Yauj 1:1-5
Nqe cim:
“Txhua zaus uas lawv noj haus tas, tagkis tom qab Yauj sawv ntxov muab tsiaj mus tua hlawv fij ua kevcai daws nws cov menyuam tej kev txhaum. Nws niaj zaus ua kevcai daws kev txhaum li ntawd rau nws cov menyuam, rau qhov nws ntshai nyob tsam nws cov menyuam ua txhaum rau Vajtswv.” (Yauj 1:5).
Lus nug rau sawvdaws xav:
– Yauj yog tus neeg zoo li cas?
– Yauj cov tub pheej ua dabtsi?
– Yauj pheej ua dabtsi kom txhim tsa tau tsevneeg muaj kev ntseeg?
– Peb txhim tsa yus lub neej ntseeg li cas?
Yauj yog ib tug neeg “hwm thiab muab siab npuab Vajtswv, nws yog neeg zoo thiab tsis ua kev phem kev qias” (nqe 1), thiab “yog tus uas npluanuj tshaj plaws nyob sab Hnubtuaj” (nqe 3). Yauj cov tub npaj rooj noj rooj haus thiab caw lawv cov muam tuaj nrog lawv noj haus ib tsev dhau tsev. Qhov no yog ib txojkev coj noj coj ua zoo heev nyob hauv Yauj tsevneeg, kom muaj kev sib raug zoo thiab koom tau ua ke. Tiamsis kev noj kev haus kuj yoojyim raug ntxias thiab ua txhaum yog hais tias tsis tswj tus kheej. Yog li, ua ib tug txivtsev muaj kev ntseeg, Yauj thiaj hu nws cov menyuam los ua kevcai daws kev txhaum, los ntawm qhov uas tua tsiaj hlawv fij thiab thov Vajtswv pab cov menyuam.
Tiam uas Yauj nyob, tsis tau muaj cov povthawj raug xaiv los ua kevcai fij khoom rau Vajtswv. Yog li ntawd, leej txiv yog tus uas sawv coj tsevneeg thiab ua tes haujlwm no. Tom qab uas noj haus tas, Yauj tua tsiaj hlawv fij ua kevcai daws nws cov menyuam tej kev txhaum kom tau tus Tswv zam txim, vim nws ntshai nyob tsam cov menyuam ua txhaum rau tus Tswv thaum noj haus. Yauj yog ib leej txiv muaj kev ntseeg, paub xav thiab hmov tshua txog cov menyuam lub neej sab ntsujplig.
Yog ib tug neeg ntseeg Vajtswv zoo, yog li Yauj kuj qhia tej menyuam taug Vajtswv txojkev. Nws txhim tsa tsevneeg kom muaj kev ntseeg. Dhau los ntawm qhov uas Yauj cov menyuam npaj rooj noj rooj haus thiab caw lawv cov muam tuaj koom, qhia paub lawv muaj kev hlub thiab ib leeg tshua txog ib leeg. Thiab Yauj tus kheej niaj hnub sawv ntxov tua tsiaj fij thiab thov Vajtswv pab cov menyuam. Qhov no yog tus qauv zoo ntawm ib tsevneeg ntseeg Vajtswv, muag nus muaj kev sib hlub, niamtxiv paub qhia cov menyuam ua lub neej ntseeg.
Txaus tu siab heev thaum ntau tsevneeg nyob hauv Vajtswv Pawg Ntseeg nimno tsis hmov tshua txog tej menyuam lub neej sab ntsujplig. Niamtxiv txhawj rau kev noj haus heev dhau tsis nco los txhim tsa tsevneeg kom muaj kev ntseeg Vajtswv, nquag pehawm. Ntau tus niamtxiv kuj tsis muaj kev coj tsevneeg los nyob ua ke sib tham kom muaj kev sib raug zoo. Lawv kuj tsis nrhiav sijhawm los qhia lossis thov Vajtswv pab rau cov menyuam kom lawv ua tau lub neej dawbhuv. Xyaum kawm Yauj tus qauv, peb cheemtsum muab cov menyuam lub neej sab ntsujplig saib ua qhov tseemceeb kom sawvdaws ua tau ib tsevneeg ntseeg zoo.
Thov Vajtswv,
Tus Tswv, thov Koj qhia kom nyuam yaus paub muab tes haujlwm txhim tsa tsevneeg ntseeg Vajtswv saib tseemceeb. Thov pab peb cov niamtxiv paub hwm tus Tswv thiab qhia menyuam ua raws li Koj tej lus. Amees.
Peb tabtom txhim tsa kev ntseeg rau tsevneeg li cas?
Nyeem Vajluskub hauv peb lub xyoo: Malakaus 13
Kênh Youtube BHKTHN:
