Klei Aê Diê Blŭ: I Kôrantô 15:9-11.
Êlan kliăng: “Kơ klei anăn kâo mă bruă suăi, yua jih klei ktang Ñu êjai bi blah, klei ktang anăn dôk mă bruă hlăm kâo hŏng klei myang.” (Kôlôs 1:29).
Klei êmuh ksiêm mĭn: Ya ngă Khua ƀĭng kna Y‑Pôl lač ñu mă bruă lu hĭn kơ phung mkăn? Mơ̆ng klei ñu mă bruă kơ Aê Diê brei ƀuh si ngă klei Aê Diê pap kơ ñu? Hbĭl klei drei mă bruă hlăm Sang Aê Diê srăng mâo klei yuôm bhăn?
Khua ƀĭng kna Y‑Pôl lač hŏng phung đaŏ Sang Aê Diê Kôrantô, “kâo mă bruă suăi hĭn kơ jih jang diñu.” Amâo dleh ôh čiăng kơ drei thâo ƀuh boh blŭ bi êdah klei ñu gĭr ktưn mă bruă hlăm hră čih: “tui duah” (I Kôrantô 10:33; Bruă Phung Khua Ƀĭng Kna 24:16), “mă bruă hŏng kngan” (I Kôrantô 4:12), “mă bruă hruê mlam” (I Têsalônik 2:9)… Ñu amâo hưn ôh ƀiădah ñu čiăng lač kơ phung đaŏ dôk mgao hlăm klei hdĭp mngăt kơ klei Aê Diê brei, ñu pô ngă leh lu bruă hĭn kơ phung mkăn ƀiădah ñu amâo hưn ôh kơ asei pô kyua ñu ngă amâo djŏ kyua klei ñu thâo ôh ƀiădah kyua klei Aê Diê Pap dôk mbĭt hŏng ñu (êlan 10).
Khua ƀĭng kna Y‑Pôl bi mklă klei Aê Diê pap brei kơ klei hdĭp ñu amâo djŏ jing hơaĭ mang ôh. Mơ̆ng leh dưi mâo klei pap prŏng prĭn anăn, ñu thâo săng klei hdĭp ñu mâo amâo srăng yua kơ hdră kñăm hjăn ôh, ƀiădah kyua hdră kñăm Aê Diê mdưm hlăm klei hdĭp ñu (Galati 2:20). Khua ƀĭng kna Y‑Pôl bi mklă jih jang bruă ñu ngă leh kơ Aê Diê jing kyua klei pap Aê Diê brei, leh anăn ñu ăt lač snăn hŏng phung đaŏ ti Philip: “Kâo dưi ngă jih jang klei hlăm Krist, Pô bi ktang kâo” (Philip 4:13). Kyua ñu thâo săng klei yuôm bhăn mơ̆ng klei Aê Diê pap brei kơ ñu, anăn ñu sĭr suôr mă bruă kơ Aê Diê, wăt tơdah arưp kơ klei hdĭp ñu. Ñu ba yua jing hruê mông, hnêč jih hruê mlam kyua čiăng dưi mâo lu mnuih thâo kơ Anăn Khua Yang Yêsu Krist (I Kôrantô 9:19, 23). Ƀiădah klei êdah kdlưn hĭn, jing bruă ñu thâo klei Aê Diê Pap brei leh kơ ñu, amâodah pia klei mkăn jing Aê Diê ngă bruă mơ̆ng ñu, asei mlei ñu knŏng jing kdrăp, jing mnơ̆ng amâo năng ôh mâo Aê Diê mơak yua đuč.
Mă bruă kơ Aê Diê hlăm bruă hiu hưn Klei Mrâo Mrang Jăk leh anăn dŭm bruă mkăn jing klei năng mpŭ. Klei mă bruă srăng yuôm bhăn hĭn sĭt bruă ngă anăn kbiă mơ̆ng ai tiê drei hdơr knga hŏng Aê Diê. Drei ăt khăng hmư̆ klei blŭ hlăm Sang Aê Diê snei “Amâo mâo kâo snăn bruă anăn mâo dưi bi leh ôh!” “Hlăm sang Aê Diê ya ngă knŏng ƀuh hjăn bruă kâo ngă”… Brei drei răng, tơdah amâo răng drei ênưih srăng lĕ hlăm klei mplư ngă mgao hlăm mngăt sĭt ƀuh pô dưi ngă lu bruă kơ Aê Diê. Brei drei hdơr nanao, “amâo djŏ kâo pô ôh, ƀiădah klei Aê Diê pap dôk mbĭt hŏng kâo.”
Drei ƀuh mơ̆ klei Aê Diê pap dôk mbĭt sĭt mă bruă kơ Aê Diê?
Wah lač: Ơ Khua Yang! Kâo bi mni lač jăk kơ Ih kyua klei bi mtlaih Ih brei kơ kâo, akâo kơ Ih đru kâo hdơr knga leh anăn thâo săng wăt tơdah kâo dưi mă lu bruă jăk snăn amâo djŏ kyua kâo pô ôh, ƀiădah jing klei Aê Diê pap dôk mbĭt hŏng kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 13:23-14:30
Kênh Youtube BHKTHN:
