Pajlug 18:22
Koj yuav tau pojniam ces yog tau yam uas zoo, thiab koj tau txais koob hmoov zoo los ntawm Vajtswv.
Lus nug rau sawvdaws xav:
- Kev nrhiav pojniam thiab nrhiav txiv tseemceeb licas?
- Cov ntseeg kev nrhiav txijnkawm raws li yam dabtsi?
- Yuav ua licas peb thiaj nrhiav yog tus txij tus nkawm kom tau txais tus Tswv tej koobhmoov?
Yuav tau ib tug pojniam, ib tug txiv zoo yog qhov uas txhua tus ntshaw. Kev sib yuav cuam tshuam rau lub neej txijnkawm, yog li ntawd txhua tus tub ntxhais yuav tsum xyuamxim “nrhiav”. Yog xaiv maj dhau, lam xaiv, lossis xaiv raws li neeg ntiajteb siab ntshaw ces yuav ua lub neej tsis nto ntsis, ntsib kev iab siab. Tiamsis, yog xaiv tau tus neeg zoo, ces yuav tau lub neej kaj siab thiab tau txais Vajtswv tej koobhmoov.
Yuav nrhiav tau tus txij tus nkawm zoo, cov ntseeg yuav tsum xam txog tej yam no: Tim ib, yuav tsum thov Vajtswv pab ua ntej nrhiav. Tus Tswv txojkev hlub thiab txoj koobhmoov tsuas muab pub rau tus uas paub thov tus Tswv coj hauv kev xaiv txijnkawm raws li tus Tswv siabnyiam. “Vajtse thiab nyiaj txiag yog niam thiab txiv tseg ua qubtxeeg qubteg rau tus tub, tiamsis tus pojniam uas paub tab yog tus TSWV muab rau nws” (Pajlug 19:14). Tim ob, yuav tsum nrhiav tus uas hwm tus Tswv thiaj yuav sib pab ua tau lub neej dawbhuv, sib hwm thiab sib hlub. Kev hwm tus Tswv yog yam tseemceeb thiab yuav tsum nyob siab dua kev zoo nkauj zoo nraug: “Cev zam zoo rub tau neeg lub siab, thiab kev zoo nkauj txawj ploj mus, tiamsis tsimnyog qhuas tus pojniam uas hwm tus TSWV” (Pajlug 31:30). Tim peb, yuav tsum nrhiav tus neeg siab zoo. “Tus pojniam uas tsimtxiaj yog lub kaus mom yeebkoob rau nws tus txiv ntoo, tiamsis tus pojniam uas coj kev txajmuag los rau nws tus txiv zoo ib yam li cov kua paug uas nyob hauv tus txiv cov pobtxha” (Pajlug 12:4). Kev zoo nkauj zoo nraug yuav ploj mus tiamsis tus cwjpwm siab zoo, siab ncaj yuav nyob mus ibtxhis. Qhov tseemceeb yuav tsum nco yog nrhiav niam, nrhiav txiv rau tus kheej kuj yog nrhiav niam, nrhiav txiv, nrhiav pog, nrhiav yawg rau yus tej menyuam ntag. Koj caj ces yog nyob ntawm koj txojkev xaiv hnub no, yog li ntawd yuav tsum xyuamxim nrhiav thiab xaiv. Tus pojniam zoo, tsimtxiaj yog tus uas paub txhawj txog nws lub cuabyig ruaj ntseg, ua rau tus txiv thiab tej menyuam zoo siab: “Tus pojniam uas muaj tswvyim tuav tau nws lub cuab lub yig nyob ruaj ntseg, tiamsis tus pojniam ruam muab nws lub cuab lub yig rhuav povtseg” (Pajlug 14:1).
Neeg ntiajteb muaj ntau txojcai nyob hauv kev xaiv txijnkawm. Cov ntseeg yuav tsum paub meej tej yam tsimtxiaj uas tus Tswv pub thiaj nrhiav tau tus tsimnyog. Yuav tsum paub hais tias tibneeg tej tswvyim muaj nrim, tshwjxeeb yog thaum sib hlub sib nyiam, kev hlub pheej kov yeej kev xav zoo li luag pheej hais tias “hlub dig muag”. Yog li ntawd cov tub ntxhais ntseeg yuav tsum tas siab ntsws nrhiav tus Tswv lub siab nyiam hauv kev nrhiav txijnkawm. Tibneeg tsis muaj ib tug twg zoo tagnrho, yog li ntawd thaum nrhiav txijnkawm, peb tsis txhob tso homphiaj siab dhau kom nrhiav tau tus neeg zoo txaus, tiamsis qhov tseemceeb yog yuav tsum thov tus Tswv taw qhia kom paub xav txog kev txhim kho lubneej txijnkawm kaj siab thiaj yuav txais tau tus Tswv tej koobhmoov hauv lubneej txijnkawm.
Thov Vajtswv
Tus Tswv uas yog nyuam yaus Leej Txiv nyob saum ntuj. Thov pub rau nyuam yaus muaj tswvyim nrhiav tau tus txijnkawm raws li Koj lub siabnyiam. Thov pab nyuam yaus ua tau ib tug niam, ib tug txiv zoo, ua rau tus txij tus nkawm zoo siab thiab ua rau Koj tau koobmeej. Amees.
Peb saib yam dabtsi tseemceeb hauv kev nrhiav txij nrhiav nkawm?
Nyeem Vajluskub hauv peb lub xyoos: Yelemis 9:1-22
Kênh Youtube BHKTHN:
