Klei Aê Diê Blŭ: Klei Bi Hriêng 6:20-23
Êlan kliăng: “Kyuadah klei mtă jing pui kđen, klei mtô jing klei mngač, leh anăn klei ƀuah čiăng mkra jing êlan nao kơ klei hdĭp” (Klei Bi Hriêng 6:23).
Klei êmuh ksiêm mĭn: Ya čiăng lač kơ boh blŭ mtao Y‑Salômôn yua “klei mtă” leh anăn “klei mtô”? Si klei brei “anak” lŏ ngă wĭt hŏng klei mtô anăn? Ya klei tŭ dưn mơ̆ng klei đup gưt kơ klei mtô? Si knhuah brei drei mâo hŏng Klei Khua Yang Blŭ?
Mtao Y‑Salômôn hưn lač kơ klei mtô lač msĕ si “klei mtă”, amâodah ăt mblang jing klei bhiăn, klei mtrŭn leh anăn “klei mtô”, ăt mblang jing klei bhiăn. Dôk ti anăp klei mtă leh anăn klei bhiăn, “anak” mâo dua mta knhuah lŏ ngă wĭt: thâo kral bruă klam kơ pô, brei khut khat đup gưt, amâodah hngah klei đup gưt leh anăn jing mnuih bi kdơ̆ng. Ƀiădah mtao čiăng lač hŏng “anak” snei, gưt hlue klei mtô lač amâo djŏ jing klei hrŏng ruah ôh, Klei Aê Diê Blŭ amâo djŏ čiăng kơ hrŏng ruah đup gưt amâodah hơăi ôh, ƀiădah drei mâo bruă klam gưt ngă hluê, khădah lu bliư̆ klei mtô lač jing “klei ƀuah čiăng mkra” (êlan 23), amâodah jing sa knhuang klei ruă, brei drei ăt luă gŭ mă tŭ. Klei amâo gưt asăp jing msĕ hŏng klei drei jing mnuih bi kdơ̆ng hŏng Aê Diê leh anăn Klei Blŭ Ñu.
Čiăng dưi mă tŭ ênoh yuôm klei mtô lač, brei “anak” djă pioh leh anăn mă yua klei mtô lač thâo mĭn nanao, djăp mmông djăp anôk (êlan 21). Hruê anei, drei jing phung mâo klei jăk jĭn, kyuadah mâo Yang Mngăt Jăk jing Yang Klei Sĭt nik, leh anăn Klei Aê Diê Blŭ jing Klei Sĭt nik mtrang mngač, đru drei mâo klei mgaih mkra hlăm djăp mta klei truh hlăm klei hdĭp.
Tơdah đup gưt klei mtô lač, “anak” srăng mă tŭ tlâo klei tŭ dưn. Tal sa, “Tơdah ih êbat, digơ̆ srăng atăt ih” msĕ si rup hlăm Klei Mmuñ Hđăp 23:3. Tal dua, klei bhiăn leh anăn klei mtă srăng răng mgang “anak” hlăm djăp mmông, thâodah “tơdah ih đih pĭt, digơ̆ srăng kiă kriê ih”. Leh anăn tal tlâo, “tơdah ih srăng mdih pĭt, digơ̆ srăng blŭ kơ ih”. Jih jang klei mtă, klei bhiăn amâo djŏ ôh knŏng jing klei bhiăn khăng gơ guêh, amâo thâo săng, ƀiădah ñu thâo blŭ hrăm mbĭt, yăl dliê mbĭt hŏng “anak” leh anăn jing mah jiăng kăp ktrâo atăt anak. Blŭ mdê, mđing hmư̆ leh anăn gưt ngă tui si klei mtă leh anăn klei bhiăn, srăng mjing sa boh “mnư̆” mgang ai tiê leh anăn klei mĭn “anak” hlăm grăp mmông, grăp anôk
Ya klei jing hnơ̆ng čuăn dôk ktrâo atăt klei hdĭp drei? Brei bĕ klei mtă leh anăn klei bhiăn Aê Diê jing “pui kđen” leh anăn “klei mngač” kơ drei (êlan 23), kyuadah Klei Blŭ Khua Yang yơh srăng mtrang mngač, đru drei thâo kiă kriê asei pô čiăng weh đuĕ kbưi mơ̆ng klei mplư. Klei Blŭ Khua Yang brei jing hnơ̆ng cuăn kơ knhuah hdĭp kpă leh anăn klei dôk dơ̆ng drei, amâo djŏ hluê si lăn ala ƀuôn sang hung tui tiŏ ôh. Jing phung đăo dôk hdĭp ti gŭ Klei Blŭ myang Khua Yang kiă kriê, brei drei dôk hdĭp thâo kiă kriê asei pô, dôk djŏ hnơ̆ng, ksiêm dlăng ai tiê drei pô, amâo dưi phưi tha tŭ ư mbĭt hŏng klei čiăng soh bi mklăk hŏng hnơ̆ng čuăn kpă ênô Aê Diê ôh, amâodah lu mta hdră mĭn dưm anak mnuih jing phŭn leh anăn bi hrăp klei ñu tluh čiăng.
Si ngă drei jao ai tiê drei kơ Yang Mngăt Jăk leh anăn Klei Blŭ Khua Yang ksiêm dlăng mơ̆?
Wah lač: Ơ Khua Yang, akâo Klei Blŭ Ih grăp hruê bi mrâo klei mĭn ai tiê kâo, jing klei mngač mtrang êlan kâo êbat, leh anăn jing mnư̆ kpal kjăp mgang kâo ti anăp klei mplư leh anăn klei soh jŭm găn kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 29:1-30:20
Kênh Youtube BHKTHN:
