Klei Aê Diê Blŭ: Galati 1:1-5
Êlan kliăng: “Ơ phung anak kâo, hmư̆ bĕ klei sa čô ama bi hriăm, mđing knga bĕ čiăng kơ diih dưi mâo klei thâo mĭn” (Klei Bi Hriêng 4:1)
Klei êmuh ksiêm mĭn: Hlei pô čih hră Galati leh anăn čih kơ hlei pô? Ya ngă pô čih kñăm hĕ kơ phŭn bruă khua ƀĭng kna ñu? Si drei srăng ngă tơdah mâo klei kčĕ brei mơ̆ng phung kčĕ hlăm klei hdĭp myang?
Tui si jar sa pŏk hră mơĭt phung Rôm, Khua ƀĭng kna Y‑Pôl pŏk akŏ hră Galati hŏng klei hưn mdah kơ ñu pô jing pô čih, êdei tinăn jing pô mă tŭ hră mơĭt leh anăn klei kkuh čhưn. Hră Galati jing hră Khua ƀĭng kna Y‑Pôl leh anăn “jih jang phung ayŏng adei” dôk mbĭt hŏng ñu čih mơĭt kơ Phung Sang Aê Diê ti čar Galati, sa boh čar hlăm čar Akai hlăm ƀuôn ala mtao Rôm ênuk anăn (êlan 1-2). Ƀiădah, mơ̆ng klei čih hlăm hră, drei ƀuh Khua ƀĭng kna Y‑Pôl yơh jing pô čih hră Galati. Hlăm êlan tal êlâo, ñu yua dŭm pruê̆ pioh hưn mdah kơ ñu pô hŏng pô mă tŭ hră mơĭt, jing phung đăo kơ Khua Yang mơ̆ng klei ñu hưn Klei Mrâo Mrang Jăk (Galati 3:1-5; 4:13-15). Ya ngă ñu hưn hĕ kơ ñu pô jing “sa čô ƀĭng kna amâo djŏ mơ̆ng phung mnuih amâodah sa čô mnuih brei jing ôh, ƀiădah tui si Yêsu Krist leh anăn Aê Diê Ama mjing” (êlan 1) kơ phung jing anak hlăm mngăt mưng juăt leh hŏng ñu? Kyuadah năng ai phung đăo tinei ăt dôk đing kơ bruă khua ƀĭng kna ñu. Bruă bi klă kơ klei ñu jing khua ƀĭng kna kbiă mơ̆ng Aê Diê yơh mjing čiăng bi klă kơ Klei Mrâo Mrang Jăk ñu hưn jing klei sĭt leh anăn mâo klei dưi hlăm klei ñu ƀuah êdei tinăn kơ phung anak ñu hlăm mngăt dôk tŭ klei mplư mơ̆ng phung hưn klei mrâo mrang jăk mkăn (Galati 1:6).
Tơdah bi tlă anăp hŏng klei đing kơ klei dưi bruă khua ƀĭng kna ñu mơ̆ng phung ñu atăt leh kơ Khua Yang, Khua ƀĭng kna Y‑Pôl amâo mâo klei ngêñ, klei phĭ amâodah ăl lui măng ai digơ̆ ôh. Ƀiădah ñu čuăn čih hră mơĭt kơ digơ̆ čiăng bi klă kơ bruă ñu jing khua ƀĭng kna leh anăn hưn kơ digơ̆ thâo kơ klei jhat kjham digơ̆ dôk ngă. Jing sa čô ama hlăm mngăt, ñu amâo dưi dôk ñăt kriêp kyua klei čôñ ăl ñu pô ôh tơdah digơ̆ “mâo klei ruă kjham dơ̆ng djiê” hlăm klei hdĭp myang. Ñu pô amâo dưi truh kơ digơ̆ ôh, snăn ñu čih hră mơĭt čiăng đru digơ̆.
Hruê anei, phung drei ăt srăng tuôm mơh hŏng klei Khua ƀĭng kna Y‑Pôl tuôm găn leh. Tal êlâo hĭn, brei drei pô dôk kjăp hlăm klei đăo amâo tui hlue phung mtô klei mrâo mrang jăk mkăn ôh, leh anăn brei drei thâo lui hĕ klei čôñ drei pô čiăng dưi duah êlan đru phung anak hlăm mngăt dôk tŭ klei phung soh atăt brei klah đuĕ, tơdah amâo dưi nao đru tlă anăp ôh, brei drei čih hră mơĭt, mơĭt email, mơĭt asăp čhưn, mtô lač, bi mđĭ ai. Amâodah drei pô yơh jing pô arăng mtă brei răng kơ mta klei đăo soh drei mă tŭ leh, leh anăn kơ klei drei dôk dơ̆ng ƀơ̆ng huă hŏng klei đăo, brei drei mă tŭ klei đru kčĕ anăn hŏng klei sĭt čiăng kơ drei amâo klah đuĕ hlăm êlan soh ôh.
Ya drei srăng ngă tơdah hmư̆ klei pô gĭt gai hlăm klei hdĭp myang drei mtă brei răng? Drei tuôm čih hră mơĭt čiăng đru klei đăo pô mkăn mơ̆?
Wah lač: Ơ Khua Yang, đru kâo thâo kral hlei jing pô kčĕ mâo klei dưi kbiă hriê mơ̆ng Ih. Đru kâo djăl mâo klei thâo săng leh anăn hmư̆ klei pô Ih yua čiăng bi hriăm kâo. Kâo wah lač hlăm Anăn Khua Yang Yêsu Krist. Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 10
Kênh Youtube BHKTHN:
