Klei Aê Diê Blŭ: Klei Mphŭn Dơ̆ng 1:26-27
Êlan kliăng: “Snăn Aê Diê hrih mnuih tui si rup Ñu pô; Ñu hrih gơ̆ tui si rup Aê Diê pô, Ñu hrih digơ̆ êkei leh anăn mniê” (Klei Mphŭn Dơ̆ng 1:27)
Klei êmuh ksiêm mĭn: Si Aê Diê hrih mjing mnuih? Mnuih Aê Diê hrih tui si rup Ñu pô ya čiăng lač? Hriăm thâo kơ klei anei si ñu bi hmăi kơ klei hdĭp drei?
Leh hrih mjing lăn adiê, mtŭ mlan, bi bŏ lăn ala hŏng djăp mta mnơ̆ng hdĭp, mơ̆ng phung čĭm hlăm adiê, phung kan hlăm êa ksĭ, hlŏng kơ hlô mnơ̆ng hlăm dliê, Aê Diê hrih mjing anak mnuih. Klei hrih mjing anăn amâo djŏ hŏng klei tăm ƀri ôh, ƀiădah mâo klei kñăm čiăng klă tơdah Aê Diê Tlâo Čô Yang mbĭt mđrăm hrih mjing mnuih, “Brei Drei mjing mnuih tui si rup Drei, msĕ si Drei pô” (êlan 26). Tơdah Aê Diê hrih mnơ̆ng hdĭp mkăn “tui si mta diñu”, snăn Aê Diê hrih mjing mnuih hŏng klei yuôm bhăn snăk, “Aê Diê hrih mnuih tui si rup Ñu pô; Ñu hrih gơ̆ tui si rup Aê Diê pô, Ñu hrih digơ̆ êkei leh anăn mniê” (êlan 27). Anak mnuih amâo msĕ hŏng jih jang mnơ̆ng hdĭp mkăn Aê Diê hrih leh ôh. Mnuih jing rup Aê Diê. Lŏ mâo sa anôk kñăm jing, Aê Diê mjing mnuih hŏng dua klei jing klă mngač – êkei leh anăn mniê – leh anăn jih dua hơô rup Aê Diê msĕ sơăi.
Aê Diê hrih mnuih “tui si rup Ñu pô” amâo djŏ čiăng lač mnuih jing msĕ si Aê Diê hlăm asei mlei leh anăn awan dhuan ôh kyuadah Aê Diê jing mngăt myang arăng amâo dưi ƀuh ôh (Y-Yôhan 4:24). “Tui si rup Aê Diê” čiăng lač kơ klei mnuih jing msĕ si Aê Diê hlăm anôk mâo ênoh yuôm bhăn hĭn mkă hŏng jih jang mnơ̆ng hrih mjing mkăn. Êngao kơ mnuih, amâo lŏ mâo ôh mnơ̆ng hrih mjing mkăn dưi dưn knuih jăk siam mơ̆ng Aê Diê msĕ si klei thâo mĭn, klei doh jăk, klei kpă ênô, klei khăp…Mnuih mâo klei mĭn, ai mĭn leh anăn klei êngiê, thâo ngă klei bi mguôp leh anăn kkuh mpŭ kơ Aê Diê, mbĭt hŏng klei anăn, Aê Diê jao kơ mnuih mơh “kiă kriê” jih jang mnơ̆ng Ñu hrih mkăn (êlan 26).
Jing phung hơô rup Aê Diê, drei mâo ênoh leh anăn klei kñăm čiăng kơ klei hdĭp yuôm bhăn snăk. Jih jang mnuih ti lăn ala anei, amâo bi kah ana mbha djuê, klei dhar kreh, klei blŭ, knuih knhiêng, thŭn, klei jing…jih jang jing yuôm bhăn sơăi ti anăp Aê Diê. Hriăm thâo kơ klei anei, brei grăp čô drei dlăng yuôm kơ klei hdĭp drei pô leh anăn klei hdĭp phung riêng gah drei. Ti djiêô anăn, kyuadah drei jing tui si rup Aê Diê pô, brei klei hdĭp drei mtrang wĭt klei guh kơang Ñu, brei drei khăp msĕ si Khua Yang khăp leh, pap brei msĕ si Khua Yang pap brei, leh anăn brei drei jing doh jăk kyuadah Khua Yang jing doh jăk, čiăng tơdah pô mkăn dlăng kơ klei hdĭp drei, digơ̆ srăng ƀuh sa rup siam, jăk leh anăn bŏ hŏng klei guh kơang mơ̆ng Pô Hrih Mjing.
Si drei dôk bi êdah rup Aê Diê hlăm klei drei dôk dơ̆ng ƀơ̆ng huă grăp hruê?
Wah lač: Ơ Khua Yang, kâo bi mni kơ Ih kyuadah Ih mjjng kâo tui si rup Ih pô, jing sa čô mnuih yuôm bhăn, leh anăn klei hdĭp mâo kñăm čiăng klă mngač. Brei kâo thâo dlăng yuôm kơ klei hdĭp kâo pô wăt klei hdĭp pô mkăn. Đru kâo hdĭp bi êdah klei doh jăk, klei khăp leh anăn klei pap Ih čiăng lu mnuih ƀuh Ih hlăm klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
https://www.youtube.com/c/bhkthn
