II Kauleethaus 4:16
16 Twb yog vim li ntawd peb thiaj tsis poob siab. Txawm yog peb lub cev tsaug zuj zus los peb lub siab tseem niaj hnub muaj zog ntxiv.
Lus nug rau sawvdaws xav:
– Tus ntseeg Yexus lub neej hloov dua tshiab los ntawm yam dabtsi?
– Kev hloov dua tshiab hauv lub neej txijnkawm yog dabtsi?
– Kev hloov dua tshiab nyob hauv Tswv Yexus muaj qabhau licas rau lub neej txijnkawm?
– Nej yuav tsum ua dabtsi los ua kom lub neej txijnkawm kaj siab?
Nqe 16 pib ntawm lo lus “Twb yog vim li ntawd” hais meej txog qabhau ntawm kev hloov dua tshiab hauv tus Tswv Yexus (II Kauleethaus 4:7-15). Txawm yog tus Tswv cov menyuam ntsib kev txomnyem thaum nrog tus Tswv mus, los lawv yeej yuav tau txais txojsia tshiab hauv tus Tswv, yuav tau lub tshwjchim ci ntsa iab hauv tebchaws ibtxhis. Qhov no txhawb tus ntseeg Yexus tsis txhob poob siab tiamsis lub cev sab hauv yuav tau hloov dua tshiab zuj zus. Txawm yog lubcev sab nraud sem zuj zus los sab ntsujplig yeej tseem khov kho. Kev hloov dua tshiab pib ntawm kev hloov tus ntsujplig sab hauv mus rau kev xav thiab kev ua neej txhua hnub.
Nyob hauv lub neej txijnkawm, peb kuj cheemtsum muaj kev hloov dua tshiab los ntawm tes haujlwm ua kom lub neej txijnkawm kaj siab, sib txais yuav yam tsis tau zoo ntawm lwm tus thiab koom hloov dua tshiab. Yam xubthawj yuav tsum muaj hauv tus ntseeg lub cuabyig yog kev hlub tus Tswv, ob niamtxiv yim hlub tus Tswv, ua raws Nws tej lus hauv lub neej txhua hnub ces yim nyob sib ze. Nyob hauv Poj Huabtais Elizabeth II rooj tshoob, Thawj Xibhwb Geoffrey Fisher muaj lus nkaw hais tias: “Tus Cawmseej uas muaj sia zees tabtom tshwm ntsejmuag ntawm no foom koob hmoov rau neb. Yim nyob ze tus Tswv, ces neb yim nyob sib ze”. Ntawd yog tej lus nkaw zoo heev txog kev ua neej hauv lub cuabyig. Nyob hauv Tswv Yexus txawm yog peb lub cev yuav tsaug, sem zuj zus raws sijhawm, los lub neej sib hlub, dawbhuv yuav niaj hnub loj hlob, hloov tshiab ntxiv.
Thaum hais txog kev ua kom lub neej txijnkawm kaj siab, tej zaum qee leej yuav xav txog kev pub khoomplig, coj mus ua si,… Tej yam ntawd yeej zoo, tsimnyog ua, tiamsis yuav kom lub neej txijnkawm loj hlob, peb kuj yuav tsum saib mus rau kev hlub tawm hauv nruab siab tuaj thiab tej haujlwm ua qhia tshwm sab nraud, txawm yog tej haujlwm ntawd yog tej yam me nyob hauv lub neej. Xav kom tej xyoob ntoo ntsuab mos, tsis yog nyob nyob mam tsuag dej ib zaug txaus nkaus, tiamsis yuav tsum nco ntsoov tsuag dej txhua hnub, dob nroj qus, txiav tej ceg qhuav,… Lossis xav kom lub cev muaj zog, tsis yog tsuas cia ib lub xyoos tseg ob peb hnub los cuab zog qoj ib ce tiamsis yuav tsum ua tej ntawd txhua hnub. Ib yam nkaus li ntawd, los ntawm tej lub sijhawm zaum noj mov ua ke, los ntawm tes haujlwm sib pab me me hauv tsev, los ntawm tej lus qhuas, lub txhawb zog, lus thov txim txhua hnub,… ua rau lub cuabyig muaj kev kaj siab. Dr. Billy Graham sau tseg hais tias yog nkawm niamtxiv twg tsuas siv zog ua kom lub neej txijnkawm kaj siab npaum ib nrab lub sijhawm thaum ub sib tham, ces nkawd yuav xav tsis thoob thaum pom tias txhua yam pom kev zuj zus tuaj!
Thov Vajtswv,
Tus Tswv uas muaj kev hlub, thov pab nyuam yaus ob niamtxiv niaj hnub ua kom muaj kev kaj siab hauv lub neej txijnkawm los ntawm kev pauv hloov tus neeg sab hauv txhua hnub. Thov Koj pub rau nyuam yaus lub tsev dhau los ua ib lub cuabyig muaj kev kaj siab. Amees.
Neb ob niamtxiv puas tseg sijhawm los txhim kho tus kheej lub neej sab hauv?
Nyeem Vajluskub hauv peb lub xyoos: Mathais 14
