Klei Aê Diê Blŭ: Rôm 11:1-10
Êlan kliăng: “Msĕ mơh hlăm ênuk anei mâo sa kdrêč adôk, ruah leh hŏng klei pap” (Rôm 11:5)
Klei êmuh ksiêm mĭn: Ya dua klei bi hmô Khua ƀĭng kna Y‑Pôl mă čiăng bi êdah kơ klei Aê Diê sĭt suôr hŏng phung ƀuôn sang Ñu? Mâo sa kdrêč phung Israel adôk, ruah leh hŏng klei pap ya klei čiăng lač kơ Aê Diê? Klei hriăm hruê anei čiăng bi hdơr kơ drei kơ ya klei?
Aê Diê lač leh phung Israel jing sa phung ƀuôn sang amâo thâo gưt asăp leh anăn bi kdơ̆ng (Rôm 10:21). Ñu khăp leh kơ phung tue čiăng brei phung Israel mâo klei nač anăn ngêñ. Kyuanăn, Khua ƀĭng kna Y‑Pôl mâo sa klei êmuh yuôm bhăn snăk: “Aê Diê hngah leh mơ̆ kơ phung ƀuôn sang Ñu?” Ñu lač, “Hơăi, amâo tuôm ôh!” Ñu mă dua klei bi hmô čiăng bi hmô kơ klei sĭt suôr Aê Diê amâo tuôm lui ôh phung ƀuôn sang Ñu ruah leh wăt tơdah digơ̆ ngă soh leh hŏng Ñu.
Tal sa, jing klei bi knal ñu pô, sa čô Israel, anak čô Y‑Abraham, sa čô mơ̆ng găp djuê Ƀenjamin, sa čô tuôm bi kdơ̆ng leh hŏng Khua Yang Yêsu, ngă jhat leh anăn duah čiăng bi mdjiê phung ƀĭng kna Khua Yang. Ƀiădah Khua Yang ăt tui hlue ñu, leh anăn bi êdah Khua Yang pô kơ ñu ktuê êlan nao kơ ƀuôn Damas (Bruă Phung Khua Ƀĭng Kna 9). Ñu iêô Y‑Pôl kơ bruă khua ƀĭng kna čiăng hưn kơ phung Israel leh anăn pioh brei ñu čiăng hưn Klei Mrâo Mrang Jăk kơ phung tue (Bruă Phung Khua Ƀĭng Kna 13:2). Tal dua, ñu hrêč yua I Bruă Mtao 19:10, 18, tơdah Khua pô hưn êlâo Y‑Êli tuôm hŏng klei knap mñai, phung phung Israel gao leh klei bi mguôp hŏng Aê Diê, bi rai knưl ngă yang, bi mdjiê phung khua pô hưn êlâo Aê Diê hŏng đao gưm. Khua pô hưn êlâo Y‑Êli mĭn knŏng hjăn ñu yơh dôk hdĭp ƀiădah ară anei arăng duah čiăng bi mdjiê mơh. Ñu luč klei čang hmăng leh anăn êdu ai akâo kơ Aê Diê bi mdjiê hĕ ñu. Ƀiădah Aê Diê brei ñu thâo, Aê Diê răng pioh leh kơ Aê Diê pô kjuh êbâo čô êkei amâo tuôm kkuh mpŭ kơ yang Ƀaal ôh. Aê Diê ngă bruă hŏng klei yuôm bhăn êdimima. Hlăm mnĭt mmông knap mñai hĭn hlăm klei hdĭp, brei drei ăt knang kjăp kơ Aê Diê Pô sĭt suôr dôk kiă kriê leh anăn Ñu mâo hdră jăk hĭn kơ phung anak čô Ñu.
Khua ƀĭng kna Y‑Pôl brei thâo ti krah phung Israel “mâo sa kdrêč adôk ruah leh hŏng klei pap”, jing phung mâo klei yap kpă kyua klei đăo kơ Khua Yang Yêsu (êlan 5-6). Bi phung Israel păt čiăng jih jang diñu yap klei djă pioh klei bhiăn yơh čiăng mâo klei yap kpă leh anăn klei diñu duah diñu amâo dưi mâo ôh (êlan 7). Aê Diê bi mmăt diñu, “ală amâo thâo ƀuh leh anăn knga amâo thâo hmư̆ ôh”, tui hlue klei kđeh tluh truh ti hruê anei (êlan 8; Klei Mtô Mñă Klei Bhiăn 29:4). Ƀiădah Aê Diê sĭt suôr djă pioh klei ƀuăn hŏng phung aê găp djuê Israel. Ñu ăt gĭr dôk guôn. Wăt snăn dưn mơh, diñu mâo klei yap kpă hĕ amâodah hơăi klei anăn tui si klei đăo grăp čô mnuih. Aê Diê jing Pô sĭt suôr leh anăn kpă ênô, Ñu amâo tŭ ư amâodah bi mtrŭn ôh hnơ̆ng klei kpă ênô Ñu. Hruê anei, drei mâo klei bi mtlaih kluôm dhuôm hŏng klei đăo, amâo djŏ kyua bruă jăk drei ngă ôh. Đăm drei tui duah klei pap hŏng ya mnơ̆ng drei mâo ôh kyuadah klei pap Aê Diê brei kơ drei kluôm dhuôm kyua klei khăp leh anăn klei pap Ñu.
Si ngă drei yua bruă drei ngă bi mlih hŏng klei jăk Aê Diê mơ̆?
Wah lač: Ơ Khua Yang, kâo bi mni kơ Ih kyuadah Ih jing Pô sĭt suôr, Pô kpă ênô, bŏ hŏng klei pap leh anăn klei sĭt nik. Đru kâo thâo huĭ mpŭ kơ Ih, êbat tui si Ih atăt gai čiăng dưi bi knal klei sĭt suôr leh anăn klei kpă ênô Ih. Kâo wah lač hlăm Anăn Khua Yang Yêsu Krist. Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 9
Kênh Youtube BHKTHN:
