Klei Aê Diê Blŭ: Klei Bi Hriêng 19:24‑29
Êlan kliăng: “Ơ Anak kâo, tơdah ih mdei hĕ dôk hmư̆ klei mtô lač, ih srăng wơr bĭt jih klei ih thâo leh” (Klei Bi Hriêng 19:27)
Klei êmuh ksiêm mĭn: Si knuih sa čô anak ƀai bi êdah? Si Mtao Salômôn mtô lač phung anak măk ƀai? Ya klei hriăm drei mâo kơ klei mtô anak mơ̆ng klei hriăm hruê anei?
Mtao Salômôn lač kơ ya klei mơ̆ng sa čô anak măk ƀai. Tal sa, anak êkei mâo klei alah. Alah tơl đrŭt kngan ñu hlăm jam, leh anăn amâo lŏ ba kơ ƀăng êgei ñu ôh (êlan 24). Klei alah bi êdah sa čô anak amâo mâo bruă klam, amâo mâo knuih hdĭp, amâo hdơr knga kơ amĭ ama mprăp leh mnơ̆ng ƀơ̆ng huă kơ pô. Anak ƀai amâo bi mĭn ôh kơ ai tiê suăi êmăn amĭ ama pô rông ba. Tal dua, sa čô anak amâo hdơr knga kơ amĭ ama. Diñu “ngă jhat kơ ama ñu leh anăn suôt amĭ ñu” (êlan 26). Diñu mưč kơ klei dưi, klei khăp leh anăn klei amĭ ama mtô. Ama rông ba ñu lŏ ngă ƀai, amĭ pô kkiêng kơ ñu leh anăn khăp kơ ñu, ƀiădah ñu lŏ suôt mơh, kơ pô mkăn hĭn mơh. Ñu ngă kơ amĭ ama hêñ kyua bruă ngă leh anăn klei soh ñu. Tal tlâo, anak mâo knuih dlăng hơăi mang knhuah hdĭp, klei amĭ ama mtô lač. Grăp hruê diñu ƀrư̆ kdlŭt êlam hĭn hlăm klei soh čhuai, “mưč kơ klei kpă” (êlan 28).
Êngao anăn, Mtao Salômôn ăt mtô lač kơ amĭ ama bi hriăm phung anak măk ƀai. Ñu lač tơdah mjuăt bi hriăm, mnuih mluk srăng hriăm klei thâo mĭn, ƀuah mnuih mâo klei thâo săng, leh anăn ñu srăng thiăm klei thâo mĭn lu (êlan 25). Mtao Salômôn ăt lač hŏng phung anak ƀai: “Ơ Anak kâo, tơdah ih mdei hĕ dôk hmư̆ klei mtô lač, ih srăng wơr bĭt jih klei ih thâo leh” (êlan 27). Tơdah amâo kmhal leh anăn bi mlih, klă sĭt srăng tŭ klei bi kmhal, “giê hnuăt” pioh kơ phung mluk (êlan 29).
Ênguôt snăk kơ sa gŏ sang tơdah mâo phung anak măk ƀai. Klei amâo myun anăn amâo djŏ knŏng amĭ ama klam ôh, ƀiădah phung anak anăn klam hŏng boh jhat kjham snăk. Đăm ôh kyua duah prăk mak, anôk bruă kơ anak čiăng kơ anak mâo klei hdĭp djăp ênŭm anăn dlăng hơăi mang klei mtô bi hriăm phung anak. Đăm ôh kyua khăp đei, hơiêng đei, phung anak jing alah, kƀah klei thâo klam, hdĭp amâo mâo knuih jăk. Tơdah anak amâo dưi mtô mjuăt snăn dŭm bruă anak ngă ala ƀuôn, sang phat kđi srăng “bi kmhal”. Amĭ ama amâo jhŏng mtô mjuăt anak, snăn sang phat kđi srăng yua klei ƀuah mkra phung anak măk ƀai anăn. Akâo kơ Aê Diê đru kơ phung amĭ ama mâo klei thâo mĭn mơ̆ng Khua Yang hlăm klei mtô anak čô leh anăn ăt akâo kơ Khua Yang đru kơ phung anak măk ƀai thâo ƀuh klei soh leh anăn kmhal, bi mlih.
Drei mâo anak măk ƀai mơ̆ ? Si drei mtô mjuăt diñu ?Ya klei čiăng bi mlih ?
Wah lač: Ơ Khua Yang, akâo kơ Ih đru kâo mâo klei thâo mĭn, kjăp hlăm klei mtô mjuăt anak čô čiăng ƀư̆ mkra phung anak măk ƀai. Kâo ăt akâo kơ Khua Yang đru kơ phung anak kâo thâo kmhal, mkra mlih klei soh leh anăn thâo răng hlăm klei blŭ tlao nao hriê hŏng amĭ ama, aduôn aê.
Dlăng Klei Aê Diê Blŭ hlăm tlâo thŭn: Y‑Amôs 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
