆n đei jơhngơ̆m đon hơgei lăm Kră Yang?
Lơ bơngai lăm lu bơ̆n tơchĕng hlĭch kơ đon yua kơ kiơ ‘bok Môis tă tơ apinh Kră Yang bơtho sư wă kơ băt jô̆ khei năr sư arih. Kon bơngai bơ̆n arih lăm teh đak âu kơbĭ dôm yơ sơnăm ôh na khan mah pă băt jô̆ hloi bơih ‘nei! ‘Nhŏ lu bơngai ‘lơ̆p ‘nao minh ‘bar sơnăm đĕch ră đei pơhrăm jô̆ bơih,lei yua kơ kiơ ‘bok Môis ‘nâu bơngai đei hŏk pơhrăm pơtơ̆p pơjuăt lăm anih pơtao Pharaôn,sư bơngai pơgơ̆r lu đe Isơrael, pơgơ̆r gơh hơgei dang noh, na ‘nhŏ jô̆ sơnăm sư arih lăm teh đak âu ưh kơ gơh ‘mơ̆i liơ ‘nei? Tơpă thoi noh,’bok Môis hlôi krao apinh Kră Yang bơtho sư wă kơ sư “băt jô̆”yua kơ sư ‘bôh kơdih akâu sư ăp mă đơ̆ng Kră Yang tơ’bôh pơchrang ăn ‘mơ̆i na sư gơh băt, gơh hlôh hlăi. Đơ̆ng Yang Bơhngol ‘Lơ̆ng bơtho tơ’bôh chông anhăk ‘mơ̆i na sư “đei jơhngơ̆m đon hơgei”tơpă đơ̆ng Kră Yang ăn.
Bơngai tơblang nơ̆r ‘Bok Kei-Dei anăn sư H.D.M.Spence sư tơblang nơ̆r tơ kơpal ‘noh hei thoi âu: “Apinh Ih bơtho lu nhôn băt tơchĕng pơwao kơ chăl arih nhôn lăm teh đak âu kơđeh đĕch, wă kơ nhôn đei jơhngơ̆m đon gơh hơgei.” Adrol kơ ‘bok Môis apinh Kră Yang bơtho sư wă kơ sư băt jô̆ khei năr sư arih, sư băt kơnăl kơ “sơnăm arih ‘bônh kơ tôch,gô lôch hiong..” (Hơri so 90:10). Trŏ kơ sơ’ngon dêh mưh lơ bơngai tam mă hlôh, tam mă băt kơ chăl arih sư kơdih kơđeh. Lơ bơngai oei nŏng kơ chă wă kơ đei pơm tih,wă kơ đe ư-ang anăn sư, wă kơ mơdrŏng sah rơkah kai,ưh kơ băt kơ chăl arih lăm teh đak âu kơđeh, mưh lôch ưh kơ đei chĕp ba kiơ,mălei oei hăt nŏng kơ chơchă dôm tơdrong mă ưh kơ yua noh. Ăp mă layơ ei kơ kon bơngai bơ̆n băt hơđăl kơ bơ̆n arih âu kơnhăm wă ư-ang kơ Kră Yang, băt hơđăl kơ bơ̆n arih âu kơnhăm wă kơ đei tơdrong arih ling-lang, lei ‘mơ̆i na gơh đei jơhngơ̆m đon hơgei tơpă păng gơh đei pŭn hiôk tơpă.
Pơtơm wă juă lăm sơnăm ‘nao sơnăm 2026, bơ̆n athei lăng lăng sơnăm hlôi bơih noh, lơ ‘măng lơ wơ̆t bơ̆n arih, jang, pơm ưh kơ jing, lơ ‘măng bơ̆n yoch glăi,păng lơ ‘măng bơ̆n achăng lê̆ dôm lu jơ trŏ’blep,trŏ kơ pơm dôm tơdrong ‘lơ̆ng.Bơ̆n kư̆m athei wang ‘blŏk dơ̆ng dôm pŭn hiôk đêl Kră Yang ăn wă pơyơ̆r nơ̆r bơnê ư-ang kơ Sư.Apinh Yang Bơhngol ‘Lơ̆ng tơgŭm kơ rim ‘nu bơ̆n băt yua iŏk jơ năr wă kơ arih gơh hơgei lăm Kră Yang. Băt ‘măn jơ năr pơhrăm hlôh nơ̆r Kră Yang, arih rok, pơm kiơ̆ wă pơhrôp đơ̆ng jơhngơ̆m akâu jăn truh tơ tơdrong lui,tơdrong arih gah bơhngol ‘lơ̆ng ‘nao yua kơ đơ̆ng nơ̆r Kră Yang noh.Băt yua iŏk jơ năr wă kơ hiôk chơt hăm hnam dơnŏ, bơtho pơhrăm ăn kơ lu kon sâu. Mă kăl hloh, athei yua iŏk jơ năr mă Kră Yang oei pơih ăn kơ bơ̆n ‘nâu wă bơtho ră roi Tơrong ‘Nao ‘Lơ̆ng Sư kơ lơ bơngai. Kră Yang Yêsu khan “Tơ hnam ‘Bă Inh đei lơ anih oei tơpă.Dah ưh kơ đei Inh kư̆m khan ưh kơ đei mơ̆n.Na dang ei Inh wă năm hơmet kơ iĕm anih. Đơ̆ng rŏng kơ Inh năm hơmet kơ iĕm anih oei, Inh gô jur tơ âu dơ̆ng, Inh wă anhăk ba iĕm tơ anih Inh; na iĕm oei hơdai hăm Inh ling-lang tơ ei (Yôhan 14:2-3). Yua kơ noh bơih na bơ̆n athei đĭ jơhngơ̆m krao khan wă kơ Kră Yang ăn kơ jơhngơ̆m đon bơ̆n gơh hơgei.hnhoi lăng tơ tơdrong lơ̆ng rŏ Kră Yang păng hnhoi lăng tơ tơdrong arih ling-lang tơ Dêh char Pơlei ‘lơ̆ng mă oei oei khŏm khŏm ưh kơ layơ tôch noh.
Kơkuh kơ Ih Kră Yang, inh bơnê kơ Ih ‘Bă, yua kơ lăm sơnăm hlôi bơih noh, Ih bơwei, ih tơgŭm mơnat kơ inh lăm tôm tơdrong.Apinh Yang Bơhngol ‘Lơ̆ng bơtho inh băt kơ chăl arih kon bơngai lăm teh đak âu kơđeh, băt kơnăl kơ tơdrong hơgei đơ̆ng Ih,tơdrong arih inh hnhoi lăng tơ tơdrong arih ling-lang tơ Pơlei lơ̆ng Ih. Inh krao khan yua anăn Kră Yang Yêsu Krist, Amen!
Bơ̆n krao khan apinh Kră Yang bơtho wă kơ bơ̆n băt kơ jô̆ khei năr bơ̆n arih noh thoi yơ bơih?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong jang 19.
Kênh Youtube BHKTHN:
