Klei Aê Diê Blŭ: II Kôrantô 10: 12-18
Êlan kliăng: “Hmei amâo jhŏng bi mđơr amâodah bi msĕ hmei pô hŏng phung bi mni kơ diñu pô ôh. Ƀiădah tơdah diñu bi mkă diñu pô hdơ̆ng diñu pô, leh anăn tơdah diñu bi msĕ diñu pô hdơ̆ng diñu pô,… Tui si Klei Aê Diê Blŭ lač, “Brei hlei pô bi mni kơ ñu pô srăng bi mni kơ ñu pô hlăm Khua Yang” (II Kôrantô 10:12, 17)
Klei êmuh ksiêm mĭn: Ya hnơ̆ng čuăn phung phung khua pô mtô soh mă čiăng bi mni kơ diñu pô? Ya hnơ̆ng kčah Khua ƀĭng kna Y-Pôl krơ̆ng djŏ leh anăn ya klei ñu čang hmăng kơ Sang Aê Diê Kôrantô? Ñu mtă kơ grăp čô si bi mni kơ pô?
Hlăk êjai phung phung khua pô mtô soh hlăm Sang Aê Diê Kôrantô bi mni kơ diñu pô leh anăn kƀah thâo mĭn “diñu bi mkă diñu pô hdơ̆ng diñu pô, leh anăn tơdah diñu bi msĕ diñu pô hdơ̆ng diñu pô”, jing diñu mă hnơ̆ng kčah lăn ala jing mnơ̆ng mkă kơ klei thâo mĭn diñu, snăn Khua ƀĭng kna Y-Pôl lač ñu amâo jhŏng dlăng pô mđơr ôh, amâodah bi msĕ pô hŏng phung khua pô mtô soh adih ôh. Ñu amâo jhŏng bi mni kơ ñu pô êgao hnơ̆ng ôh ƀiădah knŏng krơ̆ng djŏ “hnơ̆ng” jing hnơ̆ng Aê Diê kčah leh kơ ñu tơdah Aê Diê ba ñu nao kơ phung đăo ti Sang Aê Diê Kôrantô (êlan 13). Khua ƀĭng kna Y-Pôl thâo hnơ̆ng kčah pô, thâo bruă klam, klei myang Aê Diê brei čiăng ngă bruă Ñu jao. Hlăm hnơ̆ng kčah anăn, ñu ăt čiăng phung đăo Kôrantô hdơr ñu jing mnuih tal êlâo ba Klei Mrâo Mrang Jăk kơ digơ̆, kyua anăn ñu mâo klei dưi hlăm klei hdĭp mngăt diñu amâo djŏ msĕ hŏng klei phung khua mtô soh blŭ luar ngă kơ phung ƀuôn sang tinei đing klei dưi Khua ƀĭng kna Y-Pôl (êlan 14). Leh anăn kyua jing mnuih tal êlâo ba Klei Mrâo Mrang Jăk kơ phung đăo Kôrantô, anăn hĭn kơ pô mkăn, ñu čang hmăng digơ̆ mâo klei đăo hriê kơ prŏng, kyua klei anei srăng đru bi lar bruă Aê Diê, jing “dưi mtô klei mrâo mrang jăk hlăm čar êgao kơ čar diih…” (êlan 15-16).
Klei mplư ngă mgao, čiăng kơ arăng thâo leh anăn čih yap ai tiê pô srăng ngă kơ drei čŏng bi mni kơ pô. Khua ƀĭng kna Y-Pôl mtă kơ phung đăo Kôrantô snei:“Brei hlei pô bi mni kơ ñu pô srăng bi mni kơ ñu pô hlăm Khua Yang” (êlan 17), amâodah blŭ mkăn, brei grăp čô ƀuh klei myang Aê Diê dôk mă bruă hlăm ai tiê luă gŭ drei, amâo djŏ ôh čŏng bi mni kơ pô leh anăn phung mkăn ƀuh drei hŏng kdŏng, “amâo mâo klei thâo săng ôh” (êlan 12).
Grăp blư̆ tuôm hŏng klei mplư bi msĕ boh tŭ pô hŏng pô mkăn, brei drei mdih, kyua klei pap Aê Diê mkă pô hŏng hnơ̆ng čuăn, hdră kčah, hdră kñăm Aê Diê brei kơ klei hdĭp pô. Ngă snăn, drei srăng ƀuh hnơ̆ng kčah pô, mbĭt anăn srăng akâo klei pap mơ̆ng Aê Diê brei čiăng bi leh bruă klam Ñu jao. Tơdah Sang Aê Diê mâo lu phung mgao, bi mni kơ ñu pô leh anăn bi kah mbha snăn klei myang Aê Diê amâo mă bruă hlăm phung snăn ôh, kyua anăn bruă Aê Diê amâo đĭ kyar. Brei knŏng ktưn hưn, bi mni kơ pô hlăm Aê Diê đuč!
Ya klei mplư dôk ngă kơ drei bi mni kơ pô amâodah bi msĕ pô hŏng pô mkăn?
Wah lač: Ơ Aê Diê pô khăp! Akâo kơ Ih brei kơ kâo bi msĕ pô hŏng hnơ̆ng čuăn Ih, čiăng kâo thâo brei pô knang kơ Ih hlăm grăp mnĭt mmông, čiăng dưi hŏng klei mplư bi mni kơ pô kơ klei tŭ Ih brei.
Dlăng Klei Aê Diê Blŭ hlăm tlâo thŭn: Y- Mathiơ 26:69-27:26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
