2 Xwmtxheej Vajntxwv 22:10-12
Nqe cim zaj kawm:
“Tus TSWV, txawm yog kuv taug txojkev uas tsaus ntuj nti los kuv tsis ntshai dabtsi, rau qhov koj nrog nraim kuv. Koj tus pas thiab tus cwj nrig tsomkwm kuv” (Phau Ntawv Nkauj 23:4)
Lus nug rau sawvdaws xav:
– Athaliyas ua dabtsi tom qab uas vajntxwv Ahaxiyas tuag lawm?
– Nws tes haujlwm yog homphiaj dabtsi?
– Vajtswv ua dabtsi rau Nws lo lus cogtseg rau Daviv cajces lawm?
– Koj cheemtsum ua dabtsi thaum lub neej “taug txojkev uas tsaus ntuj nti”?
“Thaum Athaliyas hnov hais tias nws tus tub uas yog vajntxwv Ahaxiyas raug tua tuag lawm, nws txawm samhwm kom luag muab vajntxwv Ahaxiyas cov tub tua tuag tas huv tibsi”, kom thiaj tsis muaj leejtwg nrog nws txeeb tau lub meejmom ua vajntxwv tswj tebchaws Yudas. Ncua sijhawm ntawd yog ncua uas muaj kev tsaus ntuj nti nyob rau hauv keebkwm tebchaws Yudas, ua rau vajntxwv Daviv cajces yuav luag tu noob, txawm Vajtswv twb coglus hais tias, “tus TSWV tsis xav rhuav kom Daviv cajces puastsuaj…Daviv cajces yuav tau ua vajntxwv mus li” (2 Xwm txheej Vajntxwv 21:7), los ncua sijhawm no yeej tsaus ntuj nti, tiamsis qhov tsaus ntuj ntawd tsuas thaiv tau tibneeg qhov muag kom ntsia tsis pom Vajtswv txhais tes tseem ua haujlwm xwb, yeej cheem tsis tau Vajtswv txhais tes nres tsis ua haujlwm.
Vim Vajtswv yog tus uas ib txwm muaj sia nyob, Nws yeej ib txwm ua haujlwm thiab tabtom ua haujlwm saib xyuas, pov puag txhua tus uas yog Nws cov neeg. Nws lo lus cogtseg yuavtsum ua kom tiav, thiab qhov uas twb npaj tseg lawm yuavtsum tau ua xwb. Vim Tswv Yexus uas yog tus Cawmseej yuavtsum yug los ntawm Daviv cajceg, Vajtswv thiaj siv Yehausenpas uas yog vajntxwv Yehaulas tus ntxhais los tiv thaiv pov puag Daviv cajceg kom tsis raug rhuav puas tsuaj. Raws li tus tub tshawb fawb keebkwm Josephus hais: Yehausenpas tsis yog Athaliyas li menyuam, tiamsis yog vajntxwv Yehaulas thiab nws lwm tus pojniam li menyuam. Yehausenpas thiaj nyiag vajntxwv Ahaxiyas tus tub Yau-as thaum nws hnub nyoog muaj ib xyoos mus zais rau hauv lub tuam tsev ib chav “Qhov uas nws muab Yau-as zais li ntawd cawm tau Yau-as dim ntawm Athaliyas txhais tes” (nqe 11). Chav tsev ntawd tsuas yog cov povthawj thiab cov pab haujlwm thiaj li tau cai mus hauv xwb. Yog Li ntawd, Yehausenpas yog tus pov thawj hlob Yehauyadas pojniam nws muaj cai mus los tau rau hauv chav ntawd. Yehausenpas ua tes haujlwm no nws yeej muaj lub siab tawv, muaj kev ntseeg thiab cia siab ntsoov rau Vajtswv lo lus cogtseg rau Daviv lawm. Txawm yog Yehausenpas nrog rau nws tus txiv Yehauyadas thiab tsev neeg yuav muaj txoj kev txhawj ntshai, yuav poob qee yam thiab txoj sia los lawv txaus siab tiv thaiv Yau-as hauv 6 lub xyoos uas lub tebchaws Yudas muaj kev tsaus ntuj nti los ntawm poj vajntxwv phem Athaliyas tswj kav.
Yog thaum peb ruaj siab rau Vajtswv tej lus cogtseg, txawm peb lub neej yuav zoo li cas, txawm yuav “taug txojkev uas tsaus ntuj nti” los peb yeej tsis tas kev cia siab rau yam uas Vajtswv twb npaj tseg rau peb lawm. Vajtswv niaj hnub ua Nws tes haujlwm thiab pov puag peb kom ua tiav li Nws lo lus cogtseg lawm.
Thov Vajtswv
Vajtswv, thov pab nyuam yaus muaj kev ntseeg rau txhua lub sijhawm, ruaj siab rau Koj lo lus cogtseg kom nyuam yaus txaus siab ua txhua yam pab rau Koj tes haujlwm thiab nyob tos qhov uas Koj npaj tseg rau nyuam yaus lawm kom tiav. Nyuam yaus tuav Tswv Yexus Khetos lub npe thov, Amees.
Peb puas tas kev cia siab rau tej lub sijhawm uas ntsib kev tsaus ntuj nti?
Nyeem Vajluskub hauv peb xyoos: 1 Kauleethaus 14
Kênh Youtube BHKTHN:
