Klei Aê Diê Blŭ: Klei Yăl Dliê 22:10-12
Êlan kliăng: “Wăt tơdah kâo êbat hlăm troh êyui klei djiê, kâo amâo srăng huĭ kơ sa mta klei jhat ôh; kyuadah Ih dôk mbĭt hŏng kâo” (Klei Mmuñ Hđăp 23:4)
Klei êmuh ksiêm mĭn: Ya klei H’Athali ngă tơdah leh Mtao Y‑Ahasia djiê? Ya jing klei kñăm čiăng kơ bruă ñu ngă anăn? Ya bruă Aê Diê ngă leh čiăng bi sĭt klei Ñu ƀuăn hŏng găp djuê Y‑Đawit? Ya ih srăng ngă tơdah klei hdĭp ih msĕ si “êbat hlăm troh êyui klei djiê”?
Tơdah H’Athalia, amĭ Mtao Y‑Ahasia “ƀuh kơ anak êkei ñu djiê leh, ñu kgŭ leh anăn bi rai jih jang găp djuê mtao sang Yuđa,” jing jih jang phung êkei hlăm găp djuê mtao čiăng đăm mâo pô plah mmiă jhưng mtao hŏng ñu ôh tơdah ñu kiă kriê čar Yuđa. Anei jing ênuk mmăt tĭt hĭn hlăm klei hƀuê ênuk čar Yuđa tơdah pui kđen knhal tuč hlăm sang Mtao Y‑Đawit dơ̆ng ram leh, wăt tơdah Aê Diê ƀuăn leh srăng “brei sa boh pui kđen kơ Y‑Đawit leh anăn kơ phung anak êkei gơ̆ hlŏng lar” (II Klei Yăl Dliê 21:7). Wăt tơdah adiê mmăt tĭt dưn knŏng dưi bi hgăm amâo brei mnuih ƀuh ôh kngan Aê Diê dôk mă bruă đuč, ƀiădah amâo dưi gang ôh kngan Aê Diê mă bruă. Aê Diê jing Pô Hdĭp Hlŏng lar, Ñu ngă bruă amâo mâo mdei ôh čiăng răng mgang jih jang phung jing dŏ Ñu. Klei Ñu ƀuăn srăng bi sĭt leh anăn hdră Ñu srăng ngă bi leh, kyuadah Khua Yang Yêsu, Pô Bi Mtlaih lăn ala srăng kbiă hriê mơ̆ng găp djuê Mtao Y‑Đawit. Aê Diê yua leh H’Jôsabêat, anak mniê Mtao Y‑Jôram pioh răng mgang anak čô Mtao Y‑Đawit tlaih mơ̆ng klei rai luč. Tui si Y‑Jôsephus, pô čih klei hƀuê ênuk, H’Jôsabêat amâo djŏ anak mniê H’Athali ôh, ƀiădah anak mniê Y‑Jôram hŏng sa čô mô̆ mkăn. H’Jôsabêat pŭ Y‑Jôas, anak êkei mtao, hlăk anăn hlăm brô sa thŭn, gơ̆ găl kơ ñu amĭ mda “čiăng tlĕ mđuĕ gơ̆ mơ̆ng krah phung anak êkei mtao arăng dôk bi mdjiê, leh anăn ñu mă gơ̆ wăt mniê pô rông gơ̆ dưm hlăm sa boh adŭ pĭt” (êlan 11). Anei jing sa boh adŭ pĭt hlăm Sang Aê Diê knŏng phung khua ngă yang hŏng gŏ sang digơ̆ leh anăn phung mă bruă hlăm Sang Kkuh Mpŭ yơh dưi mŭt. Kyuadah H’Jôsabêat jing mô̆ Y‑Jêhôiđa, khua ngă yang snăn ñu dưi mŭt ti anôk anăn. Bruă H’Jôsabêat ngă hŏng klei jhŏng anăn jing bruă ngă mơ̆ng sa čô mnuih mâo klei đăo tơdah ñu đăo kluôm dhuôm kơ klei Aê Diê ƀuăn leh kơ sang Y‑Đawit. H’Jôsabêat dua ung ñu khua ngă yang Y‑Jêhôiđa amâo uêñ kơ klei hyưt huĭ, tŭ jih klei jŭ jhat săn asei mlei čiăng mdăp Y‑Jôas, anak êkei Mtao êjai năm thŭn ênuk ala čar mmăt tĭt êjai H’Athali jing sa čô mniê jhat ƀai mmiă klei dưi kiă kriê.
Tơdah drei knang kjăp kơ klei Aê Diê ƀuăn, wăt tơdah drei hdĭp ti krah klei truh knap mñai êdimima, wăt tơdah dôk “êbat hlăm troh êyui klei djiê” dưn mơh, kăn drei srăng luč klei čang hmăng rei kơ hdră Aê Diê pioh leh kơ klei hdĭp drei. Aê Diê mă bruă nanao kăp răng mgang drei čiăng bi sĭt klei Ñu ƀuăn leh.
Si ngă drei luč klei čang hmăng kơ Aê Diê mơ̆ tơdah tuôm hŏng klei dleh dlan?
Wah lač: Ơ Khua Yang, đru kâo hdĭp hŏng klei đăo hlăm djăp mta klei truh, knang kjăp kơ klei Ih ƀuăn čiăng kơ kâo jhŏng săn asei mlei kơ bruă Ih, dôk guôn kơ hdră Ih srăng jing. Kâo wah lač hŏng anăn Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
