Khiavdim 35:1-3
Nqe cim:
“Nej muaj rau hnub ua nej tej haujlwm, tiamsis hnub xya yog hnub tseemceeb rau nej, hnub Xanpataus yog hnub uas nej so thiab pehawm tus TSWV. Yog leejtwg tseem ua haujlwm hnub ntawd, yuav raug tua tuag” (Khiavdim 35:2).
Lus nug rau sawvdaws xav:
– Qhov uas tus Tswv haivneeg yuav tsum tseg hnub Xanpataus ua hnub dawbhuv rau tus Tswv tseemceeb licas?
– Tus neeg ua txhaum txojcai hnub Xanpataus yuav raug lub txim twg?
– Caiv hnub so muaj qabhau licas rau nej?
Tseg hnub Xanpataus rau tus Tswv tseemceeb heev rau tus Tswv haivneeg; nyob hauv phau Khiavdim hais ntau zaug txog qhov uas caiv hnub Xanpataus. Tus Tswv twb pub rau Nws haivneeg muaj txaus noj rau hnub Xanpataus raws li txojcai khaws manas lawm (Khiavdim 16:26-30). Tus Tswv foom koob hmoov rau hnub Xanpataus thiab muab ua hnub dawbhuv vim Nws tsim ib puas tsavyam rau hnub, txog hnub xya Nws so (Khiavdim 20:8-11). Tus Tswv xav kom Nws haivneeg, txij li tej tub qhe ntxhais qhev, cov qhua uas yog lwm haivneeg thiab tej tsiaj txhu yuav tsum so hnub Xanpataus kom rov los siav (Khiavdim 23:12). So hnub Xanpataus yog ib lo lus samhwm ibtxhis ntawm tus Tswv rau cov Yixalayees (Khiavdim 31:12-17). Tus Tswv haivneeg yuav tsum so hnub Xanpataus txawm yog nyob rau lub caij cog lossis caij sau qoob loo (Khiavdim 34:21). Tej lus sau tseg hauv Khiavdim 35:2-3 qhia paub ntxiv hais tias tsis pub rauv taws ua mov hnub Xanpataus. Nyob hauv hnub rau, tus Tswv haivneeg yuav tsum khaws manas ntau dua txhua hnub ib npaug thiab coj manas mus ua kom siav siv rau hnub Xanpataus. Lub txim rau tus ua txhaum txojcai hnub Xanpataus yog raug ntiab tawm hauv tus Tswv haivneeg lossis raug tua tuag (Khiavdim 31:12-17; 35:2).
Nyob hauv Vajluskub Tshiab, Tswv Yexus thiab cov timthawj tsis hais txog qhov uas tus ntseeg yuav tsum caiv hnub Xanpataus, tiamsis qhia tus Tswv cov menyuam txhob tso tseg txojkev tuaj ua ke pehawm Vajtswv (Henplais 10:25). Pawg Ntseeg xubthawj pehawm hnub kaj nco txog Tswv Yexus kev sawv rov los (Tes Haujlwm 20:7). Thiab hnub kaj dhau mus ua “tus Tswv hnub” (Tshwmsim 1:10). Peb pehawm hnub kaj kuj muaj lub homphiaj yog so thiab pehawm Vajtswv Vaj Peb Leeg, Nws yog tus tsim ib puas tsavyam, ua tes haujlwm cawmdim thiab nyob nrog Nws haivneeg. Kev zeem paub tseeb txog tus Tswv pab peb muaj tus cwjpwm tsimnyog rau tus Tswv, rau kwvtij ibncig thiab txhua yam Vajtswv tsim.
Nyob tabmeeg txhua yam Vajtswv tsim, peb yog yam uas me tshaj tiamsis peb tau tus Tswv hlub tshaj txhua yam Nws tsim los; Nws pub rau peb tau txoj koob hmoov nrog Nws sib txuas lus, thiab pub muaj hwjchim tswjkav txhua yam Nws tsim. Tus Tswv cov menyuam paub hais tias tus kheej tau tus Tswv hlub yuav tsum ua lub neej zoo, paub ua lub luag haujlwm rau tus Tswv, rau tus kheej, rau lwm tus, thiab rau tej yam uas Vajtswv tsim. Tibneeg yuav muaj lub neej thajyeeb thiab kaj siab thaum txhua tus paub hais tias tus Tswv yog tus tsim txhua yam thiab txhua tus tau tus Tswv hlub rau qhov tau tsim raws li tus Tswv tus yamntxwv, tau koom siab pehawm Nws hauv “tus Tswv hnub”.
Thov Vajtswv,
Tus Tswv! Koj txoj kevcai yeej zoo, muaj nqis rau Koj haivneeg! Nyuam yaus txaus siab rau hnub kaj tau pehawm Koj, tau so, tau txais Koj txojkev pab thiab tau sib raug zoo nrog lwm tus nyob hauv Koj. Thov ua Koj tsaug vim txhua yam zoo Koj tau muab pub rau nyuam yaus! Amees.
Peb puas tseg hnub so ua hnub dawbhuv rau tus Tswv lawm tau?
Nyeem Vajluskub hauv peb lub xyoo: Mathais 2:7-3:17
Kênh Youtube BHKTHN:
