Galati 3:21-29
“Pơtih gia kơ tơdrong juăt ‘Bok Kei-Dei dang lĕ minh ‘nu bơngai anhăk ba lu hơ’lơ̆p pơhrăm chư tơ hnam trưng. Na truh tơ hnam trưng boih na lu đe hơ’lơ̆p ưh pă kăl kơ bơngai năm ba boih. ‘Noh kư̆m dang lĕ tơdrong juăt ‘Bok Kei-Dei anhăk ba kon bơngai bơ̆n tơ Yêsu Krist, na ‘Bok Kei-Dei jô̆ bơ̆n bơngai ‘lơ̆ng tơpăt hăm sư yua kơ bơ̆n lui kơ Yêsu.” (Galati 3:24)
Nơ̆r jet tơchĕng pơwao:
– ‘Bok Pôl đei pơting tơdrong juăt hăm tơdrong jang bu?
– Tơdrong jang ‘noh đei tơplih thoi yơ adrol păng đơ̆ng rŏng kơ đei đon lui kơ Yêsu Krist?
– Lu tơdrong lăm minh ‘nu bơngai đei đon lui kơ Kră Yang Yêsu ‘noh kiơ?
– Lu bơ̆n juăt chu nơ̆r Kră Yang bơtho lăm sơ̆p hla bơar yua kơ đơ̆ng tơdrong kiơ pơchŭt?
Pơtrơp nơ̆r jet yua kơ kiơ đei tơdrong juăt (Galati 3:19-20), ‘bok Pôl dan sư lăm anih bơngai lui Galati wă apinh jet: Hăm trŏ kơ tơdrong juăt păng nơ̆r pơkă đei tơplơ̆ băl? ưh kơ pơhiơ̆, sư tơl hloi nơ̆r đe jet noh hăm nơ̆r sĭt tơpă: “Ưh kơ kơ đei tơplơ̆ ôh” (trong 21). Đơ̆ng noh, sư ‘măn jơ tơblang gah tơdrong juăt. Sư yua lu sơnăm wă pơma kơ tơdrong jang: Adrol kơ Yêsu tam mă jur” păng “kơplah Yêsu jur” (trong 23, 25). Adrol kơ Yêsu jur, tơdrong juăt noh sư dơ̆ng ‘bơ̆t thoi lĕ đe tah lăm hnam phak “’bok thây” (trong 22-24), wă khan “bơngai chông anhăk” pơma gah tơdrong juăt trŏ, mă lăm jơhnơr ‘bok Pôl sơ̆ mă truh jơhnơr bơ̆n dang ei, kon oei ‘lơ̆p ưh kơ gơh wă iŏk tơmam dah yua mŭk tơmam kră dah sư tam mă ‘lŏ tơ̆l. Adrol kơ sơnăm noh, bơngai oei ‘lơ̆p noh gô mơ̆ng kơ bơngai wei lăng sư (Galati 4:1-2). Kư̆m thoi noh, kơplah Kră Yang Yêsu jur, lu đe bu lui gơnang kơ ‘Bok Krist thoi bơngai ‘lơ̆p noh truh sư tih tơdăm bơih, sư jing “kon drŏnglo ‘Bok Kei-Dei, hrŭk iŏk akâu Yêsu Krist” dang “kon sâu ‘bok Abraham” (trong 24-29). Bơngai noh ưh kơ kiơ̆ tơdrong juăt dơ̆ng bơih (trong 26-29). Tơdrong jang “bơngai wei lăng” păng “anhăk ba bơ̆n lui kơ Yêsu Krist” pơtôch lê̆ tơdrong juăt noh bơih.
Đei lơ tơdrong jang ‘lơ̆ng păng trŏ lăm chăl arih bơngai lui lĕch đơ̆ng tơdrong đei tơplih đơ̆ng rŏng kơ bơ̆n lui kơ Yêsu Krist, mălei bơ̆n ngăl đei tơchĕng kơ tơdrong noh wă kơnhăm wă jing gơh dŏng pơklaih, jing bơngai mă bơ̆n ‘maih druh kiơ̆. Chu kiơ̆ khôi juăt Kră Yang, arih tơpăt, bơ̆jang kơ Kră Yang tơnăp… đĭ đăng kăl păng ‘lơ̆ng dêh. Mă khan lei ră, lu bơ̆n gô thoi kon drŏnglo kơdră lăm tơdrong hơ’mon bơngai kon tơklah đơ̆ng ‘Bă, “Inh oei hơdai ih đunh bơih, inh jang lăm hnam dơnŏ kơdih, na sư khan: “Mălei ih ‘nhŏ kơ đei ăn kơ inh minh pôm kon bơbe” lu bơ̆n ‘bôh mơn đei pơdê băl yua kơ bơ̆n hiơt bơih “Dôm mŭk tơmam inh lê̆ đĭ kơ e” (Luka 15:29-31). Lu bơ̆n gơh rơngei jing bơngai ‘lŏ tơ̆l yua kơ iŏk mŭk tơmam bơ̆n kơdih mălei wă kơ thoi đe tah lăm hnam phak dah đei tơdrong hăm bơngai wei lăng bơ̆n, kon ‘Bok Kei-Dei athei arih chang gô “đơ̆ng rŏng kơ Yêsu jur”
Ơ Kră Yang, hiôk chơt dêh tơpă kơplah nhôn arih đei đon lui păng tơdrong mơnat ăn đĕch đơ̆ng Ih, gơh rơngei thoi lĕ đe tah lăm hnam phak wă kơ lu nhôn rơngei yua tơmam dŏng pơklaih păng đei mơdrŏng tih ưh kơ kĕ jô̆ đơ̆ng Ih ăn, krao khan yua anăn Kră Yang Yêsu Krist, Amen.
Lu bơ̆n arih trŏ kơ bơngai lui hăm jơhngơ̆m adrol dah đơ̆ng rŏng Yêsu Krist jur? Lu bơ̆n kăl kơ tơplih tơdrong kiơ lăm tơdrong tơchĕng dah arih sa rim năr?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 15
Kênh Youtube BHKTHN:
