II Kauleethaus 10:12-18
Nqe cim:
“Peb yeej tsis kam muab peb piv rau cov neeg uas lawv khav hais tias lawv zoo dua lwm tus. Cov neeg uas khav li ntawd lawv ruam kawg li. Lawv ib tug ntsuas ib tug thiab muab ib tug piv rau ib tug…Tiamsis Vajtswv Txojlus hais tias, tus uas xav khav nws tsuas muaj cuabkav khav tej uas Vajtswv twb ua los lawm xwb” (II Kauleethaus 10:12, 17).
Lus nug rau sawvdaws xav:
– Cov neeg qhia cuav lawv sib khav zoo li cas?
– Timthawj Paulus ceev nws tus kheej txog kev khav li cas thiab xav kom cov ntseeg hauv nroog Kauleethaus ua li cas?
– Paulus qhia cov ntseeg khav txog yam dab tsi?
Thaum uas cov neeg qhia cuav hauv nroog Kauleethaus rov khav txog lawv tus kheej thiab ua li neeg ruam “lawv ib tug ntsuas ib tug thiab muab ib tug piv rau ib tug”, txhais tau hais tias, lawv muab tibneeg ntiajteb kev xav los ntsuas lawv kev txawj ntse, timthawj Paulus thiaj hais tias, nws tsis muab nws piv rau cov neeg ntawd. Paulus tsis khav dhau li uas nws ua tau, tiamsis nws hais txog tej uas nws ua tau pab cov ntseeg hauv nroog Kauleethaus xwb (nqe 13). Timthawj Paulus paub meej txog lub peevxwm uas nws ua tau, nws paub txog nws feem xyuam uas siv Vajtswv lub fwjchim los ua raws li Vajtswv samfwm kom nws ua. Thaum ntawd, Paulus xav kom cov ntseeg hauv Kauleethaus nco ntsoov hais tias, Paulus yog tus xub coj txoj Moo zoo tuaj rau lawv, lawv pom Vajtswv lub fwjchim hloov lawv lub neej sab ntsujplig tiag, tsis yog li cov neeg qhia cuav hais uas xav ua rau lawv tsis ntseeg siab rau yam uas Paulus tau ua dhau los (nqe 14). Vim yog tus xub thawj coj txoj Moo zoo rau cov ntseeg hauv Kauleethaus, Paulus thiaj ntshaw kom lawv loj hlob sab ntsujplig, rau qhov loj hlob sab ntsujplig yuav ua rau Vajtswv tes haujlwm nthuav dav dua, ua tau haujlwm ntau dua, “tomqab ntawd peb yuav mus qhia txoj Moo zoo rau lwm qhov” (nqe 15-16).
Kev khav txiv yog xav kom lwm tus pom txog yus tes haujlwm thiab nrog paub tej ntawd. Timthawj Paulus ntuas cov ntseeg hais tias: “Tus uas xav khav nws tsuas muaj cuabkav khav tej uas Vajtswv twb ua los lawm xwb” (nqe 17), lossis hais dua lwm seem hais tias: cia li ua rau sawvdaws pom txog Vajtswv lub fwjchim hauv peb lub neej uas txo fwjchim xwb, tsis yog peb lub qhovncauj khav qhuav tiamsis ua tsis tau dab tsi li“tus neeg ruam” (nqe 12).
Thaum ntsib kev dag ntxias txog qhov uas muab yam peb ua tau los piv rau lwm tus, cia li ras dheev los vam khom tus Tswv kev hlub, tsuas xav txog lub peevxwm uas tus Tswv pub rau peb hauv lub neej xwb. Thaum ua li ntawd, peb yuav pom txog yam uas peb ua tsis tau, thiab paub los thov Vajtswv pab kom ua tiav lub nra uas tus Tswv muab tso rau peb ua. Thaum pawg ntseeg muaj cov sib khav txiv coob ces yuav ua rau muaj kev sib cai pab pawg, Vajtswv tsis ua haujlwm hauv cov neeg ntawd thiab Vajtswv tes haujlwm tsis nthuav taus mus dav. Cia li txaus siab thiab tsuas khav txog tus Tswv xwb!
Thov Vajtswv,
Vajtswv ntuj tus uas txaus fwm! Thov pab kom nyuam yaus tsuas khav txog Koj xwb, thiab los vam khom Koj txhua lub sijhawm, txhob khav txog yam uas ua tau los lawm hauv lub neej Amees.
Yam dab tsi ua rau peb khav lossis muab peb piv rau lwm tus?
Nyeem Vajluskub hauv peb lub xyoo: Mathais 26:69-27:26
Kênh Youtube BHKTHN:
