Klei Aê Diê Blŭ: Klei Mmuñ Hđăp 90:12
Êlan kliăng: “Snăn bi hriăm hmei thâo yap hruê hmei dôk hdĭp, čiăng kơ ai tiê hmei dưi mâo klei thâo mĭn.” (Klei Mmuñ Hđăp 90:12)
Klei êmuh ksiêm mĭn: Ya ngă Y-Môis akâo kơ Aê Diê mtô ñu thâo yap hruê? Si drei yua leh hruê mmông thŭn 2025? Ya klei drei hriăm leh hlăm thŭn êgao leh anăn ya klei drei akâo kơ Khua Yang bi mlih čiăng mâo klei thâo mĭn hlăm Khua Yang?
Lu mnuih hlăm phung drei bi kngăr snăk ya ngă Y-Môis akâo kơ Khua Yang mtô ñu yap hruê hlăm klei hdĭp ñu. Klei hdĭp anak mnuih hdĭp bhiâo dŭm pluh thŭn đuč kyua anăn dưi drei yap! Phung hđeh mơ̆ng sa dua thŭn ăt hriăm yap leh mơh snăn ya ngă sa čô mnuih mâo klei bi hriăm leh hlăm sang mtao Pharaôn, sa čô khua gĭt gai knhâo knhăk msĕ si Y-Môis amâo dưi čŏng yap hruê klei hdĭp pô? Klă sĭt snăn, Y-Môis wah lač akâo kơ Khua Yang mtô ñu “thâo yap” kyua ñu ƀuh ñu knŏng dưi thâo leh anăn thâo săng tơdah mâo Aê Diê mtrang. Mơ̆ng klei Yang Mngăt Jăk ktrâo atăt, ñu klă sĭt “mâo klei thâo mĭn” Aê Diê brei.
Pô ksiêm hriăm Klei Aê Diê Blŭ H.D.M. Spence mblang klei yuôm bhăn êlan anei snei: “Akâo kơ Aê Diê mtô hmei thâo ksiêm mĭn kơ klei bhiâo riâo rit hlăm klei hdĭp, čiăng kơ hmei dưi mâo sa ai tiê thâo mĭn”. Êlâo kơ Y-Môis akâo kơ Aê Diê mtô yap hruê ñu, ñu thâo săng leh snei “thŭn hmei găn pral leh anăn hmei djiê” (Klei Mmuñ Hđăp 90:10). Ênguôt snăk tơdah lu mnuih ka thâo săng, ka thâo săng ôh klei hdĭp pô bhiâo riâo rit snăk. Lu mnuih ăt khăp duah kơ anôk bruă, klei hing ang, klei mdrŏng sah, ƀiădah amâo thâo săng ôh klei hdĭp bhiâo đei, djiê hĕ amâo dưi ba mbĭt ya mta ôh, ƀiădah ăt gĭr jih ai tiê duah ya klei hơăi mang anăn. Knŏng tơdah anak mnuih thâo săng klă klei kñăm hlăm klei hdĭp, mđing kơ klei hdĭp hlŏng lar kơh mâo klei thâo mĭn sĭt leh anăn dưi dưn klei jăk mơak hlŏng lar.
Mprăp mŭt hlăm thŭn 2026, brei drei lŏ dlăng wĭt sa thŭn êgao lu blư̆ drei amâo tŭ jing, soh čhuai leh anăn lui hĕ dŭm mmông găl ngă ya klei jăk siam. Brei drei hrăm mbĭt lŏ bi hdơr klei jăk mơak Aê Diê brei čiăng myơr klei bi mni. Akâo kơ Yang Mngăt Jăk đru grăp čô drei thâo yua hruê mmông čiăng hdĭp thâo mĭn. Thâo pioh hruê mmông mjuăt bi hriăm mơ̆ng klei suaih pral asei mlei truh kơ klei mlih mrâo hlăm mngăt kyua Klei Aê Diê Blŭ. Thâo yua hruê mmông čiăng mơak dưn klei jăk mơak gŏ sang, mtô anak čô. Êlâo hĭn, brei yua hruê mmông Aê Diê brei čiăng hiu hưn Klei Mrâo Mrang Jăk Aê Diê kơ jih jang mnuih. Khua Yang Yêsu lač: “Hlăm sang Ama kâo mâo lu anôk dôk; tơdah amâo djŏ snăn ôh, kâo hưn leh kơ diih. Kâo srăng nao mkra sa anôk kơ diih. Leh anăn tơdah kâo nao mkra sa anôk kơ diih, kâo srăng lŏ hriê leh anăn mă diih kơ kâo pô, čiăng kơ ti anôk kâo dôk diih dưi dôk msĕ mơh” (Y-Yôhan 14:2-3). Kyua anăn, brei jih ai tiê wah lač čiăng mâo ai tiê thâo mĭn, mđing kơ klei guh kơang Aê Diê leh anăn klei hdĭp hlŏng lar hlăm anôk hlŏng lar.
Si drei akâo kơ Khua Yang mtô čiăng thâo yap hruê drei pô?
Wah lač: Ơ Khua Yang, kâo bi mni kơ Ama răng kriê leh anăn brei klei hơêč hmưi kơ kâo hlăm jih thŭn êgao. Akâo kơ Yang Mngăt Jăk mtô kâo thâo săng klei bhiâo hlăm klei hdĭp anak mnuih, thâo klei thâo mĭn, mđing kơ klei kñăm klei hdĭp kâo kơ klei hdĭp hlŏng lar. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
https://www.youtube.com/c/bhkthn
